2018-ci ildə inqilab yolu ilə hakimiyytə gələn baş nazir Nikol Paşinyanın Ermənistanda nüfuzu 5 il əvvələ müqayisədə indi olduqca aşağıdır. Bunu İrəvanın Ağsaqqallar Şurasına keçirilən seçkilərin nəticələri də təsdiq edir.
Qeyd edək ki, Ağsaqqallar Şurası paytaxt meriyası vəzifəsini yerinə yetririr. Bu quruma nəzarət Ermənistanda istənilən siyas qüvvə üçün müstəsna önəm kəsb edir. Ağsaqqallar Şurasına seçkilər sentyabrın 17-də baş tutub. Seçkilərdə iştirak səviyyəsu rekord səviyyədə aşağı olub. Belə ki, seçicilərin cəmi 28,46 faizi seçkilırə qatılıb. Bu da seçici fəallığının çox aşağı həddə olduğunu göstərir. Ünmumiyyətlə, 824,250 seçicidən yalnız 234,553-ü seçki məntəqəsinə gedib. Ermənistanın Mərkəzi Seçki Komissiyası şuraya seçkilərdə səslərin elektron hesablanmasını başa çatdırıb, 475 seçki məntəqəsinin hamısının nəticələrinə yekun vurulub. Ermənistan mediası yazır ki, baş nazir Nikol Paşinyanın rəhbəri olduğu hakim “Vətəndaş müqaviləsi” partiyası seçicilərin 32,57 faiz səsini alıb. Bu da 75 463 səsə bərabərdir. İkinci yerdə 18,89 faiz səs toplayan sabiq İrəvan meri Hayk Marutyanın “Milli tərəqqi” partiyası, üçüncü yerdə isə 15,43 faiz səslə “Ana Ermənistan” bloku qərarlaşıb.
Digər siyasi qüvvələrə gəlincə, "Respublika" partiyası 11,32 faiz, "Xalqın səsi" partiyası 9,68 faiz səs qazana bilib. Qalan 9 siyasi qüvvə 5 il müddətinə seçilən İrəvan Ağsaqqallar Şurasına daxil olmayıb. 50 faizlik baryeri keçə bilmədiyi üçün heç bir siyasi qüvvə Ermənistan paytaxtının merini müstəqil şəkildə seçmək imkanına malik deyil. Halbuki, bundan əvvəl Paşinyanın partiyası bunu təkbaşına edə bilirdi. Belə ki, beş il əvvəl “məxməri inqilab”dan eyforiya fonunda keçirilən paytaxt seçkilərində Paşinyanın partiyası 81,06 faiz və ya 294 109 səs toplamışdı. Amma indiki mənzərə ona elektorat dəstəyinin xeyli azaldığını göstərir. Özü də seçkilər kütləvi saxtakarlıqlar, qanun pozuntuları şəraitində keçib. Artıq Ermənistanın İstintaq Komitəsi İrəvan meri seçkilərində pozuntularla bağlı 8 cinayət işi açıb. Ermənistanın “Müstəqil müşahidəçi” ictimai alyansının nümayəndəsi, “Məlumatlı Vətəndaşlar İttifaqı” ictimai təşkilatının proqram koordinatoru Daniel İoannisyan İrəvan Ağsaqqallar Şurasına seçkilərin müşahidəsinin aralıq nəticələrini təqdim edərkən deyib ki, əsasən hakim “Vətəndaş müqaviləsi” partiyası tərəfindən törədilən 48 qanun pozuntusu qeydə alınıb. Ümumilikdə 124 seçki pozuntusu qeydə alınıb: “Seçki prosesində 124 qanun pozuntusu qeydə alınıb, onlardan 22-si seçki məntəqəsində kənar şəxslərin olması, 27-si izdihamla bağlı olub. Qanun pozuntularının 13-ü seçicilərin müraciəti ilə əlaqədardır. Onlardan 5-i təkrar xarakterli olub. Bir çox yerlərdə səsləri toplayan, seçicilərə zəng edərək məntəqəyə çağıran “sahibkarların” fəallığını görürük. Bu, əsasən, “Vətəndaş müqaviləsi” partiyası tərəfindən geniş yayılıb. Elə yerlər var ki, bu işi koordinasiya edən kriminal avtoritetlər dairəsindən olan şəxsləri müşahidə etdik. Məsələn, Kanaker-Zeytun inzibati rayonunda kriminal avtoritetlərlə əlaqəsi olan konkret şəxsin məntəqədən məntəqəyə getdiyini, hər bir məntəqədə və ya ondan kənarda “Vətəndaş müqaviləsi” partiyasının nümayəndələri ilə görüşdüyünü qeyd edirlər”.
“Ana Ermənistan” blokunun lideri Andranik Tevanyan qeyd edir ki, Paşinyan hakimiyyəti seçkilərdə kifayət qədər ciddi zərbə aldı: “Bu hökumət kifayət qədər ciddi zərbə aldı. Nikol Paşinyan və ətrafı istədiklərinə nail ola bilmədilər. Görünən odur ki, onlar öz təşkilatları, yəni Mərkəzi Seçki Komissiyası vasitəsilə müəyyən rəqəmlər əldə etdilər. Amma İrəvan Ağsaqqallar Şurasına seçkilər ölkədə tam dəyişiklik üçün yeni fürsət yardır. Bu, hakimiyyətin tam dəyişməsi istiqamətində ilk addımdır. Bir şey göz qabağındadır: bu hakimiyyətin nə ictimai etimadı, nə legitimliyi var. Hesab edirik ki, bu prosesi ümumi mübarizəyə və hakimiyyət dəyişikliyinə çevirmək imkanı var. Hazır olun!”. “Joxovurd” qəzeti bundan əvvəl yazırdı ki, Ermənistanda iri bizneslə məşğul olan sahibkarlara hakim “Vətəndaş müqaviləsi” partiyasının xeyrinə vəsait toplanmasında iştirak etmək tapşırılıb. Qeyd edilib ki, təxminən minə yaxın iş adamı hakim partiyanın xeyrinə 1,3 milyon dollar ödəniş həyata keçirib. Vəsait toplanışında iştirak edən sahibkarlar arasında “Art Lunch”ın təsisçisi Bakur Melkonyan, “Yeremyan Projects”in baş direktoru David Yeremyan, “Vivaro”nun təsisçiləri Vahe və Vigen Badalyan və başqaları var. Qeyd edək ki, iyulun 31-də İrəvan Ağsaqqallar Şurasına seçkilər ərəfəsində Ermənistanın “Vətəndaş Müqaviləsi” partiyasının pul toplama gecəsi keçirilib. İanə gecəsində Nikol Paşinyan da çıxış edib. Erməni mediasının məlumatına görə, ianə gecəsində hakim partiyanın bir sıra funksionerləri və erməni siyasi elitasının əsas üzvləri də iştirak edib. Müxalifət bunları qanun pozuntusu sayı və araşdırmatələb edir. Hakim partiya isə iddialarla razılaşmır. İndiki halda konsensus olmasa mer vəzifəsinə təyinat aparmaq mümkün olmayacaq. Hazırda bu xüsusda Paşinyanın partiyası digərləri danışıq aparıb öz namizədini mer vəzifəsinə oturtmaq istəyir. Amma ortaq məxrəcə gəlmək mümkün olmadığından təkrar seçkilər ə istisna deyil.
Nahid SALAYEV
