Mehman İsmayılov: “Ermənistanın Roma statutuna guya Azərbaycana görə qoşulması və guya bunun Azərbaycana qarşı nəzərdə tutulması tamamilə yalandır”
Bir neçə gün əvvəl məlumat yayıldı ki, Ermənistan Roma Statusunu qəbul etməyə hazırlaşır. Həmin ərəfədə müşahidəçilər qeyd edirdilər ki, Roma statutu ratifikasiya olunarsa, Rusiya federasiyasının prezidenti V. Putin Ermənistan ərazisinə səfər edə bilməyəcək, səfər edərsə onu burada həbs cəzası gözləyə bilər.
Bundan sonra Ermənistanın baş naziri Nikol Paşinyan açıqlama verdi ki, Roma Statutu ratifikasiya olunacaq, amma bunun Ermənistan-Rusiya münasibətləri ilə heç bir əlaqəsi yoxdur, bu yalnız Ermənistanın təhlükəsizlik problemi ilə bağlıdır. Hazırda Paşinyan və rəhbərlik etdiyi hökumətdə təmsil olunanlar çalışırlar ki, Roma Statusunun radifikasiya edilməsini hansı şəkildəsə əsaslandırsınlar, amma hələ də bir tutarlı səbəb tapa bilmirlər. Hər dəfə açıqlama verərkən özlərini bir az da batırırlar. Məsələn, Ermənistanın xüsusi tapşırıqlar üzrə səfiri Edmon Marukyan kimi. Ermənistanın xüsusi tapşırıqlar üzrə səfiri Edmon Marukyan TASS-a müsahibəsində o ki, var sərsəmləyib, həqiqətəuyğun olmayan sözlər danışıb.
E. Marukyan iddia edib ki, guya Ermənistan Roma Statutunu Rusiya Federasiyasına qarşı deyil, Azərbaycanın Ermənistan Respublikası ərazisində “törətdiyi hərbi cinayətlərə görə” ratifikasiya etmək istəyir. Azərbaycanı etmədiyi “hərbi cinayətlərdə” ittiham edən Marukyan və onun kimiləri yaxşı bilirlər ki, dedikləri cəfəngiyyatdır. “Bu əməlin beynəlxalq cinayət təqibinin obyektinə çevrilməlidir” – iddiasını irəli sürən Marukyan nədənsə, təmsil etdiyi dövlətin hərbi cinayətlərini unudur, insanlıq əleyhinə müharibə caniliyinin üstünə pərdə çəkir. Azərbaycan dövləti heç bir ölkənin ərazisində insanlıq əleyhinə heç bir addım atmayıb, amma Ermənistanın hərbi-siyasi rəhbərliyi Azərbaycanın din sakinlərinə, sivillərinə qarşı işlətdiyi cinayətlər sayılmaqla qurtarmaz...Hansı dövlətin cinayətkar olduğunu Rusiya da, dünya da yaxşı bilir.
Paşinyan komandası bu statusun Rusiya əleyhinə çevirilmədiyini sübut etmək üçün min-bir bəhanə uydurur və haqsız yerə Azərbaycanın adını çəkir.
Ermənistan indi də Roma Statusunu Radifikasiya etmək istəyini əsaslandırmaq üçün Azərbaycanı bəhanə gətirir ki, guya Azərbaycan "cinayət edib", sənədin qəbulunu da ona görə istəyirlər. Halbuki, Azərbaycanın heç bir müharibə cinayəti yoxdur, üstəlik də müharibə Azərbaycan ərazisində gedib, bu halda o Ermənistan ərazisində necə hansısa addım ata bilərdi. Ermənistanın bu qondarma əsaslandırmasına necə şərh vermək olar?
- “1999-cu ildə Roma statutuna qoşulan Ermənistanın bu gün və bu ərəfədə o sənədi ratifikasiya etməsi, Ermənistanın antirusiya oyunlarına qoşulub, Rusiyaya qarşı cəbhə alması deməkdir”
Politoloq Mehman İsmayılov “Bakı-Xəbər”ə şərhində “ Bu ilin mart ayının 17-də Beynəlxalq Cinayət Məhkəməsi Rusiya Federasiyası prezidenti Vladimir Putinin həbs olunmasına dair qərar çıxarıb. Səbəb kimi Putinin rəhbərliyi altında 16 500 Ukrayna cocuğunun zorla Rusiyaya deportasiya edilməsi göstərilib. Ermənistanın Roma statutuna guya Azərbaycana görə qoşulması və guya bunun Azərbaycana qarşı nəzərdə tutulması tamamilə yalandır. Ermənistan Roma statutuna, yəni Beynəlxalq Cinayət Məhkəməsinin Nizamnaməsinə qoşulmaq barədə qərarı 1999-cu ildə verib. Lakin bu günə qədər sənədi parlamentdə ratifikasiya etməyib. Bu ərəfədə sənədin parlamentdə ratifikasiya edilməsi Qərbin tələbidir və Ermənistan hakimiyyətinin Qərb qarşısında götürdüyü və yerinə yetirilməsi məcbur olan öhdəliklərdən birinin icrasının həyata keçirilməsi deməkdir. Yəni 1999-cu ildə Roma statutuna qoşulan Ermənistanın bu gün və bu ərəfədə o sənədi ratifikasiya etməsi, Ermənistanın antirusiya oyunlarına qoşulub, Rusiyaya qarşı cəbhə alması deməkdir. Ermənistan rəhbərliyinin Roma statutuna qoşulma sənədini ratifikasiya etməsi, Putinin insanlıq əleyhində cinayət törətdiyini təsdiq etmək deməkdir və Rusiya ilə bütün körpüləri yandırmaqdır. Bu səbəbdən Ermənistan rəhbərliyi etdiyi bu hərəkəti Azərbaycan adı ilə maskalamaq istəyir”-deyə bildirdi.
M.İsmaylovun sözlərinə görə, Edmon Marukyanın sayıqlaması, Ermənistan rəhbərliyinin Rusiya qarşısında keçirdiyi potensial qorxunun nəticəsidir. “Və bunu sadəcə, təsadüfən üst-üstə düşən hadisə kimi qələmə vermək istəyirlər. Məsələnin əsl mahiyyəti ABŞ-ın dəstəyini almaq məqsədilə Rusiya prezidentinin beynəlxalq cinayətkar olduğunu Ermənistan parlamentində təsdiq etməkdir. Bunun Azərbaycanla heç bir bağlılığı yoxdur və etməni parazit sürüsünün bəhanələridir. Ermənistan Rusiyanı satır və ona xəyanət edir, bunu isə müxtəlif çeşidli dələduzluqla boyamağa çalışırlar”-deyə M.İsmayılov qeyd etdi.
İradə SARIYEVA
