Mübariz Göyüşlü: “Bu QHT sektorunda faydalı nəticələrə gətirib çıxaracaq”
Qeyri-Hökumət Təşkilatlarına Dövlət Dəstəyi Agentliyi tərəfindən qeyri-hökumət təşkilatlarının qrant maliyyələşməsi ilə bağlı müsabiqələrin hər bir mövzusu üzrə qrant məbləğinin yuxarı həddi müəyyənləşib. Bununla bağlı Baş nazir Əli Əsədov müvafiq qərar imzalayıb.
Qərarla Agentlik tərəfindən qeyri-hökumət təşkilatlarının qrant maliyyələşməsi ilə bağlı müsabiqələrin hər bir mövzusu üzrə qrant məbləğinin yuxarı həddi aşağıdakı kimi müəyyən edilib:
1. “Kiçik qrant müsabiqəsi” çərçivəsində hər bir mövzu üzrə - 15000 (on beş min) manat;
2. “Orta qrant müsabiqəsi” çərçivəsində hər bir mövzu üzrə - 30000 (otuz min) manat;
3. “Böyük qrant müsabiqəsi” çərçivəsində hər bir mövzu üzrə - 50000 (əlli min) manat;
4. “Səfər qrantı müsabiqəsi” üzrə - 10000 (on min) manat.
Qrantlara ayrılan vəsaitin həcminin artırılmasına QHT- lər özləri necə baxırlar?...
- “...Sənəd bu sektorun işinə müsbət təsir edəcək, belə demək mümkündürsə, qrantların daha ədalətli bölünməsi işində səliqə-sahman, nizam-intizam yaradacaq”
“Müasir İnkişaf” Birliyinin sədri Mübariz Göyüşlü “Bakı-Xəbər”ə şərhində bildirdi ki, bu QHT sektorunun stumullaşdırılmasına böyük təkan verəcək. M. Göyüşlü hesab edir ki, maliyə vəsaitinin artırılması QHT-lərin gələcəkdə həyata keçirdikləri layihələrin daha da keyfiyyətli icrasına müsbət təsir göstərəcək. “QHT sektorunun fəaliyyətini nizamlayan bir sıra qanunvericilik aktları mövcuddur. Eyni zamanda da baş nazirin qeyri-hökumət təşkilatlarına ayrılan qrantların həcminin artırılması ilə bağlı imzaladığı sənəd bu sektorun işinə müsbət təsir edəcək, belə demək mümkündürsə, qrantların daha ədalətli bölünməsi işində səliqə-sahman, nizam-intizam yaradacaq. Bu QHT sektorunda faydalı nəticələrə gətirib çıxaracaq. Hökumət baş nazirin imzaladığı sənədlə QHT-lərə növbəti dəfə qayğısını ifadə etdi. Hesab edirəm ki, bu, qeyri-hökumət təşkilatları ilə bağlı uğurlu qərardır. Adətən qrant müsabiqəsinin keçirilmə qaydası, açıqlanandan sonra nəticələri görürsüz ki, bəzi QHT-lər tərəfindən narazılıqla qarşılanır”-deyə M. Göyüşlü bildirdi.
M.Göyüşlü hesab edir ki, bu müəyyən qədər bu istiqamətdə tənzimləmələrə yol açacaq, bəzi söz-söhbətlərə son qoyacaq. M.Göyüşlünün sözlərinə görə, Qeyri-Hökumət Təşkilatlarına Dövlət Dəstəyi Agentliyi əlindən gələni edir ki, bu istiqamətdə işlərin nəticəsi daha da müsbət olsun. O, hesab edir ki, bu agentliyin yaradılması və fəaliyyəti bu məsələlərə xeyli müsbət dinamika gətirib. “Amma düşünürəm ki, qarşıda hələ görüləsi çox işlərimiz var. Hər dəfgə müsabiqələrdə ortaya çıxan hansısa narahatedici məqamlar varsa onların həlli vacibdir. Fikrimcə, Baş nazirin imzaladığı qərar da bu sahənin inkişafı ilə bağlı atılan addımlardan biridir. Ümid edirəm ki, gələcəkdə bu istiqamətdə dövlət tərəfindən atılacaq növbəti addımlar mövcud vəziyyətin daha da müsbət formata gəlib çıxmasına səbəb olacaq” - deyə M.Göyüşlü əlavə etdi.
İradə SARIYEVA
