Qarabağdan Ermənistana gedənlərin sayı artmaqda davam edir. Məlıumatlara görə, təkcə üç gündə Qarabağdan Ermənistana gedənlərin sayı 700-ə yaxın olub. 11-12 sentyabr tarixlərində Qarabağın ermənilər məskunlaşan hissəsindən 500-dən çox insan Rusiya sülhməramlılarının müşaiyəti ilə Laçın sərhəd-buraxılış məntəqəsindən keçməklə Ermənistana gedib. Bu barədə Ermənistanın teleqram kanalları məlumat yayıb.
Bu zaman Qarabağı tərk edənləri "tələbə", "RF vətəndaşı", "xəstə" və s. kimi göstərirlər. Öz növbəsində, Azərbaycanın teleqram kanalları sentyabrın 13-də daha 183 nəfərin Qarabağdan Ermənistana getdiyini də bildirir. Onu da qeyd edək ki, sentyabrın 16-da isə Xankəndidən gələn erməni əsilli 61 nəfər Laçın sərhəd-buraxılış məntəqəsindən Gorus istiqamətinə keçib.
Maraqlıdır, son günlər bu qədər erməni niyə Qarabağdan Ermənistana keçib? Ermənilərin könüllü şəkildə Qarabağı tərk etməsi nə deməkdir?
“Hazırda Qarabağda qaça-qaçdır, az-çox düşüncəsi olan şəxslər gələcəyi düşündükləri üçün çıxıb getməyə üstünlük verir”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, ermənilərin bu gedişi gözlənilən idi: “İlk olaraq bildirim ki, Azərbaycan neçə ildir ki, Qarabağda Azərbaycan torpağında doğulmayan, münasibətlər normallaşandan sonra Azərbaycan vətəndaşlığı ala bilməyəcək xeyli sayda ermənini olduğunu bəyan edir. Hətta 10 minə yaxın Ermənistan vətəndaşının Qarabağda hərbi xidmət keçməsi haqqında məlumatlar belə var. Azərbaycanda açıq şəkildə, dinc yolla bəyan edir ki, bunlar sakit formada Azərbaycan torpağını tərk etsin. Həmçinin, ölkəmiz qarşı tərəfə çatdırıb ki, hər hansı bir cinayətə bulaşan ermənilərlə bağlı dövlətin hüquq mühafizə orqanları lazımi tədbir görəcək. Müharibə cinayəti törədən şəxslərin cəzalandırılması prosesi həyata keçiriləcək. Bütün bunlar erməniləri düşündürməyə vadar edib. Onlarda bıçağın sümüyə dirəndiyinin fərqin olduğuna görə, son çarə kimi qaçmağı üstün tutur”.
Siyasi şərhçi hesab edir ki, Azərbaycan xoş məram nümayiş etdirərək Qarabağdakı “tör-töküntülərin” sakitcə getməsini təmin edir. Bu səbəbdən də hər gün çox sayda şəxs “tələbə”, “Rusiya vətəndaşı”, “xarici mütəxəssis” adı ilə Qarabağdan gedir: “Qarabağı tərk edənlərin görüntüsünə fikir verəndən dərhal hiss olunur ki, onlar qanunsuz silahlı dəstələrdə xidmət edən Ermənistan vətəndaşıdır. Ancaq ölkəmiz onlara şərait yaradır ki, bütün silah təchizatlarını Qarabağda qoyub getsinlər. Həmin silah və digər avadanlıqlar ölkəmizə qalır”.
A.Həsrət xüsusi olaraq vurğuladı ki, hazırda Qarabağda qaça-qaçdır. Az-çox düşüncəsi olan şəxslər gələcəyi düşündükləri üçün çıxıb getməyə üstünlük verir.
Günel CƏLİLOVA
