“Vaqner” özəl hərbi şirkəti ilə bağlı Ermənistanda qaldırlan hay-küyün miqyası getdikcə genişlənir. Hüquq-mühafizə orqanları tərəfindən “Vaqner” özəl hərbi şirkətinin əsgərlərinin Ermənistanda mövcudluğu və ya sosial şəbəkələrdə bu xüsusda yayılan xəbərin yalan olub-olmaması ilə bağlı hələlik açıqlama verməyib.
Hazırda yalnız Milli Təhlükəsizlik Xidmətinin bununla bağlı yoxlamalar apardığı məlumdur, lakin nəticələrlə bağlı heç bir aydın məlumat vermir. Həmçinin “Telegram” kanallarından başqa digər mənbələrin də bu barədə etibarlı məlumatlara malik olub-olmadığını açıqlamır.
Sadəcə baş nazir Nikol Paşinyan Rusiyanın Ermənistanda dövlət çevrilişi hazırlaması ilə bağlı yayılan xəbərləri şərh edərkən bununla bağlı bildirib ki, təhlükəsizlik xidməti ölkədə “Vaqner” üzvlərinin olması ilə bağlı xəbərləri yoxlayır. Paşinyan qeyd edib ki, Ermənistan hüquq-mühafizə orqanları mətbuatda yer alan xəbərlərə reaksiya verməyə borcludur: "Bildiyimə görə, belə bir məlumat “Telegram” kanalları vasitəsilə yayılıb, Milli Təhlükəsizlik Xidməti yayılan məlumatları yoxlayır". Amma erməni hərbi ekspert Qor Amatuni bildirir ki, Ermənistanda “Vaqner” silahlılarının mövcudluğunu şəxsən görüb: “Ermənistanda “Vaqner” silahlıları var, mən şəxsən onları Gorusda otellərin birində görmüşəm. Bu yaxınlarda Gorusa getdim. Orada “Vaqner”dən bir neçə nəfər var idi, onların komandirləri isə rusiyalı erməni idi. Sonra biz onları Gorusun müxtəlif yerlərində gördük. Onlar doğrudan da Ermənistana gəliblər və toplaşırlar. “Vaqnerçi”lərin niyə gəldiyini hamımız bilirik. Ermənistanın Milli Təhlükəsizlik Xidməti, ordusu və polisi çox diqqətli olmalıdır. Ümumiyyətlə, Ermənistana arzuolunmaz şəxslərin buraxılmasına ehtiyac yoxdur. Gəlin silahlanaq, diqqətli olaq və hər şeyə hazır olaq”. Xatrladaq ki, bundan əvvəl “Baqramyan 26” “Telegram” kanalı Ermənistana gələn, sayı 3 mindən 12 minə qədər artmış “Vaqner” döyüşçülərinin ölkədə çevriliş təşkil etmək niyyətində olduqlarını yazıb. Kanal bu məlumatla yanaşı, heç bir fakt və ya foto təqdim etməyib. Rusiya Xarici İşlər Nazirliyinin rəsmi nümayəndəsi Mariya Zaxarova Ermənistanda “Vaqner” yaraqlılarının olması ilə bağlı iddiaları əsassız sayıb və fakt tələb edib. Hakim “Vətəndaş müqaviləsi” fraksiyasının katibi Artur Hovhannisyan bildirib ki, adətən seçkiqabağı dövrdə xarici qüvvələr Ermənistanda siyasi dəyişikliklərə nail olmaq üçün öz layihələrini aktivləşdirməyə çalışırlar, lakin deputat da heç bir dəqiq məlumat verməyib: “Müxtəlif naməlum mənbələrdən xaotik xarakterli məlumatlar yayılır, xarici qüvvələr əslində ölkədə hər hansı siyasi dəyişiklik yaratmaq üçün öz layihələrini daha da aktivləşdirməyə çalışırlar və biz bu proseslə, seçki prosesi ilə məşğul oluruq. Mən ictimaiyyətimizi bu manipulyasiya və təxribat xarakterli məlumatlara qapılmamağa və sentyabrın 17-də öz konstitusiya borcunu yerinə yetirməyə çağırıram”. Ermənistan hüquq-mühafizə orqanları ölkədə “Vaqner” döyüşçülərinin olması ilə bağlı məsələyə aydınlıq gətirməsə də, hüquq müdafiəçisi Artur Sakunts bu məlumatdan narahatlığını bildirir: “Təhlükə realdır, çünki biz bilirik ki, Ermənistan Kreml tərəfdarlarının və ya Putin rejiminin tərəfdarlarının da açıq şəkildə siyasi sahədə fəaliyyət göstərdiyi azsaylı dövlətlərdən biridir. Yəni biz vəhşilikləri ilə tanınan silahlı qrupun hücumuna məruz qala bilərik”. Sakuntsun fikrincə, xüsusilə indi Ermənistanla Rusiya arasında münasibətlərin gərgin, ölkədə çoxlu rusiyapərəst qüvvələrin olduğu bir vaxtda burada “Vaqner” döyüşçülərinin olmasını tamamilə istisna etmək düzgün deyil: “Rusiyada ən yüksək səviyyələrdə dəfələrlə narahatlıq ifadə olunan Ermənistandakı siyasi vəziyyət, ictimai mentalitet və digər faktorlar Kremlin əsas alətlərdən istifadə edəcəyini güman etməyə və ya iddia etməyə əsas verir. Vəziyyətə təsir etmək üçün “Vaqner” döyüşçülərindən istifadə istisna deyil”.
Xatırladaq ki, “Vaqner” döyüşçüləri Kremlin himayəsi altında Afrikadan Suriya və Ukraynaya qədər dünyanın ən qaynar nöqtələrində silahlı münaqişələrdə iştirak edib. Uğursuz üsyandan sonra muzdlular Belarusa köçüblər. “Vaqner”lə əlaqəli “Telegram” kanalları daha əvvəl yazmışdılar ki, yaraqlıların bir qismi Rusiyaya qayıdıb, bir qismi isə Afrikaya köçüb. Amma görünən budur ki, müəyyən sayda “Vaqner” döyüşçüləri də Ermənistana gəlib. Rusiyalı politoloq Sergey Markov isə qeyd edir ki, əslində, “Vaqner” Ermənistanda deyil: “Hazırda İrəvan hakimiyyəti guya Ermənistana yerləşdirilmiş minlərlə “Vaqner” döyüşçüsünu axtarır. Onların fikrincə, Rusiya Paşinyanı devirmək üçün vaqnerçiləri ora göndərib. Rusiya Xarici İşlər Nazirliyi artıq bunu təkzib edib. Paşinyanın Ermənistandakı “Vaqner” ilə bağlı bu əhvalatı uydurmağının məqsədi var: Onun təhlükəsizliyi bundan sonra NATO ölkələrinin kəşfiyyat xidmətlərinə arxalansın - ABŞ, İngiltərə və ya Fransaya. Paşinyan Rusiya ilə münasibətləri tamamilə kəsməyə hazırlaşır və şəxsi təhlükəsizliyini NATO hesabına yaradır”. Hələlik isə Paşinyan hakimiyyəti Rusiyadan yaxınlaşan təhlükənin nə qədər ciddi olduğunu artıq anlayır. Ona görə də, Rusiyaya qarşı ittihamları sərtləşdirməklə, Kremllə qarşıdurmanı dərinləşdirməklə ABŞ və Qərbin dəstəyini qazana biləcəyinə ümid bəsləyir.
Tahir TAĞIYEV
