Hindistan Ermənistana 6 ədəd ATAGS haubitsası verib. Bunu yerli müdafiə şirkəti “Bharat Forge”-nin rəhbəri Babu Kalyan bəyan edib. Hindistan Müdafiə Araşdırmaları Qanadının (Indian Defence Research Wing) məlumatına görə, haubitsalar avqustun əvvəlində Ermənistana təhvil verilib. Bu, Hindistanla imzalanmış böyük müqavilə çərçivəsində Ermənistana gələn ilk partiyadır.
Qeyd olunana görə, Hindistan bu ölkəyə daha 84 ədəd ATAGS haubitsası verməyi planlaşdırır. "Bharat Forge"nin rəhbəri Babu Kalyan bildirib ki, 155 mm-lik haubitsalar avqust ayında təhvil verilib.
Müdafiə sazişi 3 il ərzində Ermənistana ümumi dəyəri 155 milyon dollardan çox olan 90 ATAGS haubitsasının tədarükünü nəzərdə tutur.
Qeyd olunur ki, "Bharat Forge" müqaviləni vaxtından əvvəl yerinə yetirməyi planlaşdırır.
Bu Ermənistan ordusu üçün nə demək olacaq? Bu Ermənistan ordusunu nə dərəcədə gücləndirə bilər, bu onun hücum gücünə necə təsir edəcək ?Bu silah onun müdafiə yoxsa hücum gücünü artırır?
Ekspertlərə görə, Ermənistan bu ağır silahı hücum gücünü artırmaq üçün alır.
“…Daxildə gizli məqamlar var ki, bu haubitsalar həqiqətən də döyüş tapşırığını yerinə yetirmək məsələsində etimadı doğrulmayıb”
Hərbi ekspert İbrahim Rüstəmli “Bakı-Xəbər”ə şərhində bildirdi ki, Hindistan Ermənistanın hərbi müttəfiqidir və Qarabağ məsələsində açıq şəkildə Ermənistanın mövqeyini müdafiə edən dövlətlərdəndir. “ATAGS haubitsası kimi silahların Ermənistan ordusuna verilməsi işinə avqustdan başlanılıb. 44 günlük Vətən müharibəsindən sonra Ermənistanın bu haubitsalarla təmin olunması ola bilsin ki, onun ordusunun döyüş və müdafiə qabiliyyətini müəyyən qədər artırsın. Amma əsas fakt ondan ibarətdir ki, Hindistan özü ATAGS haubitsalardan imtina edib. Onu diqqətinizə çatdırmaq istəyirəm ki, ilk dəfə bu ilin yanvar ayında ATAGS haubitsalarının sınağı keçirilib və bu sınaqlarda haubitsalar özünü doğrultmayıb, ona görə də, Hindistan özü silah arsenalında ATAGS haubitsasını görmək istəmir. Bu səbəbdən daha təkmil formalara müraciət edir. Amma bununla belə, Hindistanın əsas məqsədi bir tərəfdən Ermənistanı silahlandırmaqdırsa, ona hərbi yardım etməkdirsə, ordusunu gücləndirməkdirsə, o biri tərəfdən istifadə etmədiyi silahı baha qiymətə Ermənistana satmaqla canını dəmir-dümürdən qurtarmaqdır. Bütün bunlar üzdə Ermənistan ordusunun döyüş qabiliyyətini artırmaq məqsədi daşıyır, amma daxildə gizli məqamlar var ki, bu haubitsalar həqiqətən də döyüş tapşırığını yerinə yetirmək məsələsində etimadı doğrulmayıb”-deyə müsahibimiz bildirdi.
İ. Rüstəmlinin fikrincə, bu metallomun Ermənistan slahlı qüvvəllərinin cəbhəxanasına daxil edilməsi bölgədə balansı dəyişə bilməyəcək. “Cünki Azərbaycan ATAGS-dan da yüz dəfələrlə imkanlı, yüksək döyüş qabiliyyətinə malik haubitsalara sahibdir və bu haubitsalar ATAGS haubitsaları ilə müqyaisədə kifayət qədər müasir tələblər çərçivəsində qurulub və təlim poliqonlarında özünü doğruldub”-deyə İ.Rüstəmli əlavə etdi.
İradə SARIYEVA
