Rusiyanın Ermənistanda dövlət çevrilişi edə biləcəyi ilə bağlı xəbərlərə İrəvanda indi daha ciddi yanaşmağa başlayıblar. Hesab edilir ki, Moskva-İrəvan münasibətlərində son gərginliyin əsas səbəblərindən biri də elə budur.
Xatırladaq ki, bir müddət öncə Ermənistanda bir sıra iqtidaryönlü qurumlara məxsus səhifələrdə 3 min “Vaqnerçi”nin ölkəyə gəlişi və yerli qüvvələrin dəstəyi ilə dövlət çevrilişi həyata keçirəcəyi, həmçinin baş nazir Nikol Paşinyanı hakimiyyətdən uzaqlaşdıracağı ilə bağlı xəbərlər yayılıb.
Ermənistan hakimiyyətinə yaxınlığı ilə bilinən “Baqramyan 26” teleqram kanalı bu xüsusda bildirb: “Priqojinin ölümü zamanı Ermənistanda “Vaqner” qruplaşmasının 3000-ə yaxın döyüşçüsü var idi. Bu yaxınlarda əsasən Rostovdan onlara 2000-ə yaxın müqaviləli əsgər (əsasən etnik ermənilər) qoşulub. Paşinyanın Rusiyanı strateji tərəfdaş kimi seçməkdə səhv olması və Rusiya rəhbərliyini Qarabağ məsələsində razılaşmalara əməl etməməkdə ittiham etməsi ilə bağlı son açıqlamalarını nəzərə alaraq, Kreml Ermənistanda dövlət çevrilişi ssenarisinə icazə verib. Bu planın məqsədi ölkədə mövcud olan “Vaqner” yaraqlılarından istifadə edərək Paşinyan və onun komandasını hakimiyyətdən uzaqlaşdırmaqdır. Putin üçün “son damla” erməni-amerikan birgə hərbi təlimləri oldu. Rusların əsas ümidi həm də çoxlu rus agentlərinin olduğu ordunun, kəşfiyyat xidmətlərinin və polisin yüksək rəhbərliyinədir. Orta və aşağı səviyyələrdə rusların dəstəyi çox azdır. Amma Rusiyanın Paşinyanın yerinə layiqli namizədləri yoxdur. İrəvan və onun ətrafında çoxsaylı hərbi birləşmələrin mövcudluğunu nəzərə alsaq, uğur ehtimalı olduqca aşağıdır. Bununla belə, Qarabağın təmas xəttində və Ermənistan-Azərbaycan sərhədində sabitliyin pozulmasına diqqət yetirilir”. Sözügedən məlumatın yayılmasının ardınca Rusia Federasiya Şurasının beynəlxalq komitəsinin rəhbəri Qriqori Karasin bu iddiaları cəfəngiyat adlandırıb: “Rusiyanın Ermənistanda dövlət çevrilişi hazırlaması ilə bağlı məlumatlar cəfəngiyyatdır”. Onun sözlərinə görə, belə iddiaları səsləndirən zaman faktlar irəli sürmək lazımdır: “Hər hansı virtual sxemlər uydurmaq və bu barədə bütün dünyaya car çəkmək ağıllı olmayan, daha doğrusu, çox axmaq siyasətçilərə xas olan xüsusiyyətdir. Belə bəyanatlar Rusiyaya qarşı düşmənçiliyə təhrik üçün səsləndirilir”. Rusiya Xarici İşlər Nazirliyi də Ermənistanda minlərlə “Vaqner” döyüşçüsünün yerli qüvvələrlə birlikdə Nikol Paşinyan hakimiyyətini devirməyi planlaşdırması ilə bağlı yayılan məlumatlara münasibət bildirib. Rusiya Xarici İşlər Nazirliyinin rəsmi nümayəndəsi Mariya Zaxarova bu məlumatı mifologiya adlandırıb: “Vaqnerçi”lərin fotoları, bəlkə videoları var? Nəyin əsasında belə bəyanatlar verilir? Niyə görə üç min? niyə üç kvadrilyon yox, niyə 1,5 adam yox? Hardandı bütün bunlar? Faktlar hardadı? Əgər bu qədər insandan söhbət gedirsə, o zaman onların olduğu məkan haradı? Ermənistan əhalisi milyard nəfər olan ölkə deyil axı. Elə miqyaslı əhalisi olan ölkə deyil, yəqin ki, həmin insanları görərdilər. Bütün bunlar növbəti mifologiya sırasındandır”. Rusiya tərəfinin təkzibinə baxmayaraq, Ermənistanda qərbyönlü “Milli Demokratik Qütb” siyasi blokunun nümayəndəsi Jirayr Səfilyan ölkədə "Vaqner" özəl hərbi şirkətinin döyüşçülərinin olduğunu bildirir.
Bütün bunlar artıq baş nazir Nikol Paşinyanı da ciddi narahat edir. Elə bu səbəbdən onun göstərişi ilə ölkənin Milli Təhlükəsizlik Xidməti "Vaqner" özəl hərbi şirkətinin döyüşçülərinin Ermənistanda olub-olmadığını araşdırmağa başlayıb. Hökumət iclasında müxalifətçi deputat Aqnessa Hamoyan Nikol Paşinyana bu xüsusda sual verib: “Ermənistan hökumətinin Rusiyanın Ermənistanda inqilab edə biləcəyindən qorxusu varmı? Ermənistan Milli Təhlükəsizlik Xidməti niyə “Vaqnerçiləri” axtarır? Bu suala cavabda Paşinyan qeyd edib: “Milli Təhlükəsizlik Xidmətinin “Vaqnerçilərin” axtarışı üzrə hərəkətlərinə gəlincə, Ermənistan Respublikasının hüquq-mühafizə orqanları mətbuatda dərc olunan yazılara reaksiya verməyə borcludur və bu, cinayət və cinayət-prosessual qanunvericiliyin normasıdır. Bildiyimə görə, teleqram kanallarında belə bir məlumat olub. Milli Təhlükəsizlik Xidməti öz yurisdiksiyasında dərc olunan məlumatları yoxlayır və bunda qeyri-adi heç nə yoxdur. Rusiya Federasiyasının Ermənistanda inqilab edəcəyindən qorxmağıma gəlincə, Ermənistan Respublikasında inqilabı yalnız Ermənistan xalqı edə bilər və xalq artıq bu inqilabı edib”. Erməni ekspert Baqrat Estukyan da bildirir ki, dövlətlər öz çirkin işlərini görmək üçün tez-tez “Vaqner” kimi muzdlu dəstələrə müraciət edirlər. Estukyan qeyd edib ki, “Vaqner” kimi qruplar dövlət üçün qara alətlərdir. Bu mənada o, “Vaqner”dən Ermənistanda istifadə olunmasını istisna etmir. Paşinyan hakimiyyəti son vaxtlar Ermənistan cəmiyyətində sosial dayaqlarını itirdiyinə əmin olduğundan mövcud situasiyadan daha çox narahat olmağa başlayıb. Rəsmi İrəvan anlayır ki, Rusiya ilə münasibətlərin korlandığı bir dövrdə daxili dəstəyin sürətlə itirilməsi olduqca təhlükəlidir. Çünki bu, ilk növbədə Paşinyan hakimiyyətindən ciddi şəkildə narazı olan Rusiyanın maraqlarına tamamilə cavab verir, Paşinyan hakimiyyətini devirmək istəyi olan Rusiyanın planlarını gücləndirir.
Samirə SƏFƏROVA
