Rusiya prezidenti Vladimir Putinin Vladivastokda məlum açıqlamasından sonra Ermənistanın baş naziri Nikol Paşinyan anti-Moskva ritorikanı daha da sərtləşdirdi. Paşinyan ABŞ-ın “Politico” nəşrinə müsahibəsində bir daha bəyan edib ki, Ermənistan daha öz təhlükəsizliyi üçün Moskvaya arxalana bilməz.
Onun fikrincə, bunun əsas səbəbi Ukraynadakı müharibədir: “Bu savaş Rusiyanın imkanlarına təsir göstərdi”.
Paşinyan etiraf edib ki, həm Azərbaycan, həm də Türkiyə Rusiya üçün strateji əhəmiyyət daşıyan ölkələrdir: “Ona görə də Kreml bu dövlətləri özündən uzaqlaşdırmamağa çalışır. Biz isə müstəqil, suveren olmaq istəyirik”. Nikol Rusiya sülhməramlarını öhdəliklərini yerinə yetirməməkdə ittiham edib: “Onlar öz missiyalarını icra edə bilmirlər”. Paşinyan onu da qeyd edib ki, hazırda artan gərginlik fonunda eskalasiya ehtimalını istisna etmək mümkün deyil: “Ermənistan buna hazırdır. Bununla belə, əgər biz davamlı, əbədi dövlətçiliyə sahib olmaq istəyiriksə, ilk növbədə qonşularımızla münasibətlərimizi nizama salmaq üçün çox ciddi addımlar atmalı və çox ciddi səylər göstərməliyik”.
“Rusiya-Ermənistan münasibətlərində çox ciddi gərginlik müşahidə olunmaqdadır”
Məsələ ilə bağlı “Bakı-Xəbər”ə açıqlama verən millət vəkili Ceyhun Məmmədovun fikrincə, əslində Paşinyanın bu fikirləri onun növbəti məqsədlərindən xəbər verir: “Əsində sərhəddə təxribatı törədən, Azərbaycan ərazilərinə daxil olmaq istəyən, Ağdam yoluna qarşı separatçıları təhrik edən Ermənistandır. Azərbaycan da bunun qarşısını almaq üçün sistemli addımlar atır. Vəziyyətin bu həddə gəlib çatmasında başlıca günahkar Ermənistandır. Sərhəddə eskalasiyaya hazırlaşan da məhz Ermənistandır. Paşinyan bir tərəfdən deyir ki, Qarabağ daxil Azərbaycanın ərazi bütövlüyünü tanıyıram. O birisi tərəfdən Ermənistan hökuməti büdcədən separatçılara böyük həcmdə vəsait ayırır. Əlbəttə ki, bütün bunlar bir-biri ilə uzlaşmayan məsələlərdir. Ermənistan həm vəziyyəti gərginləşdirir, həm də Rusiyanı regiondan çıxarmağa çalışır. Paşinyan artıq görür ki, Ermənistan tərəfi bu prosesdə düzgün siyasət həyata keçirmədi. Onun yanlış siyasəti üzünndən 3 ildir sülh sazişinin imzalanması yubanır. Bir sıra məsələlərlə bağlı günahı Rusiyanın üstünə atır. Guya Azərbaycan Ermənistan ərazisini ələ keçirib, Rusiyanın günahı üzündən KTMT gərəkən tədbirləri görməyib. Halbuki, bu ittihamların əsası yoxdur. Bu gün Rusiya-Ermənistan münasibətlərində çox ciddi gərginlik müşahidə olunmaqdadır. Bunu əsaslandırmaq üçün Paşinyan müxtəlif bəyanatlar və açıqlamalar verir. Görünən odur ki, Paşinyan Moskvadan uzaqlaşmaq siyasətində qərarlıdır. Ermənistandan fərqli olaraq Türkiyə və Azərbaycan Rusiya ilə münasibətləri qoruyur. Ermənistan konstruktiv mövqedən çıxış etsəydi, o zaman tərəflər arasında gərginlik yaşanmazdı. Ona görə də Ermənistan hakimiyyəti münasibətlərin normallaşmasını istəyirsə, sözdən əmələ keçməlidir. Rəsmi İrəvan öz siyasətini dəyişməlidir. Ancaq hələ ki, biz bunun elementlərini görmürük”.
Vidadi ORDAHALLI
