Tarixi Azərbaycan torpaqlarında özlərinə dövlət qurmaqla kifayətlənməyən ermənilər son yüz ildə Azərbaycanın başqa ərazilərinə qarşı da iddialarını açıq bildirirlər. Torpaqlarımızın 20 faizdən artığını işğal etməklə Ermənistan öz gerçək xislətini ortaya qoydu. 44 günlük Vətən müharibəsində torpaqlarımız işğaldan azad edildi.
Bu faktı həzm edə bilməyən işğalçı Ermənistan, separatçı erməni lobbisi Azərbaycan Respublikasının şəhər və mahallarının adı ilə “erməni təşkilatları” yaratmağa başladılar və bununla da belə rəy formalaşdırmağa çalışdılar ki, guya o ərazilər də “ermənilərin olub”. Belə qondarma təşkilatlardan biri də “Girdiman-Şirvan-Naxçıvan ümumerməni birliyidir ki, indi onun adından Azərbaycana qarşı istifadə edirlər. Guya Azərbaycan sərhəddə hərbi texnika toplayır, guya Laçın yolu bağlıdır, guya Qarabağdakı ermənilər “acından ölür” və ümumerməni birliyi də bundan narahatlıq keçirir. Olmayan etnik problemdən danışan qondarma birlik təmsilçiləri “soyqırımdan”, “humanitar fəlakətdən” də dəm vururlar. O qədər saxtakarlığa aludə olublar ki, gerçəkliyi unudub Azərbaycanı qondarma Sumqayıt “qırğınında” (onu törədənlərin ermənilər olduğu məlumdur), “Marağa qırğınında” ittiham edirlər, hələ utanmadan iddia edirlər ki, guya 1990-cı ildə Bakıda “ermənilərə qarşı” nəsə olub...
Diqqətimizi çəkən onların cəfəng iddiaları, əsassız ittihamları deyil, adı Azərbaycan toponimlərindən, yaşayış yerlərindən ibarət olan “Girdiman-Şirvan-Naxçıvan” olan ümumerməni təşkilatının indiki şəraitdə ortaya çıxarılmasıdır. Onsuz da onlar yalan danışmağa, şər atmağa öyrəncəklidirlər.
“Nə Girdimanın, nə Şirvanın, nə də Naxçıvanın tarix boyunca indi erməni adlanan haylara heç bir aidiyyatı olmayıb”
Azərbaycan ərazilərinin adının erməni təşkilatına verilməsi sözsüz ki, yolverilməzdir. AMEA Qafqazşünaslıq İnstitutunun Ermənişünaslıq şöbəsinin müdiri Elnur Kəlbizadə “Bakı-Xəbər”ə şərhində “Ermənistanın və ermənilərin absurd iddiaları bitib-tükənmədiyi kimi, onların müxtəlif saxta ideyalarını, əsassız iddialarını reallaşdırmaq üçün yaratdıqları qondarma təşkilatların, qurumların da sayı - hesabı yoxdur. Əslində, müxtəlif təşkilatlar yaradaraq və onlara başqa ölkələrin ərazində yerləşən coğrafi adları verməklə Ermənistan və ermənilər özlərinin nə qədər təcavüzkar, İşğalıçı niyyətlər daşıdığını bir daha göstərirlər. Ümumilikdə götürdükdə isə məşhur bir Azərbaycan atalar məsəlində də deyildiyi kimi, halva deməklə ağız şirin olmur. Ermənilər hansısa bir təşkilat yaradıb ona “Girdiman-Şirvan-Naxçıvan” adını verməklə bu əraziləri ələ keçirəcəklərini, özününküləşdirəcəklərini düşünürlərsə, bu məsələdə çox ciddi şəkildə yanılırlar. Əgər ermənilər özlərinə bir vətən axtarırlarsa, yaxşı olardı ki, Balkan yarımadasındakı və Hindistandakı müəyyən ərazilərin adlarını, eyni zamanda Fransadakı Marsel şəhərinin adını öz təşkilatlarına versinlər. Nə Girdimanın, nə Şirvanın, nə də Naxçıvanın tarix boyunca indi erməni adlanan haylara heç bir aidiyyatı olmayıb. Bunlar tarixi Azərbaycan torpaqlarıdır. Bu ərazilərin əhalisinin kimlərdən ibarət olması, bu ərazilərin tarixən hansı xalqların qurduqları dövlət və imperiyaların tərkibində olması tarixi mənbələrdə açıq-aşkar şəkildə yazılıb”-deyə bildirdi.
Prezident İlham Əliyevin “boş bəyanatlardansa praktik addımlar daha önəmlidir” fikrini xatırladan E.Kəlbizadənin sözlərinə görə, Azərbaycan üçün verilən bu cür bəyanatlar sadəcə hay-küydən və qara-qışqırıqdan başqa bir şey deyil, onlar heç bir işə yaramır. “Azərbaycan hər sahədə, həm diplomatiya masasında, həm də digər istiqamətlərdə öz praktik addımlarını atmaqdadır. Ermənistanın, ermənilərin yaratdığı bu cür qondarma təşkilatlar istədikləri qədər boş bəyanat verə bilərlər” - deyə E.Kəlbizadə vurğuladı.
İradə SARIYEVA
