ABŞ və Ermənistan hərbçilərinin “Eagle Partner 2023” (“Qartal tərəfdaşı 2023”) birgə təlimləri başlayıb. Açılış mərasimi İrəvan yaxınlığındakı Zar təlim mərkəzində baş tutub. Ermənistanla ABŞ arasında keçirilən birgə təlimlərdə 175 erməni və 85 amerikalı hərbçi iştirak edir. “Eagle Partner 2023” birgə təlimlərinin 9 gün davam edəcəyi planlaşdırılıb.
Təlimlər Ermənistan Müdafiə Nazirliyinin sülhməramlı briqadasının “Zar” təlim mərkəzində və Müdafiə Nazirliyinin N saylı təlim mərkəzində keçiriləcək. O da məlumdur ki, rəsmi Moskva ABŞ tərəfi ilə Ermənistanda birgə hərbi təlimlərə öz mənfi reaksiyasını bildirib.
Maraqlıdır, hazırda Ermənistanada hərbi təlimlərə gəlmiş ABŞ əsgərləri, təlimlərdən sonra bölgəni tərk edəcəklərmi? Yəni, Birləşmiş Ştatlar hərbçiləri sentyabrın 19-dan sonra Ermənistanı tərk edəcəklərmi? Tərk etməsələr nə baş verəcək?
“Belə olan halda bu, Ermənistanın hazırkı hakimiyyəti üçün baha başa gələ bilər”
Sözügedən məsələyə aydınlıq gətirən “İki Sahil” qəzetinin baş redaktoru Vüqar Rəhimzadənin fikrincə, çox güman ABŞ təlimlərdən sonra bölgəni tərk edəcək: “Əvvəla, belə təlimlərə nə qədər ehtiyac olduğu sual altındadır. Ona görə ki, Ermənistan NATO-ya qarşı olan bir hərbi blokda təmsil olunur. Söhbət KTMT-dən gedir. Ermənistan Rusiya amilini, Kremlin mövqeyini nəzərə almadan belə təlimlərə başladı. Birləşmiş Ştatlar əsgərlərinin təlim adıyla Ermənistanda peyda olunması müəyyən qaranlıq məqamları özündə əks etdirir. Cənubi Qafqazda geosiyasi mübarizənin kəskinləşdiyi bir dövrdə təlimlərin keçirilməsi Rusiyaya qarşı ABŞ-ın həm də bir güc göstəricisidir. Çox güman ki, sentyabrın 19-da təlimlər başa çatandan sonra Birləşmiş Ştatlar əsgərləri Ermənistanı tərk edəcəklər. Tərk etməsələr, hansısa bəhanə ilə orada qalsalar, bu, geosiyasi qarşıdurmaya səbəb ola bilər. Yəni, düşünmürəm ki, Rusiya buna sakit yanaşsın. Belə olan halda bu, Ermənistanın hazırkı hakimiyyəti üçün baha başa gələ bilər. Nəzərə salmaq lazımdır ki, Rusiyanın orada hərbi bazası var. Rusiyanın əsgərlərinin olduğu bir ölkədə təlim adıyla gələn ABŞ əsgərlərinin oranı tərk etməməsi qarşıdurmalara səbəb ola bilər. Fikrimcə, belə bir hal baş versə, Paşinyan hakimiyyəti bunun altında qalacaq”.
Vidadi ORDAHALLI
