Azərbaycan və Türkiyə qardaşlığından narahat olanlardan biri Tehran rejimidir ki, bütün vasitələrdən istifadə edərək bu əlaqələri qaralamağa çalışır, tarixi birliyimizi zədələməyə çalışır. Məlum olduğu kimi, molla rejimi özünün müəyyən informasiya resurslarını bu prosesə cəlb edib.
Bəzi media orqanlarında, xüsusən də “Telegaram” kanallarında molla rejiminin emisarları Türkiyə və Azərbaycan arasında mövcud olan əlaqələri, tarixi kökləri olan qardaşlığı zədələmək üçün fəaliyyətə keçiblər. “Azərbaycan tarixi” adı verdikləri “Telegram” kanalında antAzərbaycan, antitürk təbliğatı həyata keçirirlər. “Azərbaycan tarix”i adlı “Telegram” kanalında belə bir iddia yayılıb ki, guya Atatürk o dövrdə Azərbaycanı “satıb”. İddia edirlər ki, guya bu baradə Rasih Nuri İlerinin “Atatürk ve Komünizm” əsərinin 99-100-cü səhifələrimdə qeyd edilir. Hətta kitabın səhifələrinin şəkilini də yayıblar, bundan başqa, kanala nəşrin PDF-ni də yerləşdiriblər, "Atatürk Azərbaycanı 5 milyona satır..." başlıqlı paylaşım ediblər.
Mollapərəstlər iddialarını Rasih Nuri İlerinin “Atatürk ve Komünizm” əsəri ilə əsaslandırmağa çalışırlar.
“Mollakratiyanın emsarlarının “Atatürk Azərbaycanı 5 milyona satdı” kimi iddiası iftiradır və heç bir əsası yoxdur”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli “Bakı-Xəbər”ə şərhində “Tehran rejimi tərəfindən sosial şəbəkələrdə və KİV-lərdə Azərbaycanla Türkiyə qardaşlığını zədələmək məqsədilə belə təxribatlar, həqiqətəuyğun olmayan məlumatlar yayılır. Burada qeyri-adi heç nə yoxdur, heç təsadüfi də deyil. Rejim günü-gündən genişlənən, yüksələn Azərbaycan və Türkiyə münasibətlərinə xələl gətirmək, onu pozmaq üçün əlindən gələni edir. Bütün təxribatları pozuculuq xarakteri daşıyır” - deyə bildirdi.
Məsələyə tarixi baxımdan diqqət yetirən F.Ələkbərli vurğuladı ki, Azərbaycan Xalq Cumhuriyyəti mövcud olduğu 1918-1920-ci illərdə hələ heç Türkiyə Cumhuriyyəti qurulmamışdı, Osmanlı dövləti vardı. “Osmanlının çöküşü ərəfəsində, yəni 1919-cu ilin mayından etibarən Atatürk milli mücadilə hərəkatına başlayıb. Bundan sonra isə məhz Birinci Dünya Müharibəsindən qalib çıxmış ANTANTA dövlətlərinə qarşı bir müharibə vəziyyətində idi. Yəni o zaman hələ Atatürkün başlatdığı milli mücadilə hərəkatının rəsmi bir önü yox idi. Bilirik ki, yalnız Atatürkün rəhbərliyi ilə 1920-ci ilin 23 aprelində Türkiyə Böyük Millət Məclisi quruldu. Demək istədiyimiz odur ki, həmin dönəmdə bolşevik Rusiyası da ingilislərlə, fransızlarla, bir sözlə ANTANTA ölkələri ilə müharibə vəziyyətində idi. Belə bir vəziyyətdə Atatürkün rəhbərliyi ilə həyata keçirilən milli mücadilə hərəkatı ilə bolşevik Rusiyası arasında müəyyən danışıqlar, müəyyən ortaq anlaşmalar, fikirlər vardı. O dövrdə onların bir-birilərinə yardım məsələsi olmuşdu. Atatürklə Lenin, Sovet Rusiyası arasında aparılan danışıqlarda məsələ Azərbaycan Cumhuriyyətinin hər hansı bir problem yaratmaması ilə bağlı idi. Zatən, Azərbaycan Cumhuriyyəti heç bir halda nə Osmanlı dövlətinə, nə Atatürkün başlatdığı milli mücadilə hərəkatına qarolmayıb. Sadəcə, o vaxt içimizdəki və xaricdəki düşmənlər belə təəssürat yaradırdılar ki, guya Azərbaycan Cumhuriyyəti və onun rəhbərliyi Atatürkün başlatdığı milli mücadilə hərəkatının Sovet Rusiyası ilə əməkdaşlığından narahatdır. O zaman Azərbaycan Xalq Cumhuriyyətinin rəhbərliyi Məhəmməd Əmin Rəsulzadə də, Nəsib bəy Yusifbəyli də, Fətəli xan Xoylu da dəfələrlə açıqlamalarında bildirmişdilər ki, onlar bütün hallara çökməkdə olan Osmanlı dövlətinin yerinə gələcək milli mücadilə hərəkatına maddi və mənəvi dəstək verməyə hazırdırlar. Mollakratiyanın emsarlarının “Atatürk Azərbaycanı 5 milyona satdı” kimi iddiası iftiradır və heç bir əsası yoxdur. Bu həqiqətəuyğun məsələ deyil, belə hal olmayıb” - deyə bildirən F.Ələkbərli qeyd etdi ki, Atatürün rəhbərlik etdiyi milli mücadilə hərəkatı ilə bolşevik Rusiyasını bir arada tutan onların birlikdə imperialist dövlətlərə qarşı mücadilə aparması olub, burada başqa bir məsələ yoxdur. O, vurğuladı ki, Cumhuriyyətin süqutundan sonra meydana çıxan Azərbaycan Sosialist Respublikası və onun lideri Nəriman Nərimanov da Türkiyə Böyük Millət Məclisinə, onun lideri Atatürkə həmişə yardımlar edib. “Biz bilirik ki, Türkiyə Cumhuriyyəti 1923-cü ilin oktyabrında yaranıb. İndi bütün bunları tamam başqa yerə yozmaq, Atatürkü bu kimi məsələlərdə əsasız ittiham etmək yersizdir...” - deyə F.Ələkbərli vurğuladı.
İradə SARIYEVA
