Bu gün özünü demokratiyanın, insan azadlığının təbliğatçısı kimi göstərən, lakinin fəaliyyətində bunun əksini nümayiş etdirən beynəlxalq təşkilatların əksəriyyəti nədənsə Ermənistanı müdafiə etməkdən əl çəkmək istəmir. Çox zaman onlar Ermənistanı müdafiə etmək məsələsində ifrata varırlar, bu isə bu səhnəni müşahidə edənləri ciyrəndirir.
Çünki bu gərəksiz yerə edilir. Təəssüflər olsun ki, “Freedom House” kimi təşkilatlar qaşınmayan yerdən qan çıxarmağa çalışırlar. Biz bunu indiyə qədər çox müşahidə etmişik, edirik də. Məsələn, “Freedom House” təşkilatının prezidenti Maykl Abramovitsin adından yayılan bəyanatda “Biz Ermənistanın suveren ərazisinə istənilən hücum planını pisləyirik” iddiası yer alıb. Ermənistanın Azərbaycandilli media orqanında gedən məlumata görə, təşkilatın prezidenti Ermənistanın və Qarabağ separatçılarının təəssübünü çəkir. “Azərbaycan silahlı qüvvələrinin Ermənistanla sərhəddə hərbi texnika yığılması ilə bağlı yayılan xəbərlərdən dərin narahatıq. Biz Ermənistanın suveren ərazisinə hər hansı hücum planını pisləyirik və vasitəçiləri Ermənistanın sərhədlərinin növbəti dəfə pozulmasının qarşısını almaq üçün işləməyə çağırırıq” - deyə bildirən təşkilat prezidentinin bəyanatı tamamilə iftiradan ibarətdir. Deyir ki, onlar Ermənistanın taleyindən narahatdır, guya Azərbaycan Ermənistana qarşı belə addım ata bilər.
Son günlər Ermənistan mediası da, ermənilərin xaricədki havadarları da bu “hücum ehtimalından” çox danışırlar. Hücum edən də, təxribat törədən də Ermənistandır. Ortada fal yox, yumurta yox, amma bunlar “hadisədən” danışır. Ermənistana kim hücum edir ki, bunlar çay görməmiş çırmanırlar?
“Bu təşkilatın prezidentində azacıq obyektivlik olsaydı, işğalçının Ermənistan olduğunu deyərdi, qeyri-obyektivdir ki, Azərbaycana böhtan atır”
“Səs” Media qrupunun rəhbəri Bəhruz Quliyev “Bakı-Xəbər”ə şərhində “Freedom House təşkilatı Azərbaycana qarşı qərəzli mövqe tutduğunu müstəqilliyimizdən keçən bu 32 ildə çox sübut edib. Onların verdikləri bəyanatlar və səsləndirdikləri fikirlər hər zaman Azərbaycan əleyhinə olub. Bu gün Freedom House təşkilatının prezidenti Qarabağda ermənilərin yaratdığı şouya dəstək verərək süni “humanitar böhran”la bağlı çıxış edib. Lakin unudulan bir nüans var ki, Azərbaycan öz ərazisi daxilində iş görür, heç bir böhrandan söhbət gedə bilməz və sülh danışıqlarına getməyə də daim hazırdır. Rəsmi formada da bütün danışıqlarda Azərbaycanın sülhün tərəfində olduğu dilə gətirilib. Müharibədən keçən müddət ərzində sülh müqaviləsinin hələ də imzalanmamasına tək səbəbkar Ermənistandır. Hətta cənab Prezident də dəfələrlə çıxışı zamanı qeyd edib ki, Azərbaycan vətəndaşlığını qəbul edəcək ermənilər də digər etniklər kimi ərazilərimizdə firəvan həyat sürəcəklər. Azərbaycan multikultural ölkə olaraq ərazisində yaşayan bütün etniklərin hüquqlarını müdafiə edir.
Freedom House-nin prezidentinin Ermənistanın mövqeyindən çıxış etməsi və Azərbaycana qarşı qərəzli fikirlər bildirməsi təsüdi deyil. Çünki bu təşkilat hər zaman yeri gəldi gəlmədi haqsız yerə Ermənistanı müdafiə edib. Freedom House təşkilatı bizə qarşı qərəzli mövqeyini kənara qoyub, Azərbaycanda gedən proseslərə, insan hüquqlarının qorunmasının prioritet hesab edilməsinə obyektiv baxmalıdır” - deyə bildirdi.
B.Quliyev əlavə etdi ki, yalnız bu zaman Azərbaycan həqiqətlərini görə bilər, əks təqdirdə hər zamankı kimi yenə də bizə qarşı qərəzli münasibət sərgiləyəcək: “Bu isə bir beynəlxalq təşkilatın aqressiyasının fırtınasıdır. Bu təşkilatın prezidentində azacıq da olsa obyektivlik olsaydı işğalçının Ermənistan olduğunu deyərdi, qeyri-obyektivdir ki, Azərbaycana qarşı böhtan atır”.
İradə SARIYEVA
