Rusiya Prezidenti Vladimir Putin bəyan edib ki, Azərbaycanın mövqeyi Qarabağla bağlı bütün məsələlərin Bakı ilə Moskva arasında ikitərəfli əsasda həll edilməsindən ibarətdir.
Putin Vladivostokda keçirilən Şərq İqtisadiyyat Forumunun plenar iclasında çıxışı zamanı bildirib ki, Ermənistan rəhbərliyi Bakının Qarabağ üzərində suverenliyini rəsmi olaraq tanıdıqdan sonra Azərbaycan Prezidenti açıq şəkildə Qarabağın statusu məsələsinin həll olunduğunu bəyan edir: “Azərbaycan və Ermənistan liderləri bunu Praqa bəyanatında, kağız üzərində qeyd ediblər. İndi mənə Azərbaycan Prezidenti İlham Əliyev deyir ki, Ermənistan Qarabağın bizim olduğunu tanıyıb, Qarabağın statusu məsələsi daha gündəmdə deyil, o həll olunub, Ermənistan rəhbərliyi bu barədə açıq şəkildə bəyan edib, 1991-ci il Azərbaycan SSR-in sərhədləri daxilində bütün əraziləri və rəqəmi açıqlayıb, hansı ki, bura Qarabağın ərazisi də daxildir. Bu baş verib və bu, bizim qərarımız deyil. Bu, bugünkü Ermənistan rəhbərliyinin qərarıdır. Əgər belədirsə, bizə deyirlər ki, əgər siz Qarabağla bağlı nə iləsə məşğul olmaq istəyirsinizsə, o zaman bizimlə ikitərəfli əsasda (Bakı ilə Moskva arasında) həll etməlisiniz. Onda biz nə deməliyik? Əgər Ermənistan özü Qarabağın Azərbaycanın bir hissəsi olduğunu tanıyıbsa, burada daha deməyə söz yoxdur”.
Putinin dediyindən belə çıxdı ki, Qarabağla əlaqəli nə məsələlər olacaqsa, bura Ermənistanın müdaxilə şansı sıfıra bərabərdir. Yəni, bununla bağlı məsələlər Rusiya və Azəərbaycan arasında həll olunacaq.
Maraqlıdır, Qarabağla əlaqəli Rusiyanın və Azərbaycanın ikitərəfli formatda həll etməli, həll edə biləcəkləri hansı məsələlər qalıb?
“Putin dedi ki, Azərbaycan Qarabağda etnik təmizləmə siyasəti aparmaq fikrində deyil”
Sözügedən məsələyə aydınlıq gətirən sabiq millət vəkili, hüquqşünas Qulamhüseyn Əlibəylinin fikrincə, bizim Rusiya ilə həll ediləsi yalnız bir məsələmiz qalıb: “Bizim Rusiya ilə həll ediləsi məsələmiz yalnız sülhməramlıların Qarabağdan çıxarılması ilə bağlıdır. Bu, artıq Qarabağla bağlı olan bir məsələ deyil, amma Qarabağla əlaqəli olan bir məsələdir. Çünki Qarabağ Azərbaycanın suveren ərazisidir və bunu bütün dünya tanıyıb. Bu isə o deməkdir ki, Qarabağda qayda-qanun yaratmaq, suverenliyimizi bərpa etmək Azərbaycanın öz işidir. Bunu kiminləsə müzakirə etməyə borclu deyilik. Üstəlik, Putin dedi ki, Azərbaycan Qarabağda etnik təmizləmə siyasəti aparmaq fikrində deyil. Putin bunu etiraf etdiyinə görə, o zaman biz Rusiya ilə əlavə nəyi müzakirə etməliyik ki? Azərbaycanın Qarabağda apardığı işlərə mane olan birinci növbədə Rusiyadır. Bu baxımdan hesab edirəm ki, Putinin Vladivostokda keçirilən Şərq İqtisadiyyat Forumunun plenar iclasında çıxışında səsləndirdiyi fikirlər daha çox Ermənistan hakimiyyətinə təzyiq xarakteri daşıyır. Putin erməni cəmiyyətini Paşinyana qarşı qaldırır. Çünki onun istəyi odur ki, revanşistlər yenidən hakimiyyətə gəlsinlər və Ermənistanda Rusiyaya bağlı marionet bir rejim qurulsun. Digər tərəfdən biz nəzərə almalıyıq ki, Putin nə desə də Qarabağdakı rus ordusu boş dayanmır. Separatçıları silahlandırır, təlimatlandırır. Rusiya faktiki olaraq son 3 ildə Ermənistanla yox, separatçılarla işləyir. Ona görə də hesab edirəm ki, Azərbaycan Qarabağla bağlı digər məsələləri Rusiya ilə müzakirə etməməlidir. Uyğun məqamda anti-terror əməliyyatları keçirib Qarabağı separatçılardan təmizləməlidir. Ən başlıcası isə 2025-ci ilin dekabrında rus sülhməramlılarının Qarabağdan çıxmasını təmin etməlidir”.
Vidadi ORDAHALLI
