Bosniya və Herseqovinanın “Srebrenitsa və Jepa Anklavları Anaları” Assosiasiyasının üzvü, Bosniya və Herseqovinanın İslam Cəmiyyətinin Media Mərkəzinin jurnalisti, “Preporod” qəzetinin redaktoru Ayşə Hafizoviç Hacimeşiç Meşəlidə törədilmiş vəhşiliklər barədə açıqlama verib:
"Erməni terrorunun qurbanları tərəfindən yazılan məktubu oxuduqdan sonra demək istəyirik ki, biz onların ədalət uğrunda apardıqları mübarizəni dəstəkləyirik. Sülh və ədalət üçün çağırış bizim ümumi çağırışımızdır. Bu gün biz Azərbaycandakı dostlarımızın ədalətə çağırış mesajını dəstəkləyirik, çünki ədalət olmadan sülh mümkün deyil. Keçmişdə törədilmiş vəhşiliklərə göz yumulmamalı və onları törədənlər ədalət qarşısında cavab verməlidir. Bəşəriyyətin gələcəyi üçün zəruri olan ədalət naminə səylərimizi birləşdirməliyik ki, belə vəhşiliklər bir daha törədilməsin”.
Ceyhun Musaoğlu: "Beynəlxalq ictimaiyyət ermənilərin nə kimi vəhşiliklər törətdiyini bilməlidir"
Mövzu ilə bağlı fikir bildirən Jurnalist Ekspert Mərkəzi İctimai Birliyinin sədri Ceyhun Musaoğlu "Bakı-Xəbər"ə açıqlamasında qeyd etdi ki, birinci və ikinci Qarabağ müharibələrində ermənilərin törətdiyi vəhşiliklər qalın kitablara belə sığmaz: "Xüsusən də soyqırıma məruz qalan kənd və şəhərlərimiz haqqında danışanda insan dəhşətə gəlir. Xocalı rayonunun Meşəli kəndində ermənilərin dinc əhaliyə etdiyi vəhşiliklər dünya mətbuatının da diqqətindədir. Beynəlxalq aləm bilməlidir ki, biz hansı dəhşətli vəziyyətlə üz-üzə qalmışıq. Azərbaycan işğal altında olan torpaqları azad edib. Danılmaz faktdır ki, Azərbaycan tərəfi sülhün yaranması uğrunda ciddi mübarizə aparır".
Həmsöhbətimiz onu da əlavə etdi ki, terrorist, cinayətkar Vaqif Xaçaturyan həbs olunduqdan sonra Meşəli soyqırımı məsələsi yenidən gündəmə gəlib. Daxili media ilə yanaşı, dünya mətbuatı da bu məsələni diqqətdə saxlayır. Ümumiyyətlə, bu faktlar xarici medianın da gündəmindən düşməməlidir. Materiallar hazırlanmalı, müxtəlif dillərə tərcümə edilərək yayımlanmalıdır: "Meşəli faciəsinin şahidləri də açıqlamalarında nələr yaşadıqlarını dilə gətiriblər. Onların açıqlamaları da xarici dillərə tərcümə edilərək yayımlanmalıdır. Beləliklə, beynəlxalq ictimaiyyət ermənilərin nə kimi vəhşiliklər törətdiyini bilməlidir".
Hacıbəy Heydərli: "Bu günlərdə Bosniya və Herseqovina mətbuatında bu soyqırım haqqında silsilə məqalələrin yayımlanması təsadüfi deyil, çünki..."
"Azxeber.com" portalının baş redaktoru, Mətbuat Şurasının İdarə Heyətinin üzvü Hacıbəy Heydərli "Bakı-Xəbər"ə açıqlamasında qeyd etdi ki, 1991-ci ilin dekabrında Xocalı rayonunun Meşəli kəndində, 1992-ci il 26 fevral tarixində Xocalıda ermənilər tərəfindən törədilən soyqırımlar bəşər tarixinin ən dəhşətli faciələrindəndir. Azərbaycan uzun illər bu soyqırımın dünya birliyi tərəfindən tanıdılmasına çalışıb və bununla bağlı uzun illər kampaniya aparıb. Ancaq çox təəssüf ki, dünya birliyi bugünə qədər Meşəli soyqırımına səssiz qalıb: "Necə deyərlər, həqiqət və ədalət topaldır, ancaq yeriyər. Bu günlərdə Meşəli soyqırımını törədənlərdən biri olan Vaqif Xaçaturyanın həbsi yenidən bu məsələni gündəmə gətirdi. Artıq bütün dünyaya bəllidir ki, Vaqif Xaçaturyanın dəstəsi Meşəlidə sakinlərə olmazın işgəncələr verib, insanlığa sığmayan qətliam və vəhşiliklər törədiblər. Dünya mediası bu məsələni araşıdırıb, geniş yazılar yayımlayır. Xüsusən bu günlərdə Bosniya və Herseqovina mətbuatında bu soyqırım haqqında silsilə məqalələrin yayımlanması təsadüfi deyil. Çünki Bosniya və Herseqovina da Azərbaycan kimi soyqırım yaşayan ölkələrdəndir və bu acının nə olduğunu gözəl anlayırlar. Bosniya və Herseqovinada insanlığa qarşı törədilən cinayətlərin qurbanı olan Srebrenitsa soyqırımının qurbanları Meşəli soyqırımı qurbanlarının ağrısını hiss edirlər".
H.Heydərli hesab edir ki, bu cinayətləri törədən bütün canilər məhkəmə qarşısına çıxarılmalı və cavab verməlidirlər. Dünya birliyi gələcəkdə belə soyqırımların təkrarlanmaması üçün bir olmalı və soyqırım törədənləri lənətləməlidir: "Azərbaycan media nümayəndləri, QHT-lər də bu məsələdə aktiv olmalıdır və Meşəli soyqırımı haqda həqiqətlərin dünya mediasında yayılmasına yardımçı olmalıdır. Müharibə bitsə də informasiya müharibəsi davam edir, bu savaşda heç bir halda arxayınlaşmaq olmaz. Dünya birliyi Xaçaturyan kimi caniləri tanımalı və soyqırım törədən hər kəsin beynəlxalq hüquq qarşısında cavab verməsini tələb etməlidir".
Günel CƏLİLOVA
