Qarabağda yaşayan ermənilərlə bağlı Prezident İlham Əliyevin fikirləri və bəyanatları bütün dünyaya məlumdur. Əliyev dəfələrlə bəyan edib ki, Qarabağdakı ermənilər ya Azərbaycan vətəndaşlığını qəbul etməli, ya da özləri üçün başqa yaşayış yeri tapmalıdırlar.
Onu da qeyd edək ki, bizim vətəndaşlığımızı qəbul etdikləri halda Azərbaycan dövləti Qarabağda yaşayan erməni azlığın hüquqlarını da digər Azərbaycan vətəndaşları ilə bərabər şəkildə təmin edəcək. Əliyevin 44 günlük müharibədən sonra Qarabağdakı ermənilərə ünvanladığı mesajlar artıq nəticələrini verməkdədir. Belə ki, Qarabağda yaşayan erməni azlığın nümayəndələri rəsmi Bakıya müraciətlər edib vətəndaşlığı qəbul etmək istədiklərini bildirirlər.
Dilarə Əliyeva adına Azərbaycan Qadın Hüquqlarını Müdafiə Cəmiyyəti nəzdində fəaliyyət göstərən “Qadın: Sülh və Təhlükəsizlik Mərkəzi”nin rəhbəri Dilarə Əfəndiyeva “Qarabağda yaşayan erməni sakinlər üçün yaradılmış “Qaynar xətt”ə 100-ə yaxın müraciət daxil olub” deyib. Onun sözlərinə görə, Bakıya zəng edən ermənilər arasında Rusiya sülhməramlılarından şikayətlənənlər də olub. Belə ki, bəzi erməni sakinlər “Qaynar xətt”ə zəng edərək, rusiyalı hərbçilərin onlardan rüşvət aldığını bildiriblər. Bundan əlavə, bir çox ermənilər Azərbaycan vətəndaşlığını qəbul etmək istədiklərini deyiblər. “Əvvəlki aylarda “Qaynar xətt”imizə 100-ə yaxın müraciət daxil olub. Ermənilər, əsasən, Azərbaycan vətəndaşlığına keçməklə bağlı müraciət edirlər. Onlar soruşurlar ki, Azərbaycan vətəndaşlığına necə keçmək olar, vətəndaşlıq aldıqdan sonra onların hansı hüquqları təmin olunacaq. Bir də onlardan rüşvət istənilməsi barədə bizə müraciətlər edilib. Ermənilər Laçın yolundan keçmək üçün Rusiya sülhməramlılarının onlardan rüşvət istədiyini diqqətə çatdırıblar", - deyə Dilarə Əfəndiyeva vurğulayıb.
Məlumata görə, ötən il dekabrın 16-da Azərbaycanda Qarabağ erməniləri üçün “Qaynar xətt” yaradılıb. Belə təşəbbüslə Dilarə Əliyeva adına Azərbaycanın Qadın Hüquqlarını Müdafiə Cəmiyyəti nəzdində fəaliyyət göstərən “Qadın: Sülh və Təhlükəsizlik Mərkəzi”nin rəhbəri Dilarə Əfəndiyeva çıxış edib. Qarabağ bölgəsindən “Qaynar xətt”ə müraciət edənlərin məxfiliyinə tam zəmanət verilib
“Görünən odur ki, onların müəyyən hissəsi Azərbaycan Prezidentinin çıxışlarından, çağırışlarından nəticə çıxarmağa başlayır”
Ermənilərin Azərbaycan vətəndaşlığını qəbul etmək istəyinə şərh verən Azad Vətən Partiyasının sədri Akif Nağı “Bakı-Xəbər”ə açıqlamasında “Xankəndidə və Qarabağın müəyyən yerlərində yaşayan ermənilərin yenidən Azərbaycan vətəndaşlığına qayıtmaq istəyi normal hesab edilməlidir. Bu gün Qarabağda yaşayan ermənilər arasında Azərbaycan vətəndaşı olmaq istəyənlər var. Bu təbiidir. Hazırda Qarabağda yaşayan ermənilər arasında ciddi parçalanma mövcuddur, onlar arasında Azərbaycana qarşı “radikal”, “barışmaz” mövqedə, bu oyunun iştirakçısı və qurbanı olanlar da var. Amma əksini düşünənlər və separatçılardan canını qurtarmaq istəyənlər də yox deyil. Onlar dərk edirlər ki, Azərbaycanın gücü qarşısında edəcəkləri bir şey yoxdur. Onlar separatçıların girovluğundan azad olmaq üçün Azərbaycana vətəndaşlıq üçün müraciət edirlər. Bunu da normal qəbul etmək lazımdır”-deyə bildirdi.
A.Nağının fikrincə, biz ermənilərin vətəndaşlıqla bağlı müraciətlərinə çox diqqətlə yanaşmalıyıq, çünki onlar arasında çoxlu sayda insan var ki, Azərbaycana qarşı müxtəlif cinayətlərdə iştirak edib. A.Nağı hesab edir ki, cinayətkarlara, əli Azərbaycan xalqının qanına batan insanlara güzəşt edilməməlidir və onlar cəzalarını çəkməlidir. Ermənilərdən hər zaman pislik gördüyümüzü xatırladan A.Nağı qeyd edir ki, müraciət edən ermənilərin hər biri haqda araşdırma aparılmalıdır, onların hansısa cinayətdə iştirak edib-etmədiyi, yaxud hansısa təxribatlarda iştirak edə biləcəyi məsələləri həssaslıqla yoxlanılmalıdır. “Gördünüz ki, Xaçaturyan Laçın postundan keçəndə saxlanıldı, onun cinayətləri üzə çıxdı. Onun kimi özünü “sadə erməni” kimi qələmə verən cinayətkarlar çoxdur. Belələri Azərbaycan vətəndaşlığını qəbul etsələr belə, bağışlanmamalıdırlar, ədalət məhkəməsi qarşısında cavab verməlidirlər.
Amma bütövlükdə Qarabağda yaşayan ermənilərin Azərbaycan vətəndaşlığını qəbul etmək istəyi onu göstərir ki, onlar bu addımı mütləq atmalıdırlar. Digər tərəfdən beynəlxalq təşkilatlar da bu məsələdə maraqlı olduqlarını, oradakı ermənilərin daxili inteqrasiyasının, dialoqun tərəfdarı olduqlarını deyirlər. Beynəlxalq təşkilatları da bu barədə məlumatlandırmaq lazımdır ki, ermənilər Azərbaycanın etdiyi jesti, güzəşti dəyərləndirməlidirlər.
Bu gün orada “təhlükəsizlik” və s. məsələlərlə bağlı hay-küy salırlar. Azərbaycan Prezidenti də bu məsələdə mövqeyini ortaya qoydu ki, onlar üçün əlavə imtiyazlar, status olmayacaq, digər azsaylı xalqlar kimi onlar da bizim vətəndaşlarımız kimi yaşayacaqlar, Azərbaycan vətəndaşlarının mövcud hüquqlarından yararlana biləcəklər, onlara xüsusi yanaşma olmayacaq. Görünən odur ki, onların müəyyən hissəsi Azərbaycan Prezidentinin çıxışlarından, çağırışlarından nəticə çıxarmağa başlayır”-deyə A.Nağı vurğuladı.
İradə SARIYEVA
