Putin Paşinyanın hadisələrə "ünvanlı münasibət" istəyinə nə cavab verdi…
Erməni tərəfinin təşəbbüsü ilə Rusiya Prezidenti Vladimir Putin və Ermənistan Baş naziri Nikol Paşinyan arasında telefon danışığı olub. Bu barədə Kremlin mətbuat xidməti məlumat yayıb.
Telefon danışığında Rusiya, Ermənistan və Azərbaycan liderləri arasında 2020-2022-ci illərdə bütün məlum sazişlər kompleksinin həyata keçirilməsinin praktiki aspektləri, o cümlədən Ermənistan-Azərbaycan sərhədində sabitliyin və təhlükəsizliyin təmin edilməsi, iqtisadi və nəqliyyat əlaqələrinin bərpası üzrə addımlar, Ermənistanla Azərbaycan arasında sülh müqaviləsi hazırlığı məsələləri nəzərdən keçirilib.
Qarabağ mövzusu ətrafında mövcud vəziyyətin müzakirəsi zamanı Vladimir Putin bütün məsələlərin konstruktiv şəkildə, tərəflər və Rusiya sülhməramlıları arasında sıx təmasın və qarşılıqlı fəaliyyət şəraitində həllinin vacibliyini vurğulayıb.
Paşinyan isə martın 5-də Qarabağda baş verən insidentlə bağlı Putindən ünvanlı reaksiya verməyi tələb edib. O bilir ki, Putin belə reaksiya verməyəcək. Belədirsə, niyə Putindən bunu tələb edir?
Politoloq Yeganə Hacıyeva “Bakı-Xəbər”ə açıqlamasında bildirdi ki, Nikol Paşinyan və onun komanda üzvlərinin son zamanlar verdiyi mesajlar bir neçə istiqamət üzrədir: “Onların heç bir açıqlamaları sülh və problemlərin həlli istiqamətinə yönəlməyib. Əksinə, çalışırlar ki, mövcud şərti olduğu kimi saxlasınlar. Eyni addımları işğal allərində də atırdılar. Beynəlxalq hüquqla qəbul olunmuş şərtləri pozmaqla olsa belə, Ermənistanın istək və arzularını yerinə yetirməyə çalışırlar. Ermənistanın xarici siyasətində Cənubi Qafqazda uğur qazanmaqla bağlı yalan təqdimatlar gedir. Birinci seçkiyə kimi Paşinyan özünü sakit aparırdı. Elə ki, seçildi, sonra digər mahnıları oxumağa başladı. Ukraynada Rusiyanın üzləşdiyi çətinlikdən mıharətlə istifadə edir. Ermənista və Rusiya münasibətlərinin xarakterinə yad olan ritorikalardan istifadə edir. Bir neçə məqsədi güdür. Özünü Rusiya prezidentindən hesab soracaq gücdə olan adam kimi publikaya təqdim edir. Dünyaya göstərməyə çalışır ki, onun Putinlə münasibətləri gərgindir və həmin ölkənin Cənubi Qafqazdakı addımlarına qarşıdır. Bu, proseslərin üzdə olan tərəfidir. Bir də proseslərin real konstatasiyası var. Bu nədir? Rusiya bu coğrafiyada Ermənistanın ən böyük hırbi-siyaso müttəfiqifir. Hazırda həmin ölkənin ərazisində Rusiyanın hərbi bazaları var. Rusiya Avropanın sanksiyalarından Ermənistandakı şirkətlər vasitəsilə yayınır. Bunları da Nikol Paşinyanın ətrafındakı biznes dairələri edir. Cənubi Qafqazdakı siyasi, təhlükəsizlik, hərbi anlamda indekslərin çoxu Rusiya ilə Ermənistanın arasında hər hansı problemin olmadığını göstərir. Bu mərhələdə Putinlə belə danışmaq yalnız imitasiya sayıla bilər. Diqqəti əsl mövzudan yayındırırlar”.
Rəsmi İrəvan son illərdə Rusiya ilə münasibətləri korlasa da, “müdafiə çətiri”nin altına sığınmağa can atdığı ABŞ və Qərbin geopolitik maraqlarında yer almağı da bacarmayıb. Yəni Rusiyadan qaçan Ermənistan hərbi müttəfiq alternativi yaratmağa nail olmayıb.
Deməli, belə vəziyyətdə Ermənistanın yalnız bir alternativi qalmış olur. Belə ki, indi rəsmi İrəvan Azərbaycanla anlaşmağa və yekun sülh sazişini imzalamağa hər zaman olduğundan daha çox möhtacdır.
Məhəmmədəli QƏRİBLİ
