“Hələ ki, əsas diqqət Çindən, Mərkəzi Asiyadan Xəzər dənizi vasitəsilə Avropaya yüklərin daşınmasına yönəlib, lakin biz, həmçinin yüklərin əks istiqamətdə daşınması barədə düşünməliyik”. Bunu Prezident İlham Əliyev Davos Dünya İqtisadi Forumu çərçivəsində keçirilən “Avrasiya Orta Dəhlizi: Yoldan magistrala” mövzusunda panel iclasında deyib.
Ölkə başçısının sözlərinə görə, bütün iştirakçı ölkələrin – Mərkəzi Asiya, Azərbaycan, Gürcüstan, Türkiyə, avropalı tərəfdaşların daxil olduğu rəhbər komitə, bir növ idarə heyəti, o cümlədən bütün nəqliyyat infrastrukturu yaradılmalıdır: “Yeni layihələr var, məsələn, Çinin təşəbbüsü ilə başlayan Çin-Qırğızıstan-Özbəkistan dəmir yolu layihəsi var ki, bu da nəticə etibarilə Xəzər dənizinə və ardınca bizim istiqamətimizə gəlib çıxacaq. Həmçinin nəqliyyat və Şərq-Qərbin üstünlükləri üzərində işləməklə yanaşı, Qərb-Şərq də mühüm əhəmiyyət kəsb edir. Hələ ki, əsas diqqət Çindən, Mərkəzi Asiyadan Xəzər dənizi vasitəsilə Avropaya yüklərin daşınmasına yönəlib, lakin biz, həmçinin, yüklərin əks istiqamətdə daşınması barədə düşünməliyik. Buna nail olmaq üçün, əlbəttə ki, əks istiqamətdə biznes mühiti də bizim hədəflərimizə uyğun gəlməlidir”.
“Bunun üçün iştirakçı ölkələr səylərini artırmalı, nəqliyyat xətlərini modernləşdirməlidir”
Məsələyə münasibət bildirən millət vəkili Vüqar Bayramovun sözlərinə görə, Azərbaycan və bütövlükdə ölkəmizin yerləşdiyi region beynəlxalq yükdaşımalar baxımından ciddi üstünlüklərə malikdir: “Nəzərə alsaq ki, Rusiya-Ukrayna müharibəsi bu müqayisəli üstünlükləri daha da artırıb, o zaman yeni imkanlar yaranır. Bu da nəticə etibari ilə Azərbaycan üzərindən daşınan yüklərin həcminə birbaşa təsir göstərir. Nəzərə alsaq ki, ötən il Azərbaycan üzərindən daşınan yüklərin həcmində 30 faiz artım qeydə alınıb, bu artıq yeni infrastrukturun yaradılmasını zərurətə çevirir. Yəni, məhz beynəlxalq yükdaşımalar baxımından çox vacib hesab olunur. O baxımdan xüsusən Çinin Mərkəzi Asiya ölkələrində reallaşdırdığı layihələrə Azərbaycanın qoşulması həm də sözügedən layihələrin əhəmiyyətini artırır. Digər tərəfdən bu, strateji təsirlərin gücləndirilməsi baxımından vacib hesab olunur. Nəticə etibari ilə nəzərə alsaq ki, Azərbaycan infrastrukturunu son illər ciddi şəkildə inkişaf etdirib. Həmçinin, Ələt Dəniz Limanının ötürmə qabiliyyətinin 15 milyon tondan 25 milyon tona çatdırılması, Bakı-Tbilisi-Qars dəmir yolunun ötürmə qabiliyyətinin 1 milyon tondan 5 milyon tona çatdırılması gündəmdədir, o zaman niyə də əks istiqamətdə yüklər daşınmasın? Bəli, bütün bu potensial imkan verir ki, Avropadan Çinə də yüklərin daşınmasına başlanılsın. Bunun üçün iştirakçı ölkələr səylərini artırmalı, nəqliyyat xətlərini modernləşdirməlidir. Belə olarsa, bu, nəqliyyat-logistik layihələrin daha uğurla reallaşmasına, rentabelliyin artmasına müsbət təsir göstərəcək. Nəticədə Azərbaycan yükdaşımalarda regional haba çevriləcək. Ona görə də hesab edirəm ki, Prezident İlham Əliyevin bununla bağlı səsləndirdiyi fikirlər reallığı əks etdirir. Azərbaycanın bununla bağlı potensialı böyükdür”.
Vidadi ORDAHALLI
