Azərbaycanın inkişafını, ölkəmizdə mövcud sabitliyi və tolerant mühiti gözü götürməyən bəzi dairələr müxtəlif vasitələrdən istifadə edərək ölkəmizdə vəziyyəti gərginləşdirməyə can atırlar.
Ölkəmiz mühüm hadisələr astanasında olanda onlar xüsusilə "fəallaşır", çirkin niyyətlərini həyata keçirmək üçün müxtəlif yollara əl atırlar. Bu gün problemlər içində üzən, insan haqları pozuntusuna, dini, irqi ayrıseçkiliyə görə "rekord" göstəricilərə malik olan Qərb təsisatıarı öz ayıbına göz yumaraq, müəyyən bəhanələr irəli sürməklə müstəqil ölkələrin daxili işlərinə müdaxilə edir, sabit cəmiyyətlərdə xaos yaradır. Ancaq bunların heç bir faydası yoxdur və onlar tərəfindən ortalığa atılan iyrənc hərəkətlərdir. Diqqətlə araşdırılarsa, bütün bu fəaliyyətlərin arxasında erməni lobbisi, diasporası və digər anti-Azərbaycan qüvvələr dayanır. Onlar Azərbaycanı güclü dövlət kimi görmək istəmirlər, cəmiyyətimizi xaos və anarxiyaya sürükləməyə çalışırlar. Belə hərəkətlər xalqımız tərəfindən rədd edilir. Çox təəssüf ki, onların yaratdığı bu mexanizm hələlik işləyir. Bu başqa dövlətlərin daxili işlərinə qarışmaqdır. Hesab edirəm ki, bunun çıxış yolu əks zərbələr olmalı və faktlar ortaya çıxarılmalıdır.
Problemin həll olunmasına dair bir təklif verməsələr də, ən azından neytrallığı qorumalı idilər
Azərbaycanda insan hüquq və azadlıqları ilə bağlı mükəmməl qanunlar və mühit mövcuddur. Ancaq təəssüflər olsun ki, bir çox xarici dairələr məhz bu adlarla ölkəmizə təzyiqlər göstərməyə çalışırlar. Bunların neytrallaşdırılması üçün vətəndaşlarımızın sosial və siyasi fəallığının artmasının nə kimi önəmi var?
Beynəlxalq Diaspor Mərkəzinin rəhbəri İsmayıl Ağayev “Bakı-Xəbər”ə açıqlamasında bildirdi ki, Qərb ölkələri bu illər ərzində Azərbaycanla münasibətdə qeyri-səmimi oldular: “Azərbaycana qarşı ikili standart siyasətini apardılar. Bizim torpaqlarımız işğalda olan dövrdə Azərbaycana qarşı düzəlişlər, qərarlar və digər sənədlər qəbul olunmuşdu. Misal üçün, ABŞ 907-ci Düzəlişi niyə qəbul etmişdi və niyə bugünə qədər ləğv etməyib? Fransa da eyni ilə. Bu ölkələr ATƏT-in həmsədr ölkələridir. Bunlar problemin həll olunmasına dair bir təklif verməsələr də, ən azından neytrallığı qorumalıydılar. Bunu biz görmədik. Əksinə, erməni mövqeyindən çıxış etdilər. Fransa, ümumiyyətlə, Vətən müharibəsində açıq şəkildə Ermənistanı müdafiə etdi. Və bugünə qədər erməniləri dəstəkləyir. Qərb ölkələri bu illər ərzində Azərbaycanla münasibətdə qeyri-səmimi oldular”.
Qərb demokratiya və insan haqları məsələsində də qeyri-səmimidir
BDM sədrinin sözlərinə görə, Qərb üçün, məsələn, 100 il ərzində oturuşmuş demokratik quruluşa malik Türkiyə deyil, işğalçı və terror ölkəsi olan Ermənistan daha yaxındır: “Beynəlxalq güclərin və Qərb dairələrinin 44 günlük Vətən savaşındakı davranışı, sərgilədiyi mövqe və ümumiyyətlə, Qərbin demokratik dəyərlərə bu şəkildə baxışı, tətbiq etdiyi ikili standartlar istər-istəməz təkcə bizdə deyil, bir çox dünya insanında demokratik dəyərlərə olan inamın azalmasına gətirib çıxarır".
Nəticə etibarilə, Avropadakı müəyyən dairələr nəzərə almalıdırlar ki, Azərbaycanın öz inkişaf yolu var və ölkəmiz hər hansı bir qurum və ya ölkədən asılı deyil, müstəqil siyasi iradə əsasında daxili və xarici strateji kursunu davam etdirir. Qərbin müxtəlif təşkilatlarında ölkəmiz əleyhinə qərəzli dinləmələrin keçirilməsi, müxtəlif bəyanatların verilməsi kimi cılız vasitələr isə təsir qüvvəsinə malik deyil. Çünki müstəqil siyasət həyata keçirən Azərbaycan bütün hallarda öz inkişaf yolunda irəliləyir və anti-Azərbaycan dairələrin bu cür neqativ cəhdləri iflasa məhkumdur. Eyni zamanda, belə manipulyasiyalarla ölkəmizdə ictimai rəyə neqativ təsir etmək və Azərbaycanın beynəlxalq nüfuzuna xələl gətirmək mümkün deyil. Bu səylər nə Azərbaycanın beynəlxalq mövqeyinə, nə də uğurlu xarici siyasətinə təsir edə bilər. Yaxşı olar ki, regional güc mərkəzi kimi çıxış edən Azərbaycana qarşı adekvat yanaşma ortaya qoyulsun, bərabərhüquqlu əməkdaşlıq və qarşılıqlı hörmət prinsiplərinə əməl edilsin. Prezidentimizin bildirdiyi kimi: “Azərbaycanla diktat dili ilə danışmaq olmaz, Azərbaycanla dost, tərəfdaş olmaq olar. Biz buna hazırıq və gələcəkdə bax bu istiqamətdə gedəcəyik”.
Adekvat yanaşmanın biri də ölkə vətəndaşlarının sosial-siyasi aktivliyindən keçir. Yalnız belə olan halda həmin dairələrin xəbis təbliğatı nəticə verməmiş qalacaq. Xüsusilə də gənclərin bu istiqamətlər üzrə fəal olması olduqca vacibdir.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
