AXC-Müsavat hökuməti Kəlbəcəri sonadək qoruya bilsəydi... - Sonrakı ərazi işğalları olardımı...
“...Əlbəttə, bu münaqişə Azərbaycan Xalq Cəbhəsi hakimiyyətinin acı mirasıdır. Çünki məhz onların xəyanətkar fəaliyyəti nəticəsində torpaqlarımız işğal altına düşüb. Bunu hər kəs bilməlidir. Şuşanın işğalı böyük faciə idi. O vaxt Azərbaycanda hakimiyyət uğrunda mübarizə gedirdi. Azərbaycan Xalq Cəbhəsi istənilən yollarla hakimiyyətə gəlmək istəyirdi. O, əvvəlki hakimiyyəti yıxmaq üçün ən çirkin, ən xəyanətkar əməllərə əl atdı, Şuşanı ermənilərə təhvil verdi. Hərbçilər yaxşı bilirlər, Şuşa alınmaz qaladır. Onu almaq mümkün deyil. Onu təhvil verdilər, satdılar ki, hakimiyyəti yıxsınlar, hakimiyyətə gəlsinlər. Əfsuslar olsun ki, belə də oldu. 1992-ci ilin mayında Şuşa və Laçın işğal edildi, Xalq Cəbhəsinin dəstələri qanunsuz yollarla hakimiyyətə gəldi. Ondan sonra nə etdilər? Ondan sonra ölkəmizi dağıtmağa başladılar. İşğal edilmiş torpaqlar qaldı bir yana, onlar isə talançılıqla, rüşvətxorluqla, oğurluqla məşğul idilər, kabelləri kəsib satırdılar. Kütləvi talançılıq baş alıb gedirdi. Nəticədə bir tərəfdən xalq buna dözmədi, digər tərəfdən 1993-cü ilin aprelində Ermənistan Kəlbəcəri işğal etmişdi. Qanunsuz yollarla hakimiyyətə gəlmiş həmin xəyanətkar Azərbaycan Xalq Cəbhəsi hakimiyyəti Kəlbəcəri Ermənistana təhvil verdi və ondan sonra Ermənistanla Dağlıq Qarabağ arasında coğrafi bağlantı yarandı. Artıq gediş-gəliş və silah-sursat, texnika və təchizat başlamışdı. Ondan sonra nə etdilər? Torpaqları müdafiə etmək əvəzinə qardaş qanını axıtdılar, vətəndaş müharibəsini başladılar, Gəncəni bombaladılar. Azərbaycan əsgərlərini əsir götürmüşdülər. Orada torpaqlar əldən gedir, burada bir-birini qırırlar ki, hakimiyyətə gəlsinlər. Məhz bunun nəticəsində torpaqlarımız işğal altına düşdü. Əgər Heydər Əliyev hakimiyyətə gəlməsəydi, bilmək olmur Ermənistan hələ haraya qədər gəlib çıxa bilərdi.
Ona görə bu tarixi hər kəs bilməlidir. Bu işğal Azərbaycan Xalq Cəbhəsinin xəyanətkar və satqın hərəkətlərinin nəticəsidir. Xalq onlara dözmədi, qaçıb getdilər. Buna nə ad vermək olar? Ancaq fərarilik. Prezident fərarilik edib, qaçdı Kələkiyə. Yaxşı, sən Ali Baş Komandansan, ölkə müharibə şəraitindədir. Sən xalqı, dövləti, dövlətçiliyi qorumalısan. Gecə ilə gizlin təyyarəyə minib, uçub Naxçıvana, oradan gedib oturub Kələkidə. Buna nə ad vermək olar? İndi buna bəraət qazandırmaq istəyənlərə üz tutub deyirəm. Nə ad vermək olar buna? Qorxaqlıq, satqınlıq, fərarilik. Başqa ad yoxdur. Hamı da bunu bilməlidir. O birilər nə etdilər? O vaxtkı dövlət katibi indi özünü guya müxalifət adlandırır. Amma o hansı müxalifətdir, Azərbaycan xalqı yaxşı bilir. Onların tərbiyəsi, mərifəti, addımları nədən ibarətdir, indi bütün vətəndaşlar internetdə görürlər”.
Bu fikirləri Müdafiə Nazirliyinin “N” saylı hərbi hissəsinin açılış mərasimində çıxış edən Prezident İlham Əliyev deyib.
Əgər AXC-Müsavat hökuməti Kəlbəcəri qoruya bilsəydi, sonrakı işğalların qarşısını almaq olardımı?
“Səs” qəzeti və eyniadlı informasiya agentliyinin rəhbəri, siyasi icmalçı Bəhruz Quliyev baki-xeber.com-a bildirdi ki, AXC-Müsavat cütlüyünün hakimiyyətə gəldiyi ilk vaxtlara nəzər salanda onların ölkə daxilində həyata keçirdiyi xəyanətkar əməllər, xalqımıza, dövlətimizə, dövlətçiliyimizə qarşı olan addımları hər kəsin xatirindədir. B.Quliyevin vurğuladığına görə, xalq yaxşı bilir və dərk edir ki, bu gün Qarabağdakı torpaqlarımız işğal altındadırsa, bunun bilavasitə baiskarları, günahkarları AXC-Müsavat cütlüyüdür. Müsahibimizin fikrincə, onlar hakimiyyətə yiyələnmək və şəxsi mənfəətlərini qazanmaq üçün hətta bu dərəcədə xəyanətlərə yol veriblər. “Bilirsiniz ki, həmin dövrdə xalqın oyanışını, milli azadlıq hərəkatını onlar öz siyasi məqsədləri üçün istifadə edərək, hətta vətəndaş müharibəsi belə yaratdılar. Bunda məqsədləri yaranmış vəziyyətdən istifadə edərək hakimiyyətə gəlmək idi. Ona da nail oldular. AXC-Müsavat hakimiyyəti ölkənin daxilində bir tərəfdən vətəndaş müharibəsi yaratdı, digər tərəfdən də Azərbaycan torpaqlarının ermənilər tərəfindən işğal edilməsinə rəvac verdi. AXC və Müsavat birliyi xalqa və dövlətçiliyə xəyanətin üzərində hakimiyyəti zəbt etdi. Onlar hakimiyyətə gəldikdən sonra öz hakimiyyətlərinin ömrünü uzatmaq üçün bütün xəyanətlərə əl atdılar. Kadr siyasətindən tutmuş, dövlətin iqtisadi və siyasi maraqlarının nəzərə alınmamasına, dövlət siyasətinin düzgün qurulmamasına qədər böyük problemlər yaratdılar”.
B.Quliyev qeyd etdi ki, antimilli, antidövlətçilik mövqeyindən çıxış edən və bunu hər addımda nümayiş etdirən AXC-Müsavat cütlüyünün yarıtmaz fəaliyyəti və xəyanətkar davranışları nəticəsində Dağlıq Qarabağ və ətraf rayonlar işğal olunmağa başladı. “Torpaqlarımızın da işğal olunmasına rəvac verən AXC və Müsavat hakimiyyəti oldu. Gözlərini hakimiyyət hərisliyi qapamış və hakimiyyəti zəbt etmiş bu cütlük Kəlbəcərin işğalına imkan yaratdı və nəticədə də torpaqlarımız ardıcıl olaraq ermənilər tərəfindən işğal edildi. Cənab Prezident düzgün qeyd etdi ki, AXC hakimiyyəti Kəlbəcəri ermənilərə verməklə Dağlıq Qarabağla Ermənistan arasında bir dəhliz yaratdı. AXC-Müsavat cütlüyünün xəyanəti səbəbindən Kəlbəcərin işğalı nəticəsində yaranan bu dəhliz imkan verdi ki, Dağlıq Qarabağ və onun ətrafındakı rayonlar ermənilər tərəfindən işğal olunsun. Kəlbəcərin, Şuşanın və digər torpaqlarımızın getməsi o dövrkü insanların gözləri qarşısında gedən proses idi. Bu göstərdi ki, onlar öz hakimiyyətlərini qorumaq üçün istənilən xəyanətə əl atırlar. Həmin dövrdə Kəlbəcər müdafiə olunsaydı və AXC-Müsavat hakimiyyətinin xəyanəti nəticəsində ermənilər tərəfindən işğal edilməsəydi, digər ərazilərimizi işğaldan qorumaq mümkün olardı. Amma, gördüyünüz kimi, onlar bunu etmədilər. Başları hakimiyyət davasına, bir-birilə çəkişməyə qarışdığından, onları nə torpaqların işğal edilməsi, nə də dövlətin, xalqın taleyi maraqlandırırdı” - deyə B.Quliyev vurğuladı.
İradə SARIYEVA
