Azərbaycanda könüllülük hərəkatının geniş vüsət alması, tələbə-gənclərin bu sahədə xüsusilə aktivlik göstərməsi müsbət haldır. Azərbaycanda bu hərəkata ciddi dövlət dəstəyi olduğundan, günü-gündən könüllü olan gənclərin sayı artır.
Qeyd edək ki, bir neçə gün əvvəl ölkəmizdə Beynəlxalq Könüllülər Günü münasibətilə Azərbaycan tələbə-könüllülərinin Forumu keçirilib.
Tələbələr arasında könüllülük hərəkatının inkişafına, onların ictimai həyatda fəal iştirakının stimullaşdırılmasına göstərilən dövlət dəstəyi gənclərin bu sahəyə marağını artırır. Azərbaycan Prezidenti İlham Əliyev tərəfindən uğurla həyata keçirilən dövlət gənclər siyasəti böyük nəticələr verir.
Məlum olduğu kimi, Təhsil Nazirliyi tərəfindən reallaşdırılan çoxsaylı layihə içərisində “Bir” Tələbə-Könüllü Proqramının da bu sahədə mühüm yeri var. Məlum olduğu kimi, son illər ölkədə keçirilən beynəlxalq səviyyəli tədbirlərin təşkilində tələbə-könüllülərin fəaliyyəti danılmazdır.
“Bir” Tələbə-Könüllü Proqramı ölkəmizin inkişafında böyük rol oynayan tələbə-könüllülərlə işi sistemləşdirmək, müvafiq fəaliyyəti stimullaşdırmaq üçün yaradılan uzunmüddətli proqramdır və hazırda 26 ali və 18 orta ixtisas təhsili müəssisəsini əhatə edən proqram 23000-dən artıq könüllü bazasına sahibdir.
“Bizim könüllülərin fəaliyyəti bütün beynəlxalq norma və standartlara uyğundur”
Azərbaycan Milli Qeyri-Hökumət Təşkilatları Forumunun prezidenti Rauf Zeyni bizimlə söhbətində bildirdi ki, Azərbaycan dövlət müstəqilliyi əldə etdikdən sonra ölkəmizdə könüllülük fəaliyyəti geniş inkişaf etməyə başlayıb: “Ölkəmiz müstəqillik qazandıqdan sonra hüquqi dövlət və vətəndaş cəmiyyətinin qurulması istiqamətində ulu öndər tərəfindən bir sıra işlərin əsası qoyuldu, işlərə başlandı. Bu dövrdə dövlət quruculuğu ilə yanaşı, vətəndaş cəmiyyəti quruculuğu istiqamətində də çox mühüm işlər görüldü. Ölkə Prezidenti İlham Əliyev və ölkəmizin Birinci vitse-prezidenti Mehriban Əliyevanın dəstəyilə keçirilən beynəlxalq tədbirlərdə könüllülər fəaliyyət göstərməyə başladılar. 1999-cu ildə ölkəmizdə Milli QHT Forumu yaradıldı. O forum özü gənclərin könüllülük hərəkatına stimul verdi. Həmçinin, Heydər Əliyevin 1994-cü ildə verdiyi fərmanla Gənclər və İdman Nazirliyi yaradıldı. Həmin nazirlikdə də könüllülük hərəkatının formalaşdırılması istiqamətində işlər görülməyə başladı. Amma artıq bir neçə ildir könüllülük hərəkatı çox yüksək səviyyədə inkişaf edib və beynəlxalq standartlar səviyyəsinə gəlib çatıb. Artıq bizim gənc könüllülər bir neçə xarici dildə ölkəmizdə və xaricdə keçirilən beynəlxalq tədbirlərdə yaxından iştirak edirlər. Bilirsiniz ki, Azərbaycan könüllüləri “Avroviziya”, İlk Avropa Oyunlarında, İslam Həmrəyliyi Oyunlarında, eləcə də digər beynəlxalq tədbir və forumlarda çox yüksək səviyyədə xidmət göstəriblər. Azərbaycanın gənc könüllüləri narkomaniyaya qarşı birgə beynəlxalq mübarizə ilə bağlı Bakıda keçirilən konfransda da, Qoşulmama Hərəkatına üzv dövlətlərin Bakı sammitində də çox aktiv iştirak etdilər. Bu gün Azərbaycanda tam peşəkar səviyyədə 17-20 min nəfər könüllülərimiz var ki, onlar beynəlxalq sertifikatlara layiq görülüblər və bu sertifikatlarla bütün beynəlxalq tədbirlərdə sərbəst iştirak edirlər. Hətta bizim bəzi könüllülərimiz var ki, onlar Azərbaycandan kənarda keçirilən beynəlxalq tədbirlərə də dəvətlidirlər, gedib oradakı tədbirlərdə də könüllü kimi iştirak edirlər. Bu gün Azərbaycanda mövcud olan könüllülük hərəkatı nəinki ölkəmizdə, eləcə də beynəlxalq aləmdə özünü tam olaraq doğruldub”.
R.Zeyni hesab edir ki, Azərbaycan dövlətinin dəstəyilə fəaliyyət göstərən gənc könüllülərin bir çox sahədə, o cümlədən də “ASAN xidmət”, DOST və digər layihələrdə yaxından iştirakı bu sahəyə böyük töhfə verib. “ASAN xidmət” Mərkəzinin bazasında yaradılan könüllülük korpusunda çox aktiv gənclər çalışırlar. “ASAN xidmət” 6 il bundan əvvəl yaradıldıqda burada da könüllülük bazasından yüksək səviyyədə istifadə edildi. Bu gün də “ASAN xidmət”in özünün çox böyük könüllülər korpusu formalaşıb ki, onlar da əhaliyə yüksək səviyyədə xidmət göstərirlər. Bu gün nazirliklərin, ali məktəblərin öz könüllüləri var. Ümumiyyətlə, ali məktəblərdə könüllülük institutu öz işini gördü və demək olar ki, könüllülük hərəkatı bütün sferalara yayıldı. Təhsil Nazirliyi “ASAN xidmət”lə bir yerdə “DOST könüllüləri” proqramını yerinə yetirir və DOST layihəsində gənc könüllülər insanlara xidmət göstərirlər”.
R.Zeyni qeyd etdi ki, Azərbaycan könüllülük sahəsində 50-100 illik təcrübəsi olan ölkələrdən də bəhrələnərək özünün könüllülər institutunu formalaşdıra bilib: “Biz bu sahədə uzun illik təcrübəsi olan ölkələrin də təcrübəsini öyrənirik. Azərbaycanda mövcud olan və öz aktivliyi ilə seçilən könüllülük hərəkatı xarici ölkələrdəki analoji hərəkatlardan geri qalmır, əksinə, dövlət dəstəyilə günü-gündən daha da genişlənir. Bizim könüllülərin fəaliyyəti bütün beynəlxalq norma və standartlara uyğundur. Bizim könüllüləri daha çox dövlətimiz dəstəkləyir, onların fəaliyyətinin genişlənməsinə şərait yaradır” - deyən R.Zeyni qeyd etdi ki, dövlət gənclər siyasətinə dəstək verməsəydi, bu boyda könüllülər hərəkatı yarana bilməzdi.
İradə SARIYEVA
