İlqar Hüseynli: “Hər bir qurumun sanksiyası nəticəsində formalaşan cərimələrin yarıdan çoxunu yalnız o qurumun özünə xərcləsək, bu artıq…”
Qanun və qaydaların pozulmasına görə cərimələr tətbiq edilir. Cərimlərdən əldə edilən vəsaitin hara yönəldiləcəyinin müzakirə edildiyi məlumdur.
Milli Məclisin plenar iclasında müzakirə olunan “Hərbi vəzifə və hərbi xidmət haqqında” Qanuna təklif edilən dəyişikliklərdə əks olunub ki, “Hərbi vəzifə və hərbi xidmət haqqında” qanunun tələblərinin pozulmasına görə tətbiq edilən cərimələrdən toplanan vəsaitin 50 faizi hərbi qulluqçuların aylıq vəzifə (tarif) maaşlarına əlavə ediləcək.
Qanun layihəsinə əsasən, hərbi vəzifələrin yerinə yetirilməsi ilə bağlı tədbirlərin maliyyə və maddi təminatı genişləndirilir. Belə ki, “Hərbi vəzifə və hərbi xidmət haqqında” Qanunun tələblərinin pozulmasına görə İnzibati Xətalar Məcəlləsinə əsasən müvafiq icra hakimiyyəti orqanının müəyyən etdiyi orqan (qurum) tərəfindən tətbiq edilən cərimələrdən toplanan vəsaitin 50 faizi müvafiq icra hakimiyyəti orqanının müəyyən etdiyi orqanda xidmət keçən hərbi qulluqçuların aylıq vəzifə maaşlarına əlavənin verilməsi üçün həmin orqanın hesabına köçürüləcək. Bu vəsaitdən istifadə qaydası müvafiq icra hakimiyyəti orqanının müəyyən etdiyi orqan tərəfindən müəyyən ediləcək.
Belə bir qanunu qəbul etmək nə qədər düzdür? Bu, hərbi qulluqçularla hərbi vəzifəli və hərbi mükəlləfiyyətli şəxslərin arasına ziddiyyət salmırmı? Cərimələri başqa sahəyə yönəltmək olmaz? Və ya hərbi qulluqçuların maaşlarını başqa bir mənbədən maliyyələşdirmək olmazmı?
“Təbii ki, bu, disbalans yaradacaq”
Ekspert İlqar Hüseynli “Bakı-Xəbər”ə şərhində bildirdi ki, hər il dövlət büdcəsinin gəlir və xərcləri müzakirəyə çıxarılır. “Təbii ki, büdcə vəsaitlərinin bir hissəsinin cərimələrdən formalaşması proqnozlaşdırılır. Yəni Azərbaycanın builki büdcəsinin bir hissəsi də cərimələrdən formalaşacaq. Amma bütövlükdə həm özəl sektorda tətbiq edilən maliyyə sanksiyaları, həm Dövlət Yol Polisinin qayda pozuntusuna görə tətbiq etdiyi cərimələr birbaşa dövlət büdcəsinə yönəldilir. Bütün xərclər də dövlət büdcəsindən ayrılır. Mənə elə gəlir ki, burda istər “Hərbi vəzifə və hərbi xidmət haqqında” Qanunun tələblərinin pozulmasına görə olan cərimələr, istərsə də digər cərimlərin hamısı bütövlükdə dövlət büdcəsinə yönəldilməlidir”.
İ.Hüseynlinin sözlərinə görə, dövlət büdcəsindən istər hərbi qulluqçulara, istərsə də digər imtiyazlı şəxslərə maliyyə ayrılmalarının edilməsi həm mexanizmin qurulmasında əhəmiyyətli rol oynaya, həm də ədaləti təmin edə bilər. “Amma burda bir məsələ var. Hər bir qurumun sanksiyası nəticəsində formalaşan cərimlərin yarıdan çoxunu yalnız o qurumun özünə xərcləsək, bu artıq dövlət büdcəsinin formalaşması olmayacaq. Təbii ki, bu, disbalans yaradacaq. Hesab edirəm ki, bütün cərimələr dövlət büdcəsinə yönəldilməlidir və ordan da istər hərbi qulluqçulara, istərsə də digər kateqoriyadan olan şəxslərə maliyyə ayrımları aparılmalıdır. Yəni o vəsaitdən ayrı-ayrı sahələrdə işləyənlərin maaşlarına əlavələr edilməlidir. Cərimələrdən büdcəyə gələn vəsaitlər yalnız bir-iki sahəyə deyil, bütün sahələrə yönəldilməlidir”.
İ.Hüseynli hesab edir ki, hansısa bir təşkilatın tətbiq etdiyi cərimələrdən gələn vəsaitin hamısı, yaxud yarısı yalnız o sahələrə xərclənməli deyil.
İradə SARIYEVA
