6-cı siniflərdə biologiya və fizika tədrisi ləğv olundu - etirazlar necə əsaslandırılır...

Elm və Təhsil Nazirliyinin Ümumi və məktəbəqədər təhsilin təşkili və idarə olunması şöbəsinin müdiri Elnur Əliyev növbəti tədris ilindən 6-cı siniflərdə “Təbiət” fənninin tədris ediləcəyi, əvəzində isə biologiya və fizikanın tədris olunmayacağını deyib.

Elm və Təhsil Nazirliyindən mətbuata bildirilib ki, Azərbaycan Respublikası Nazirlər Kabinetinin 29 sentyabr 2020-ci il tarixli 361 nömrəli Qərarı ilə təsdiq edilmiş “Azərbaycan Respublikasında ümumi təhsilin dövlət standartları” sənədinə əsasən, ümumi təhsilin səviyyələri üzrə tədris olunan fənlərin siyahısında müəyyən dəyişikliklər edilib: “Ümumi orta təhsil səviyyəsindən “Həyat bilgisi” fənni çıxarılaraq “Təbiət” fənni əlavə edilib. 2022-2023-cü dərs ilində ölkənin bütün V siniflərində təbiət fənni tədris olunub. 2023-2024-cü dərs ilində bütün VI siniflərdə “Təbiət” fənninin tədrisinin davam etdirilməsi nəzərdə tutulur. “Təbiət” fənninin məzmununa fizika, kimya və biologiya fənləri üzrə ilkin biliklər daxil edilib. İnteqrativ məzmunlu bu fənn VII siniflərdə tədris olunacaq fizika, kimya və biologiya fənlərinə keçid xarakteri daşıyır”.

Qeyd edilib ki, V-VI siniflərdə təbiət fənni tədris edilmiş şagirdlər IX və XI siniflərə çatdıqda müvafiq imtahanların proqramları da onların təhsil aldığı standart və mövzulara uyğunlaşdırılacaq.

Onu da bildirək ki, VI siniflərdə “Təbiət” fənninin tədrisi, əvəzində isə biologiya və fizikanın tədris olunmayacağı fikri birmənalı qarşılanmayıb.

• “Bu məsələdə əsas problem sözügedən dərsliyin tədrisi ilə əlaqədardır”

Təhsil eksperti Elşən Qafarov “Bakı-Xəbər”ə açıqlamasında qeyd etdi ki, həmin fənlər tədrisdən çıxarılmayıb, birləşdirilib: “Yeni dərslik modeli kifayət qədər uğurludur. Həmin fənlərlə bağlı məlumatlar ilkin formada “Təbiət” dərsliyində öz əksini tapır. Təbiət fənninin tədrisi ötən ildən başlayıb. Elm və Təhsil Nazirliyi Sinqapur modelində təcrübə mübadiləsi aparır. Bu kifayət qədər praktik dərslikdir”.

Ekspert hesab edir ki, bu məsələdə əsas problem sözügedən dərsliyin tədrisi ilə əlaqədardır: "Bu fənni kim tədris etməlidir: fizika, kimya, coğrafiya, yoxsa biologiya müəllimi? Bu fənlərin müəllimləri təlimlərə cəlb olunubmu?".

Günel CƏLİLOVA