Təmir puluna görə daha bir direktor ilişdi - məktəblərin dövlət təmir pulu varmı, hara gedir...
Tədris ilinin başlaması ilə əlaqədar gündəmi yeni xəbərlər alıb. Həmin xəbərlərin çoxu da məktəblərdə pul yığılması ilə bağlıdır. Məsələn, Sumqayıt şəhər 32 saylı orta məktəbin direktoru İbrahimova Esmira Famil qızı sentyabrın 14-də müəllimlər üçün yaratdığı vatsap qrupuna səs ataraq hər müəllimdən 50 manat tələb edib:
“Hörmətli müəllimlər, sabah hamı bir nəfər kimi işdə olur və təcili məktəbin uçuq-sökük yerlərini 4-5 gün ərzində təmir etməliyik. Ona görə sabah hamı bir nəfər kimi 50 manat gətirir. Şüşələr sınıqdı, salınacaq, dəhlizlərə bu 4 gündə bir az əl gəzdiriləcək. Usta haqqı ilə birlikdə ancaq çatdıracağıq. Artıq pul qalsa, bir balaca da mərkəzi yerlərdə jalüzlərin təmirinə diqqət yetiriləcək”.
Göründüyü kimi, məktəb direktoru pulu konkret səbəb üçün istəyir.
Qeyd edək ki, məktəblərin cari təmiri hər zaman gündəmdə olan bir məsələdir. Hər tədris ili başa çatdıqdan sonra növbəti tədris ili üçün məktəblərin cari və əsaslı təmiri, yenidən tikintisi işlərinə başlanılır. Və təəssüf ki, məktəb rəhbərliyi bununla bağlı həm də müəllim və şagirdlərdən müəyyən məbləğdə vəsait tələb edir. Ancaq orta məktəblərdə şagirdlərdən təmir üçün vəsait yığılması yolverilməzdir. Çünki bütün təmir və tikinti işləri dövlət büdcəsinin vəsaiti hesabına həyata keçirilir. Şagirdlərdən bu məqsədlə pul yığılması qanunsuzdur və bunu direktor öz məqsədi üçün edir.
- “Bu halların qarşısını almaq üçün vaxtında müraciət olunarsa, dövlət tərəfindən müəyyən yardım tədbirləri görülər”
Təhsil üzrə ekpert Elçin Əfəndi bildirdi ki, hər il dövlət büdcəsindən müvafiq olaraq Azərbaycanda fəaliyyət göstərən 4,440-dan çox orta təhsil müəssisələrinə vəsait ayrılır: “Bu təhsil müəssisələri içərisində tikinti işləri üçün də müəyyən maliyyə vəsaiti ayrılır və müəyyən maliyyə vəsaiti ilə də həmin istiqamətlərdə müəyyən işlər aparılır. Tikintiyə ehtiyac duyulduğu halda həmin məktəbin direktoru Elm və Təhsil Nazirliyinə müraciət etmirsə, nəticə etibarilə, direktor özünü sığortalamaq üçün müəllimlərdən pul yığmağa başlayır. Yaxud da şagirdlərdən müəyyən ödəniş tələb edir. Təbii ki, bu halların qarşısını almaq üçün vaxtında müraciət olunarsa, dövlət tərəfindən müəyyən yardım tədbirləri görülər. Amma hər hansı təmir-tikinti işlərinə ehtiyacı olmadığı halda məktəb rəhbərliyi pul vəsaiti yığmağa başlayırsa, bu, qanunvericiliyin pozulması və həmin müəllimin öz imkanlarını genişləndirməsi deməkdir. Hamı nəzərə almalıdır ki təhsillə rüşvət heç zaman bir araya gələ billməz. Belə hallarla rastlaşan vətəndaşların vaxtında müraciət etməsini tələb edirəm ki, qanunlara zidd yanaşan insanlar vaxtında cəzalarını çəksinlər”.
Günel CƏLİLOVA
