Övladlarını məktəbə göndərən valideynləri maraqlandıran vacib amillərdən biri də onların təhsil müəssisələrində sağlamlığının qorunmasıdır. Hamımıza məlumdur ki, təhsil müəssisələrində tibb məntəqələri mövcuddur və həmin məntəqələrdə həkim, tibb bacıları şagirdlərin sağlamlığına nəzarət etməlidir. Lakin məktəblərdə şagirdlərin sağlığına nəzarət həkim işi olsa da, tədris ocaqlarında bunun əksi müşahidə olunur.
Məlumat üçün bildirək ki, ötən həftə Rusiya Federasiyasının paytaxtında ÜST-ün Avropa Regional ofisi Şərqi Avropa və Mərkəzi Asiya ölkəsinin milli məktəb səhiyyə sistemlərinin yaxşılaşdırılması ilə bağlı toplantısı keçirilib. Toplantıda Azərbaycan məktəblərində həkim çatışmazlığı yaşandığı da bildirilib.
Qeyd edək ki, bu gün ölkə məktəblərində həkim çatışmazlığı yaşanır. Bir məktəbdə 2000-ə yaxın şagird təhsil alır və məktəbin bir həkimi bütün şagirdlərə nəzarət edə bilmir.
Adil Qeybulla: “Məktəblərin tibbi məntəqələri yarıtmaz vəziyyətdədir”
Professor, tibb eksperti Adil Qeybulla bildirdi ki, məktəblərdəki tibbi məntəqələrdə kiminsə oturması yetərli deyil, həkim nəzarətinin olması da çox önəmlidir: “Məktəbdə həkimin olması çox vacibdir, çünki bir uşağın epilepsiyası ola bilər və dili qatlanarkən həkim müdaxiləsi həyati əhəmiyyətlidir. Məktəbdir, uşaq yıxıla, travma ala bilər. Bu və bu kimi hallar var”.
Həmsöhbətimiz onu da əlavə etdi ki, məktəblərdə fəaliyyət göstərən tibbi xidmət personalları şagirdlərin peyvəndlənməsinə nəzarət etməlidir: “Çünki ibtidai sinif şagirdləri hələ də tam peyvəndlənmədən keçməyiblər. Uşaqların səhhətinə nəzarət edilməli, hansısa problemi olan şagird vaxtında xəstəxanaya göndərilməlidir.
Bu gün məktəblərin tibbi məntəqələri yarıtmaz vəziyyətdədir və bunu qənaətbəxş hesab etmək olmaz. Ən yaxşı məktəbdə belə, tibbi xidmətlərin göstərilməsi üçün bir otaq ayrılıb. Lakin orada tibb bacısı var, ya yoxdur - bilinmir. Yəni məktəblərdə tibbi xidmət bu səviyyədədir. Bunadək görməmişəm ki, hansısa məktəbdə bir həkim otursun”.
Nizami Hüseynov: “Bu gün məktəblərdəki tibb otaqları tam qənaətbəxş vəziyyətdə deyil”
Təhsil eksperti Nizami Hüseynov da bildirdi ki, bu gün məktəblərdəki tibb otaqları tam qənaətbəxş vəziyyətdə deyil: “Məktəblərdə təhsil alan şagirdlərin sağlamlığı haqqında diaqnozu məhz həmin məntəqədə çalışan tibb bacıları qoyur. Ona görə, onların üzərinə kifayət qədər böyük məsuliyyət düşür. Orta məktəblərdə tibb xidmətinin göstərilməsi qaydalarında qeyd olunur ki, şagirdlər ayda bir dəfə müayinə edilməlidir. 6 aydan bir isə müxtəlif sahələrin, yəni psixoloq, nevroloq, uroloq, kardioloq və s. həkimlərin iştirakı ilə yaradılmış tibbi komissiyanın yoxlanışından keçməlidirlər. Amma təəssüflər olsun ki, sadaladığım bu qaydalara bir sıra orta məktəblərdə əməl edilmir”.
Ekspert onu da əlavə etdi ki, məktəblərdə çalışan tibb bacılarının işi sadəcə uşaqları müayinə etmək və ya hər hansısa bir hadisə baş verdikdə, müdaxilə etməklə bitməməlidir: “Şagirdlərin sağlamlığı üçün onlar, hətta döşəməni silmək üçün istifadə olunan xlorun tərkibini belə yoxlamalıdırlar. Həmçinin burada müəllimlərin də rolu böyükdür. Müəllimlər və tibb işçiləri birlikdə fəaliyyət göstərməlidirlər. Əgər dərs zamanı müəllim uşağın sağlamlığında bir problem hiss edərsə, dərhal onu tibb otağına yönləndirməlidir. Bundan başqa, tibb bacısı özü də şagirdlərin fiziki görünüşünə xüsusi nəzarət etməlidir. Yəni sinif otaqlarını gəzərək, düzgün oturmayan şagirdlərə diqqət yetirib, onların gələcəkdə skaliozdan əziyyət çəkməməyi üçün göstərişlər verməlidir”.
Günel CƏLİLOVA
