Şəhidə toy ziyafəti qurmaq? - adətlərimizin üstündə bu əməliyyatlar nə deməkdi...

İsmayıl Əhməd: “Heç cahiliyyət dövründə də belə ənənə olmayıb”

img

Şəhid adı xalqımız üçün ən əziz addır, şəhidlik ən həssas mövzudur. Elə bir mövzudur ki, onun barəsində söhbət açılanda gərək diqqətli və həssas olasan. Elə cəmiyyət qədər şəhid ailələri də diqqətli olmalıdır. Şəhid valideyninin, qardaş-bacısının, yaxın əqrabaların ağrısını da, könüllərinin yarasını da bu xalq özündə, öz canında hiss edir. Hər bir şəhidimizin ruhu, xatirəsi əzizdi, unudulmazdır...

Son günlər sosial şəbəkələrdə, internetdə “şəhid toylarını” əks etdirən görüntülər yayılır. Bəzi şəhid ailələrinin şəhid olan övladları üçün “toy mərasimi” keçirməsi və bu görüntülərin sosial şəbəkələrdə yayılması həqiqətən də dəhşətli mənzərədir. “Şəhid toyu” “ənənəsi”nin əsası qoyulur sanki. Ümumiyyətlə, ilk dəfədir ki, belə bir halla qarşılaşırıq və bəzi şəhid anaları şəhid oğluna “toy” keçirəcəyini də deyir. “Şəhid toyu” “ənənəsi” hardan qaynaqlanır, ümumiyyətlə bu nə deməkdir?

İlahiyyatçılar qeyd edirlər ki, şəhidlik bizim üçün ən həssas və uca bir anlayışdır, bu uca addan başqa məqsədlər üçün istifadə etmək Allah qatında da qəbul edilməz. İlahiyyatçılar şəhid övladına “toy edən” valideynlərin ağrı-acısını hər kəsin başa düşdüyünü deyirlər və hesab edirlər ki, ata-ana şəhid övladına “toy keçirmək” kimi məsələdən uzaq olmalıdır, bu həm dinimizə, həm də milli dəyərlərimizə ziddir. İlahiyyatçıların bildirdiyinə görə, bu cür toy mərasimlərinin keçirilməsi islam ənənəsinə, dinimizin təməl prinsiplərinə ziddiyyət təşkil edən davranışdır. Özünü müsəlman sayan hər bir kəs üçün bu, Allahın qətiyyətlə qəbul etmədiyi bir haldır, hərəkətdir.

  • “Nə islamda, nə də milli adət-ənənəmizdə “şəhid toyu” məsələsi var...”

İlahiyyatçı İsmayıl Əhməd bizimlə söhbətində bildirdi ki, “şəhid toyu” deyilən bir anlayış nə dinimizdə var, nə də adət-ənənələrimizdə. İnsanları bundan çəkinməyə çağıran ilahiyyatçının sözlərinə görə, şəhidlərimizin hər biri bizim üçün əzizdir, elə onların ailələri də, amma onlar kimlərinsə yalançı təbliğatına uyub bu cür addımlar atmasınlar.

“Bu bütün hallarda cəfəngiyatdır. Heç cahiliyyət dövründə də belə ənənə olmayıb. Bunu edən şəxs şəhidə çox böyük həqarət etmiş olur. Nə islamda, nə də milli adət-ənənəmizdə “şəhid toyu” məsələsi var, hər ikisində də yoxdur. Əlbəttə ki, buna islamın mövqeyi mənfidir. Bu yolverilməz haldır”.

Heç islamdan əvvəlki cahiliyyət dövründə də belə ənənənin olmadığını bir daha vurğulayan İ.Əhməd hesab edir ki, XXI əsrdə cahiliyyətin, xurafatın yayılmasında və bu cür halların baş verməsində din xadimlərinin də rolu var. Ekspert qeyd etdi ki, çünki din xadimlərinin çoxu əlinə tribuna keçəndə bu kimi mövzulara toxunmur, nağıl danışmaqla məşğul olur, nəticədə də bu cür hallar baş verir.

İradə SARIYEVA

Son xəbərlər