İlqar Orucov: “...Ola bilməz ki, iki evin məhz Mərkəzi Nəbatat Bağında tikilməsindən AMEA-nın keçmiş rəhbərinin xəbəri olmasın”
Azərbaycan Milli Elmlər Akademiyasının (AMEA) əksər strukturlarında, elmi-tədqiqat institutlarında saysız neqativ hallar müşahidə edilməkdədir. Son illər AMEA-nın institutlarında, başqa qurumlarında baş verən qanunsuzluqlar haqqında çox yazılıb. AMEA-nın qanunsuz əməllərə imza atan qurumları sırasına Mərkəzi Nəbatat Bağı da əlavə edilib. Məlumatlara görə, Mərkəzi Nəbatat Bağında AMEA-nın prezidenti, akademik Ramiz Mehdiyevin tapşırığı əsasında başladılan abadlıq-quruculuq işləri sürətlə davam etdirilir.
Mərkəzi Nəbatat Bağından baki-xeber.com-a verilən məlumata görə, abadlıq işlərinin səmərəli təşkili məqsədilə bu müəssisənin baş direktoru vəzifəsini icra edən Natiq Allahverdiyev tərəfindən Komissiya yaradılıb. Komissiyanın tərkibinə biologiya elmləri doktoru, professor Elman İsgəndər, biologiya elmləri doktoru, dosent Şakir Qasımov, biologiya elmləri üzrə fəlsəfə doktoru, dosent Yusif Zeynalov, biologiya elmləri üzrə fəlsəfə doktoru, dosent Asif Mehralıyev kimi biologiya sahəsində tanınmış alimlər daxildir.
“Nəzərə çatdırmaq istəyirik ki, AMEA Rəyasət Heyətinin qərarı ilə RH-ın Daxili nəzarət və audit şöbəsi tərəfindən Mərkəzi Nəbatat Bağında yoxlama işləri həyata keçirilmiş, arayış tərtib olunaraq orataya çıxan qüsur və qanunsuzluqlar, mənimsəmələr qeyd olunmuşdur. Nəbatat Bağının sabiq direktoru, biologiya elmləri doktoru Vahid Fərzəliyevin bu müəssisədə ciddi qanun pozuntularına yol verdiyi aşkar olunmuşdur. Belə ki, ağaclar baxımsız qalmış, Bağa məxsus ərazidə 2 ədəd qanunsuz evin tikintisinə şərait yaradılmışdır. Sabiq direktorun rəhbərlik etdiyi 6 il ərzində yeni ağacların əkilməsi üçün heç bir təşəbbüs göstərilməmiş, suvarma sisteminin düzgün təşkil olunmaması səbəbilə əksər ağaclarda quruma prosesi sürətlənmiş, dövlətin ayırdığı vəsaitlər şəxsi maraqlara uyğun istifadə edilmişdir. Daxili nəzarət və audit şöbəsi tərəfindən həyata keçirilmiş yoxlamaların əks olunduğu, sabiq direktor tərəfindən də imzalanmış arayış zərurət yarandıqda ictimailəşdirilə bilər...” Bunu Mərkəzi Nəbatat Bağından bildiriblər.
AMEA-nın Mərkəzi Nəbatat Bağında baş verən qanunsuzluqlar, burada qeyri-qanuni olaraq kimlərinsə villa tikməsi, buna icazə verməsi kimi hallar bu quruma başucalığı gətirmir. Ekspertlərin fikrincə, baş verənlərdən belə nəticəyə gəlmək olar ki, Mərkəzi Nəbatat Bağı illərdir nəzarətdən kənar fəaliyyət göstərib, Bağın keçmiş rəhbərliyi burada istədiyini edib.
- “Akif Əlizadənin razılığı olmadan Mərkəzi Nəbatat Bağının keçmiş direktoru nəinki o iki evin tikintisinə razılıq sənədinə imza ata, heç onu xəyalından belə keçirə bilməzdi”
AMEA-nın Mərkəzi Nəbatat Bağında baş verən qanunsuzluqları şərh edən Azərbaycan Gənc Alim, Doktorant və Magistrlər Cəmiyyətinin sədri, fizika-riyaziyyat üzrə fəlsəfə doktoru İlqar Orucov “Bakı-Xəbər”ə bildirdi ki, Mərkəzi Nəbatat Bağı ətrafındakı söz-söhbətlərlə o da tanışdır və AMEA-nın müəssisələrində baş verən bu kimi qanunsuqluqları ürək ağrısı ilə qarşılayır. “AMEA strukturlarında bu kimi halların baş verməsini ayrı-ayrı institutların, mərkəzlərin timsalında müşahidə etmişik. Konkret olaraq Mərkəzi Nəbatat bağında baş verən qanunsuzluqlara gəlincə, Akademiyanın hansı elmi müəssisəsini, institutunu araşdırsaq, böyük əksəriyyətində belə faktlar mövcuddur. Mən Mərkəzi Nəbatat Bağının keçmiş direktorunu tanıyıram, doğrudan da fağır, kasıb bir oğlan idi. Ona AMEA-nın keçmiş prezidenti Akif Əlizadənin əmisi qızı və eyni zamanda Əlizadənin zamanında akademik olmuş, AMEA-nın Botanika İnstitutunun direktoru işləmiş Validə xanım himayədarlıq edərək Mərkəzi Nəbatat bağına direktor qoydurdu. Yəni o adamı ora Akif Əlizadə direktor qoyub. Onlar sonra o cür insanın əli ilə, görürsüz ki, Mərkəzi Nəbatat Bağında nə cür qanunsuzluqlara yol veriblər. Mən Bağın indiki rəhbərliyinin bu məsələdə nə qədər haqlı və səmimi olduğunu deyə bilmərəm. Hər halda, burada konkret faktlar var və bu faktlardan da biri ondan ibarətdir ki, Mərkəzi Nəbatat Bağının ərazisində qanunsuz olaraq 2 villa tikilib. Burada iki qanunsuz evin tikilməsindən söhbət gedir. Sizə açığını deyim, ola bilməz ki, iki evin məhz Mərkəzi Nəbatat Bağında tikilməsindən AMEA-nın keçmiş rəhbərinin xəbəri olmasın. Akif Əlizadənin razılığı olmadan Mərkəzi Nəbatat Bağının keçmiş direktoru nəinki o iki evin tikintisinə razılıq sənədinə imza ata, heç onu xəyalından belə keçirə bilməzdi. Çünki Mərkəzi Nəbatat Bağının direktoru özbaşına bağın ərazisini sata və iş adamlarına verə bilməzdi. Bu məsələdə birbaşa Akademiyanın keçmiş rəhbərliyinin əli var, marağı var və onların maraqları çərçivəsində Nəbatat Bağı kimi unikal bir müəssisədə bu cür qanunsuzluqlar edilib. Çox təəssüf edirəm. Bu doğrudan da təəssüfedicidir”.
İ.Orucovun verdiyi məlumata görə, Genetik Ehtiyatlar İnstitutunun gözəl və nadir bağını da vaxtilə satışa çıxarmağa cəhd edənlər olub. Ekspertin sözlərinə görə, AMEA-ya məxsus bağlar, ərazilər həmişə bəzi keçmiş məmurların hədəfində olub. “Vaxtilə keçmiş məmurlar oranı Amerika səfirliyinə satmaq istəyirdi. O vaxt Baş nazirin müavini olan Abid Şərifov bu işdə maraqlı idi ki, Genetik Ehtiyatlar İnstitutunun bağını satsın. Mən bunu xatırlayıram. Amma o zaman Akademiyanın prezidenti mərhum Mahmud Kərimov, bütün israrlara baxmayaraq, o bağın satılmasının qarşısını aldı. Elm adamı elmi müəssisəni qoruyar, amma elmdən xəbəri olmayan təsadüfi bir adamı elmi müəssisəyə rəhbər qoysan, bu cür neqativ hallar baş verəcək. Mən bunu Akademiyanın keçmiş rəhbərinin timsalında deyə bilərəm. Necə ola bilər ki, Akademiyaya məxsus ərazi satılıb, amma bundan AMEA-nın o vaxtkı rəhbərliyinin xəbəri olmayıb? Bunun heç bir mümkünü yoxdur. Bu işi Vahid müəllim kimi fağır, kasıb bir adamın üstünə atmaq niyyətilə bağın ərazisini satıblar. Bu kimi hallar biabırçılıqdır, alim əxlaqına sığmayan hərəkətlərdir. Əlbəttə, bu hadisəni qınayıram. Əslində, elmin qədrini bilməyən adamların elmə rəhbərlik etməsi bu kimi hallara gətirib çıxarır. O zaman da deyirdik bu adamlar elm adamı deyil, onlar bura Akademiyanı dağıtmağa gəliblər. Biz indi bunu açıq görürük...”
İ.Orucov qeyd etdi ki, təftiş aparılarsa, Akademiyada nə qədər qanunsuzluqlar olduğu üzə çıxacaq, bu isə təəssüf doğurur.
İradə SARIYEVA
