Təhsil naziri Emin Əmrullayev Real TV-yə müsahibəsində müəllimlərin işə qəbulu ilə bağlı dəyişikliklərin olacağını, bəzi məktəb direktorlarına müəllim seçmək səlahiyyəti veriləcəyini söyləyib. Bu fikir cəmiyyətdə müzakirələrə səbəb olub.
Maraqlıdır, müəllimlərin direktorlar tərəfindən seçilməsi hansı qaydada həyata keçiriləcək?
Kamran Əsədov: “7 məktəbə müəllimləri seçmək hüququ verilib, amma bunu kütləvi etmək olmaz”
Təhsil eksperti Kamran Əsədov bildirdi ki, müəllimlərin işə qəbulu üzrə imtahanlar il ərzində 4 dəfə keçirilməli və yalnız ixtisas bilikləri yoxlanılmalıdır: “Hazırda orta təhsil müəssisələrində işə qəbul mərkəzləşmiş, şəffaf qaydada həyata keçirilsə də, bu heç də keyfiyyətli və ədalətli olmaq mənasına gəlmir. Azərbaycanda müəllimlərin işə qəbulu mərkəzləşdirilmiş şəkildə ilk dəfə 2009-cu ildə keçirilib. Təqdim edilən test tapşırıqları imtahan iştirakçılarının keyfiyyətini deyil, daha çox əzbərçiliyi yoxlayır. Müəllimlərin işə qəbulu imtahanlarında dəyişiklik zəruridir. İşə qəbul imtahanı bir neçə dəfə keçirilməlidir”.
Ekspertin sözlərinə görə, ölkədə 7 məktəbə müəllimləri seçmək hüququ verilib. Amma bunu kütləvi etmək olmaz. Belə olarsa, proses qeyri-şəffaf olacaq: “Hətta Təhsil Nazirliyinin özünün işə qəbulunda belə problemlər var. İşə qəbul prosesində müxtəlif oyunlardan çıxırlar. Qəbul imtahanlarında iştirak edənlər yalnız ixtisas biliklərindən imtahan verməlidir. Kurikulumla, test tapşırığı salmaqla heç nəyə nail ola bilmərik. İndiki mərhələdə əsas məsələ öz ixtisasını yaxşı bilən müəllim ordusunu artırmaqdan ibarətdir. Məhz ixtisas üzrə sualların salınması müəllimlərin işə qəbulu imtahanında həm keyfiyyətə, həm də obyektivliyə ciddi şəkildə müsbət təsir göstərəcək”.
Elşən Qafarov: “Müəllimlərin işə qəbulunun məktəblərə həvalə edilməsinə qədər məktəblərə müəyyən muxtariyyət verilməlidir”
Təhsil eksperti Elşən Qafarov bildirdi ki, hazırda bir neçə seçilmiş məktəb var ki, onlarda vəziyyət belədir: “Müəllimlərin işə qəbul imtahanından keçib, yüksək bal toplayan şəxsləri məktəblərə təqdim edirlər. Məktəbin özündə müsahibə gedir. Orada komissiya təşkil olunur, nazirliyin nümayəndəsi və məktəbin rəhbərliyi iştirak edir. Bu qərar ölkə üzrə bütün məktəblərə aid deyil. Cəmi 5-6 məktəbə belə səlahiyyət verilir. Nəzərə alaq ki, ölkə üzrə 4472 məktəb var”.
Ekspert onu da əlavə etdi ki, direktorların təyinatında çox ciddi problemlər var: “Ölkə üzrə bunun keçirilməsi qeyri-mümkündür. Çünki ölkə üzrə son 5-6 ildə təyin olunan məktəb direktorlarının 90 faizində çox ciddi qüsurlar var. Düşünürəm ki, müəllimlərin işə qəbulunun məktəblərə həvalə edilməsinə qədər məktəblərə müəyyən muxtariyyət verilməlidir. O cümlədən də məktəbin öz işini, dərs bölgüsünü və digər məsələlərini direktorlara etibar etmək lazımdır”.
Günel CƏLİLOVA
