Son günlər Azərbaycanda koronavirus infeksiyasına yoluxma hallarında kəskin artım müşahidə olunduğuna görə xüsusi karantin rejimi sərtləşdirilib. Nazirlər Kabinetinin müvafiq tapşırığına əsasən, dövlət qurumlarında çalışan işçilərin say həddi 30 faizədək azaldılaraq, digər əməkdaşlar məsafədən iş rejiminə keçirilir. Özəl sektorda və digər sahələrdə fəaliyyət göstərən qurum və təşkilatlara eyni qaydanın tətbiq edilməsi tövsiyə olunub.
İnternet vasitəsilə həll olunan işlər olduğundan, dolayı bu da Azərbaycanda internetlə bağlı məhdudiyyətlərin aradan qaldırılması məsələsini gündəmə gətirib. Qeyd edək ki, çalışanların məsafədən iş rejiminin təmin edilməsi üçün internet şəbəkəsi vacibdir. İnternetə qoyulan məhdudiyyət qaldırılacaqmı?
“…hər hansı bir güzəştin tətbiq olunması ilə bağlı yeni bir qərar yoxdur”
Məsələ ilə bağlı fikir bildirən Nəqliyyat, Rabitə və Yüksək Texnologiyalar Nazirliyinin mətbuat katibi Günel Gözəlova qeyd etdi ki, məhdudiyyət ermənilərin törətdikləri genişmiqyaslı hərbi təxribatların qarşısını almaq üçündür: “Müvafiq məhdudiyyətlər “Telekommunikasiya haqqında” Azərbaycan Respublikası Qanununa və hərbi vəziyyət şəraitində rabitədən istifadə üçün xüsusi qaydalara əsasən tətbiq olunub. COVID-19 pandemiyası ilə bağlı bu gün reallıq bir az dəyişib. Amma hazırda internetə tətbiq olunan məhdudiyyətlərin aradan qaldırılması və ya hər hansı bir güzəştin tətbiqi ilə bağlı yeni bir qərar yoxdur. Belə bir qərar olacağı təqdirdə mütləq cəmiyyətə bu barədə məlumat veriləcək”.
G.Gözəlovanın sözlərinə görə, Ermənistan cəbhədə Azərbaycana uduzur deyə kibermühitdə bizə qarşı çox ciddi təxribatlar hazırlayır: “İnternetin məhdudlaşdırılması birbaşa Azərbaycan dövlətini, onun ordusunu və cəmiyyətimizi kibermühitdə baş verə biləcək təxribatlardan qorumaq üçündür. Ölkə xaricindən Azərbaycana qarşı kiberhücumların qarşısını almaq üçün ən yaxşı metodlardan biri internetin zəiflədilməsidir. Bu tətbiq olunmasa, düşmən tərəfi Azərbaycanın infrastrukturuna zərər vura bilər, eyni zamanda, internet vasitəsilə müəyyən informasiyaların oğurlanmasına nail ola bilər. Bu baxımdan da bütün dünyada hərbi əməliyyatlar zamanı internetin məhdudlaşdırılması vacibdir”.
Həmsöhbətimiz onu da əlavə etdi ki, vətəndaşlar alternativ platformalardan istifadə edib, dezinformasiyanın yayılmasına qarşı çıxmalıdırlar.
Günel CƏLİLOVA
