19/09/2020 06:15
728 x 90

Bölgələrimizdə gizli toy, yas, nişan mərasimləri tüğyan edir - icralar hara baxır, polis olmasa...

“Bu qədər hadisə baş verir, biri gizli toy, başqa birisi ad günü, nişan keçirir, amma bələdiyyələr, icra hakimiyyəti orqanları bunu “görmək” istəmirlər”

img

Pandemiya dövrü hələ başa çatmayıb və bütün vətəndaşların virusla mübarizə çərçivəsində ölkəmizdə tətbiq edilən karantin rejiminə, onun tələb və qaydalarına əməl etməsi vacib olduğu halda, bir çox halda bunun əksini görürük.

Karantin qaydalarına görə, ölkəmizdə toy, nişan, ad günü mərasimlərinin keçirilməsi qadağandır, yas mərasimlərinin keçirilməsi üçün isə konkret çərçivə müəyyən edilib.

İndiyə qədər kifayət qədər vətəndaş karantinin tələblərini pozaraq, kütləvi yas mərasimləri keçirib, toy-nişan, ad günü edib.

Əlaqədar qurumların, ictimai təşkilatların çağırışlarına baxmayaraq, hələ də bəzi vətəndaşlarımız ad günü, nişan, toy, yas keçirməkdən çəkinmirlər.

Daxili İşlər Nazirliyinin Mətbuat xidmətindən mətbuata verilən məlumata görə, Beyləqan Rayon Polis Şöbəsinə rayonun Allahyarlı kəndində yas mərasiminin keçirilməsi barədə məlumat daxil olub.

Beyləqan Rayon Polis Şöbəsinin əməkdaşları dərhal həmin ünvana gəlib və orada karantin rejiminin qaydalarının pozulduğu aşkar edilib. Mərasim dayandırılıb və orada olanlardan 8 nəfər Polis Şöbəsinə gətirilərək, barələrində İnzibati Xətalar Məcəlləsinin 211.1-ci maddəsi sə protokol tərtib edilərək cərimə olunublar.

Nazirlər Kabineti yanında Operativ Qərargah tərəfindən qəbul edilən xüsusi karantin rejiminin qaydalarının təmin olunması istiqamətində Goranboy Rayon Polis Şöbəsinin (RPŞ) əməkdaşları tədbirləri davam etdirirlər.

Daxili İşlər Nazirliyinin Mətbuat xidmətinin Gəncə regional qrupundan mətbuata verilən məlumata görə, avqust ayının 10-da RPŞ-yə şəhər ərazisindəki fərdi yaşayış evlərinin birində ad günü mərasimi keçirilməsi barədə məlumat daxil olub. Dərhal polis əməkdaşları həmin ünvana gələrək mərasimi dayandırıblar, iştirakçılar saxlanaraq Polis Şöbəsinə gətiriliblər.

Şöbədə aparılan müvafiq araşdırmalarla məlum olub ki, rayon sakinləri Daşqın Qarayev və İlyas İsrafilov əvvəlcədən danışaraq, nəvələrinə ad günü keçirmək barədə razılığa gəliblər. Həmin şəxslər də daxil olmaqla, məclis iştirakçıları barədə İnzibati Xətalar Məcəlləsinin 211-ci maddəsi (Epidemiya əleyhinə rejimin, sanitariya-gigiyena və karantin rejimlərinin pozulması) ilə 200 manat məbləğində cərimə ediliblər. Polis əməkdaşları onlarla bir daha profilaktik söhbət apararaq, karantin rejiminə əməl etməyi, mümkün qədər evdən çıxmamağı tövsiyə edib və bildiriblər ki, bütün bu tələblər vətəndaşların sağlamlığının qorunması üçündür.

Qeyd etmək lazımdır ki, Goranboy Rayon Polis Şöbəsinin əməkdaşlarının mütəmadi olaraq keçirdikləri reydlər zamanı xüsusi karantin rejiminin tələblərini pozan 666 vətəndaş barəsində müvafiq qanunlara uyğun olaraq, tədbir görülüb ki, onlardan 10 nəfər barəsində rayon məhkəməsinin qərarı ilə inzibati həbs seçilib. Bundan başqa, görülən tədbirlər nəticəsində rayon ərazisində 1 nişan və 1 toy mərasiminin qarşısı alınıb.

Biləsuvarda da gizli nişan mərasimi keçirənlər cərimələnib. Biləsuvar Rayon Polis Şöbəsinə rayonun Təyyarə meydanı adlanan ərazisində yaşayan İ.Əlizadənin xüsusi karantin rejiminin qaydalarını pozaraq gizli şəkildə qızına nişan mərasimi keçirməsi barədə məlumat daxil olub. DİN Mətbuat xidmətinin Lənkəran regional qrupundan mətbuata verilən məlumata görə, polis əməkdaşları dərhal sözügedən ünvana gəliblər. Məclisin təşkilatçısı və orada iştirak edən 4 nəfər Polis Şöbəsinə dəvət edilib. Şöbədə onlarla profilaktik söhbətlər aparılaraq karantin rejiminin qaydaları izah olunub.

Onlar barəsində İnzibati Xətalar Məcəlləsinin müvafiq maddəsi ilə protokol tərtib edilərək cərimə olunublar.

Bu kimi qanunsuz mərasimlər təşkil edən vətəndaşlara qarşı görülən inzibati tədbirlərə baxmayaraq, başqaları bundan örnək götürmək istəmir və bu halları davam etdirirlər.  

Bu halların qarşısını almaq üçün necə bir mexanizmə ehtiyac var?  

  • ...öz üzərlərinə düşən vəzifələri tam olaraq karantin rejiminin tələblərinə uyğun həyata keçirməlidirlər”

“Polisə Dəstək” İctimai Birliyinin sədri, tanınmış hüquqşünas Şəmsəddin Əliyev “Bakı-Xəbər”ə bildirdi ki, pandemiya ilə bağlı bütün yük Nazirlər Kabineti yanında Operativ Qərargahın tərkibinə daxil olan TƏBİB-in və Azərbaycan polisinin çiyinlərinə düşür. Ş.Əliyev qeyd etdi ki, polis olmasa, vəziyyət daha da pisləşər. “Çox təəssüf ki, digər qurumlar öz fəaliyyətini karantin rejiminə uyğun qura bilmirlər. Harada hüquqpozma halları varsa, oraya polis gedir,  hətta karantin rejimi tələbləri daxilində bəzi addımların atılması da polisin üzərinə düşür. Düşünürəm ki, mərkəzi və yerli icra hakimiyyəti orqanları öz fəaliyyətləri, vəzifə funksiyaları daxilində Qərargahın qərarlarının icra olunması istiqamətində addım atmalıdırlar. Bölgələrdə nişan, toy, ad günü, yas mərasimlərinin keçirilməsində insanlarımız artıq keçmiş vərdişlərdən kənara çəkilməlidirlər. İki gəncin xoşbəxtliyini istəyirlərsə, karantin rejimi müddətində toyu-nişanı bir az arxa plana keçirməlidirlər. Bu vacibdir. Bu tam mümkün olan məsələdir. Hesab edirəm ki, bütün dövlət qurumları, yerli icra hakimiyyəti orqanları, bələdiyyələr öz üzərlərinə düşən vəzifələri tam olaraq karantin rejiminin tələblərinə uyğun həyata keçirməlidirlər. Karantin rejimi bəzi mərkəzi və yerli icra hakimiyyəti orqanlarının çatışmazlıqlarını ortaya qoydu. Rayon icra hakimiyyətləri nə üçün öz üzərlərinə düşən işi icra etmirlər? Ölkə başçısı çıxış edir, tapşırıq verir, həyəcan təbili çalır - maska taxmaq lazımdır, sosial məsafəni qoruyun, sanitar-gigiyena qaydalarına əməl edin, virusa yoluxa bilərsiniz. Bəs onda nə üçün yerli icra hakimiyyəti orqanları Prezidentin bu tələblərindən, çağırışlardan nəticə çıxarıb öz işləri ilə məşğul olmur, seyrçi mövqeyində dayanırlar? Bu gün yerli və mərkəzi icra hakimiyyəti orqanları, seçkili orqan olan bələdiyyələr, eləcə də aidiyyəti dövlət qurumları  polisin işinə ciddi dəstək verməlidirlər. Hər bir dövlət qurumu, vətəndaş cəmiyyəti, bələdiyyələr qarşılıqlı şəkildə polisə dəstək olmalıdır. Operativ Qərargahın qəbul etdiyi qərarların qüsursuz icra olunmasında bu qurumların fəaliyyəti görünməlidir. Rayonlarda polis və digər hüquq-mühafizə orqanları, icra hakimiyyətləri, yerli idarəetmə orqanı olan bələdiyyələr birgə işləməlidirlər. Bu qədər hadisə baş verir, biri gizli toy, başqa birisi ad günü, nişan keçirir, amma bələdiyyələr, icra hakimiyyəti orqanları bunu “görmək” istəmirlər. Bütün yük polisin üzərinə düşür. İcra hakimiyyətləri, bələdiyyələr hara baxır? Hər biri dövlət büdcəsindən əməkhaqqı alır, amma bir iş görmürlər.  

Polis cinayətkarlıqla mübarizədə öz vəzifəsini layiqincə yerinə yetirir, paralel olaraq da karantin rejiminin tələbləri əleyhinə atılan addımları, davranışları tənzimləyir, qəlibə salmağa çalışır. Polislər öz xidməti vəzifələrini 8 saat yox, 16 saat həyata keçirməyə məcburdurlar. İnsanlar çox ağır, acı durum yaşana biləcəyinin fərqinə varmırlar” - deyə Ş.Əliyev qeyd etdi.

Ş.Əliyevin sözlərinə görə, kənd yerlərində yaşayan insanlar düşünürlər ki, toy, nişan, ad günü, yas mərasimlərini keçirsək, bundan rayon mərkəzində xəbər tutmazlar. “Lakin polis ölkənin hər yerində karantin qaydalarına necə əməl edilməsinə nəzarət edir. Görürsünüz ki, karantin rejiminin tələblərini pozaraq qanunsuz toy, ad günü, nişan edənlər polisin gözündən yayınmır, polis birbaşa kəndlərə gedir, qanunsuzluqların qarşısını alır. Bu, polisin vəzifə funksiyalarından doğan bir hal olmaqla yanaşı, həm də onun Qərargahın qoyduğu tələblərə uyğun fəaliyyətini qurmasının göstəricisidir” - deyə Ş.Əliyev vurğuladı.

İradə SARIYEVA

Son xəbərlər