Azərbaycanda koronavirusdan ev müalicələri də daha səmərəli nəticələr verməyə başlayır
Azərbaycanda xüsusi karantin rejimi bitməyib və koronavirusla mübarizə davam edir. İnfeksiyanın kütləvi yayılmasının qarşısının alınması məqsədilə gücləndirilmiş kütləvi nəzarət-profilaktik tədbirlər də davam etdirilir.
Koronavirusla mübarizə sahəsində görülən işlər artıq müsbət nəticəsini biruzə verir. Belə ki son günlər virusdan sağalananların sayı günü-gündən artır. Ekspertlər bildirir ki, sağalananların sayının artmasının səbəblərindən biri də xeyli adam şəxsi həkim tutaraq evdə müalicə almasıdır.
- “Birinci dalğa hələ sönməyib, ikinci dalğanın olub-olmamasını heç kim proqnozlaşdıra bilməz”
Professor, tibbi ekspert Adil Qeybulla bildirdi ki, Azərbaycandakı vəziyyət reyinfeksiyadır. Yəni birinci dalğa hələ sönməyib. İkinci dalğanın olub-olmamasını heç kim proqnozlaşdıra bilməz. Yəni virus güclü mutasiyaya uğrasa, ola bilsin ki, bununla da payızdan sonrakı mərhələdə yoxa çıxıb getsin. Ola bilsin ki, ikinci dalğa baş versin və yenə də ilin sonuna kimi çıxıb getsin. Bir sözlə bunu demək çətindir.
Həmsöhbətimiz onu da əlavə etdi ki, çoxlu sayda insan şəxsi həkim tutaraq evdə müalicə alır. Evdə müalicə alaraq o şəxslər həm özlərini təcrid edirlər, həm də xəstəliklə mübarizə aparırlar: Evdə müalicə olunan xəstələrlə bir necə saatdan bir mobil telefon vasitəsilə avtomatlaşdırılmış qaydada əlaqə saxlanılır. Bununla həm də həmin şəxsin evdə olmasına əminlik yaranır. Xəstənin evdə olub-olmadığı müəyyənləşdirilmədikdə pasiyentin evinə əraziyə baxan poliklinika tərəfindən müvafiq briqada göndərilir. Əgər pasiyent evdə olmazsa, ona birinci dəfə xəbərdarlıq edilir. Amma bu hal təkrar baş verərsə, həmin şəxs mütləq qaydada stasionar müəssisəsədə müalicə almaq üçün ambulans tərəfindən xəstəxanaya göndərilirk. Vətəndaşlar məsuliyyətli olmalıdırlar. Əks halda, onlar etibarsız pasiyent sayılaraq, stasionar şəraitdə müşahidə altında qalmalı olacaqlar”.
Qeyd edək ki, son günlər koronavirusdan sağalananların sayı üstünlük təşkil edir. Ev şəraitində müalicəsinin düzgün aparılması sağalananların sayının artmasına təsir edir.
Günel CƏLİLOVA
