Sosial şəbəkələrdə hər həkim koronavirusla mübarizədə cəmiyyətə öz bildiyi səviyyədə “dərs keçir” – bu doğrudurmu?
İnternetdən istifadə edənlərin sayı çoxluq təşkil edir. Əslində, internetdən əsasən informasiya əldə etmək, məktublaşmaq, şəkillərə və videoroliklərə baxmaq, ünsiyyət yaratmaq, oyun oynamaq və s. məqsədlər üçün istifadə edilir. Eyni zamanda, dünyanın müxtəlif yerlərindən fərqli insanların bir-birilə ünsiyyət qurduqları sosial şəbəkələrə də maraq artmaqdadır.
Sosial şəbəkə, sosial ünsiyyət insanların həyatına daxil oldu, ancaq hər kəs bunun yaxşı tərəfə olduğunu fikirləşmir. Qeyd edək ki, alimlər sosial ünsiyyət portallarını bəşəriyyəti məhvə aparan yeni bir silah növü kimi qiymətləndirirlər. Bir çox dünya aliminin fikrincə, sosial ünsiyyət portalı bəşəriyyəti məhvə aparan yeni bir silah növüdür, belə sosial şəbəkələr insanların internet asılılığını artırmaqla yanaşı, onları müasir həyatdan uzaqlaşdırır, beyinlərini “yuyur” və robot kimi sanki özünə tabe etdirir. Ən başlıcası, insanlarda mənəvi dəyərləri məhv edir və onları real həyatdan uzaqlaşdırır. Məsələn, real həyatda insanlar dostları ilə görüşür, ünsiyyət qurur, paylaşırlarsa, sosial şəbəkə insanı vaxtını və ömrünü real olmayan, virtual bir "həyata" sərf etməyə məhkum edir.
Qeyd etdiyimiz kimi, sosial şəbəkələr həyatımızın bir parçasına çevrilib. Hazırda öz ixtisasına uyğun aktiv sosial şəbəkə istifadəçiləri “Facebook” və ya “İnstagram” vasitəsilə məsləhət verməklə məşğul olurlar. Bu hal daha çox tibb peşəsi ilə məşğul olanlarda müşahidə olunur. Belə ki, müxtəlif xəstəliklər barəsində sosial şəbəkə istifadəçilərinə məlumat verirlər. Son günlər hər kəsi narahat edən koronavirusla da bağlı həkimlər müxtəlif fikirlər irəli sürürlər. Həkimlərin öz ixtisaslarına uyğun olmayan məsləhətlər verməsi, müxtəlif mövzularda müzakirələr açması nə dərəcədə düzgündür?
Həkim-ekspert Rasif Bağırov bildirdi ki, müasir dövrdə insanların sosial şəbəkələrdən istifadəsinə hansısa qadağanın qoyulması doğru deyil: “Hər bir peşə sahibi özü haqqında, öz ixtisası haqqında məlumat verə bilər. İnsanlara bunu qadağan etmək olmaz. Məsələn, elə bir biznesmen tapmaq mümkün deyil ki, o öz biznesinin inkişafı üçün mobil telefondan istifadə etməsin. Sosial şəbəkələrdən istifadə də belədir. Sadəcə, insanlar ayıq olmalı, seçici yanaşmalı, qərarlarında məsuliyyətli olmalıdırlar. Sosial şəbəkələrdə paylaşılanların hansının doğru, hansının yanlış olduğunu üzə çıxaracaq etalon yoxdur”.
Həmsöhbətimiz onu da əlavə etdi ki, sosial şəbəkələrdə müzakirə açmaq, əslində, həm də risqdir: “Burada hansısa istifadəçinin fikrinin təkzib olunması, onun əleyhinə kiminsə nə isə yazması onun karyerası üçün təhlükədir. Bu bir tərəfdən reklamdırsa, digər tərəfdən də risqdir”.
Günel CƏLİLOVA
