Nəzakət Məmmədova: “Ermənistanda gedən bəzi proseslərdən hiss edilir ki, sanki yürüdülən siyasət xalqı sülhə hazırlamağa yönəlir”
Azərbaycan Prezidenti İlham Əliyev Prezident Sarayında şəhid ailələri ilə görüşündə çıxışı zamanı deyib ki, ölkəmiz Dağlıq Qarabağ münaqişəsinin həlli üzrə diplomatik müstəvidə maksimum nəticəyə nail ola bilib.
Prezident bildirib ki, Ermənistan-Azərbaycan Dağlıq Qarabağ münaqişəsinin həlli bizim üçün ən başlıca vəzifədir. Ölkəmizin ərazi bütövlüyünün bərpası ən vacib məsələdir: “Diplomatik müstəvidə biz maksimum nəticəyə nail ola bilmişik. Bu gün bütün dünya bu münaqişənin ölkəmizin ərazi bütövlüyü çərçivəsində həll olunmasını bildirir. Çoxsaylı qətnamələr, qərarlar, ikitərəfli formatda imzalanmış müqavilələr, bəyannamələr ölkəmizin ərazi bütövlüyünə dəstək ifadə edir. Dünyanın aparıcı beynəlxalq təşkilatları – BMT, onun Təhlükəsizlik Şurası, Qoşulmama Hərəkatı, ATƏT, İslam Əməkdaşlıq Təşkilatı və digər təşkilatlar bu münaqişənin ölkəmizin ərazi bütövlüyü çərçivəsində həll olunmasını tələb edir. Yəni biz bütün vasitələrdən istifadə edirik ki, məsələni həll edək, torpaqlarımızı işğalçılardan azad edək.
Onu da bilməliyik ki, bu gün dünyada güc amili ön plana çıxıb. Biz ordu quruculuğu istiqamətində bu günə qədər böyük işlər görmüşük. Qeyd etdiyim kimi, döyüş meydanlarında da öz gücümüzü göstərmişik. Bütün dünyaya göstərmişik ki, Azərbaycan xalqı və Azərbaycan dövləti bu işğalla heç vaxt barışmayacaq”.
Prezident ölkəmizin Dağlıq Qarabağ münaqişəsinin həlli üzrə diplomatik müstəvidə maksimum nəticəyə nail ola bilməsini vurğulamaqla əldə olunan daha hansı nailiyyətlərə diqqəti yönəltmək istəyib?
Politoloq Nəzakət Məmmədova qəzetimizə açıqlamasında bildirdi ki, ölkəmizlə bağlı baş verən bütün hadisələr barədə ən müfəssəl və dəqiq məlumata malik olan şəxsin Prezidentin olduğuna qətiyyən şübhə yoxdur: “Əgər o hesab edirsə ki, Dağlıq Qarabağ münaqişəsi ilə bağlı gedən proseslərdə ciddi uğurlar əldə edilib, deməli, bu, real dəlillərə əsaslanır. 2018-ci ildə Ermənistanda baş verən bütün hadisələr həmin ölkədəki xaosu, anarxiyanı daha da dərinləşdirdi. Eyni zamanda, biz Ermənistanın xarici siyasətində də uğursuzluqları gördük. Onların köhnə müttəfiqləri ilə münasibətlərinin korlandığının şahidi olduq. Hətta Ermənistanın hərbi cəhətdən bağlı olduğu KTMT kimi qurumla da münasibətləri son dərəcədə gərginləşdi. Təbii ki, düşmən ölkənin bütün sahələrdə zəifləməsi Azərbaycanın üstünlüyü anlamına gəlir. Ölkəmiz həm Ermənistanın zəifləməsi fonunda diplomatik üstünlüyünə nail oldu. Eyni zamanda, ölkə başçımızın rəhbərliyi altında yürüdülən uğurlu diplomatik kurs bu üstünlükləri şərtləndirmiş oldu. Artıq Ermənistanda erməniçilik ideologiyasının ölkədə və onun hüdudlarından kənarda yayılması ciddi problemə səbəb olub. Hətta həmin ölkənin daxilində cəsarətlə belə fikirlər sələnir ki, Ermənistanı düşdüyü bəladan işğaldan əl çəkmək kimi siyasət qurtara bilər. İndi hakimiyyətə yeni gələn Paşinyanın bir qədər konstruktiv mövqe sərgiləyəcəyinə dair gözləntilər var. Çünki onların başqa çıxış yolları da qalmayıb”.
Politoloqun sözlərinə görə, Azərbaycanın diplomatik nailiyyətlərini şərtləndirən bir çox əlavə amil də mövcuddur: “Ermənistan dövlətinin daxili və xarici siyasətində baş verən amillər. Ermənistan cəmiyyətində klanlar arasında ziddiyyətin dərinləşməsi. Eyni zamanda, diasporla Ermənistan hakimiyyəti arasındakı uçurumun dərinləşməsi. Qarabağ separatçılarının rəhbəri faktiki olaraq təklənmiş vəziyyətdə qalıb, Paşinyandan çox, Moskva ilə hesablaşmaq zorundadır. Görünən budur ki, Paşinyan özünü ABŞ və Qərb tərəfdarı kimi aparmaqla, faktiki olaraq, Rusiyanın dəstəyindən tam məhrum olub. Bu da bizim optimizmimizi artırır. Ermənistanda gedən bəzi proseslərdən hiss edilir ki, sanki yürüdülən siyasət xalqı sülhə hazırlamağa yönəlir. Təbii ki, Paşinyana bununla bağlı tapşırığın hegemon ölkələr tərəfindən verildiyi dəqiqdir. Paşinyanın da Azərbaycanın qəbul etdiyi formatda İlham Əliyevlə danışıqlar aparması bizim üstünlüyümüzü açıq şəkildə ortaya qoyur. Demək olar ki, Paşinyan əvvəl səsləndirdiyi bütün ambisiyalı fikirlərindən imtina edib”.
Məhəmmədəli QƏRİBLİ
