Aygül İsayeva: “Nərimanovun əsl ev muzeyi Mirzə Şəfi Vazeh küçəsində idi, evi darmadağın etdilər, küçənin adını daşıyan lövhə də oradan götürülüb”
Son zamanlar Gürcüstanda baş verən bəzi xoşagəlməz olayları diqqətlə izləyirik. Bu ölkədə əli azərbaycanlıların və gürcülərin qanına batan, yüzlərlə insanı qətlə yetirən cani erməni Mixail Avaqyana büst ucaldılması Azərbaycan və gürcü ictimaiyyətini ciddi narahat edir.
Gürcü və Azərbaycan xalqlarının düşməninə bu ölkədə büst ucaldılır, amma bu ölkədə doğulan, həyatını Gürcüstan xalqının maariflənməsinə, cəhalət buxovundan azad olunmasına həsr edən böyük yazıçı, həkim, ictimai-siyasi xadim Nəriman Nərimanovun xatirəsinə hörmətsizlik edilir. Söhbət ondan gedir ki, Marneuli şəhərində N.Nərimanovun adını daşıyan Mədəniyyət Sarayı artıq onun adını daşımır, yəni onun adı Mədəniyyət Sarayından götürülüb. N.Nərimanovun adının yenidən Mədəniyyət Sarayına qaytarılması üçün soydaşlarımız dəfələrlə yerli icra orqanlarına, eləcə də digər instansiyalara müraciət etsələr də, hələlik ortada müsbət nəticə yoxdur.
Onu da vurğulayaq ki, Gürcüstanın Marneuli rayonunda Azərbaycanın görkəmli dövlət xadimi və ədibi Nəriman Nərimanovun adının yaşadılması tələbi ilə aksiya keçirilib.
İqtisadiyyat üzrə fəlsəfə doktoru, gənc fəal Aygül İsayeva “Bakı-Xəbər”ə bildirdi ki, tədbirdə ziyalılar və ictimaiyyət nümayəndələri iştirak ediblər. O, həmçinin, vurğuladı ki, məlumatlara görə, Marneulidə N.Nərimanovun büstünün olduğu parka Merab Kostavanın adı veriləcək və bununla bağlı yerli sakinlər arasında imzatoplama kampaniyasına başlanıb. Onun sözlərinə görə, İrakli Kveladze adlı şəxs qeyd edib ki, parka M.Kostavanın adının verilməsindən sonra N.Nərimanovun büstünün yerinin dəyişdirilməsinə də ehtiyac yaranacaq. “Biz buna qəti etirazımızı bildiririk və abidənin götürülməsinə heç vaxt yol verməyəcəyik” - deyə A.İsayeva qeyd etdi. Onun sözlərinə görə, ziyalılar da çıxışlarında N.Nərimanovun Azərbaycan və Gürcüstandakı böyük xidmətlərindən danışıblar və onun adının Gürcüstanda yaşadılması uğrunda mübarizəni yerli azərbaycanlıların mənəvi borcu adlandırıblar. İctimaiyyət nümayəndələri N.Nərimanovun büstünün olduğu parkın abadlaşdırılmasına da ehtiyac olduğunu deyiblər. O dedi ki, tədbirdə Marneuli rayon bələdiyyəsinin sədri Amiran Giorqadzeyə ünvanlanmış müraciət oxunub və sənəddə Mədəniyyət Evinin qarşısındakı parka N.Nərimanovun adının verilməsi, Qızılhacılı kənd ictimai məktəbinə böyük ədibin adının bərpa olunması tələb olunub. “Mən aksiya zamanı müraciəti orada iştirak edənlərin qarşısında oxudum və sənəddə əks olunan məsələlərlə razılaşanlardan ona imza atmağı xahiş etdim. Müraciəti 100-dən çox adam imzaladı və biz artıq həmin ərizəni Marneuli bələdiyyəsinə təqdim etmişik. 10 iş günü ərzində cavab verilməlidir, bundan sonra meriya və bələdiyyənin münasibətini biləcəyik. 2018-ci il 6 avqustda Nərimanovun adının Marneuli Mədəniyyət Evinə bərpa olunması ilə bağlı ərizə və imzalar vermişdik, cavab yarım ildir gecikdirilir. Ümid edirəm verdiyimiz ərizənin cavabını 1 il gözləməyəcəyik. Nərimanovun adı Marneuli Mədəniyyət Evindən və Qızılhacılı kənd məktəbindən götürülüb, biz yazılı müraciətimizdə onun adının sözügedən müəssisələrə bərpa olunmasını xahiş etmişik. Bir də Nərimanovun büstü yerləşən parka onun adının verilməsini istəyirik. Qeyd etdiyim kimi, gürcülər bu parka Kostavanın adının verilməsi ilə bağlı 2018-ci ildə ərizə veriblər. Əgər biz indidən səsimizi çıxarmasaq, bələdiyyə və meriya gürcülərin ərizəsi əsasında parka Kostavanın adını verə bilərlər, belə bir mümkünlük təbii ki, var. Vətəndaşlar müraciət edib və bələdiyyə və meriya bu istəyi nəzərə ala bilərlər. Bu baş verən halda, Nərimanovun büstünü avtomatik parkdan götürüb başqa yerə qoyacaqlar. Qabaqlayıcı addımlar atılmalıdır”.
A.İsayeva Tiflisdə Bakı, Mirzə Şəfi Vazeh, Mirzə Fətəli Axundov, İbrahim İsfahanlı, Nizami Gəncəvi, Əhməd Cavad, Mir-Həsən Vəzirov, Rəşid Behbudov (Poniçala (Soğanlıq) qəsəbəsində) və Azərbaycanın digər fikir adamlarının adını daşıyan küçələrə xüsusi löhvələr vurulmasının da vacibliyini qeyd etdi.
“Nərimanovun əsl ev muzeyi Mirzə Şəfi Vazeh küçəsində idi, evi darmadağın etdilər, küçənin adını daşıyan lövhə də oradan götürülüb, guya hansısa xarici şirkət nəsə tikir. Amma o küçədə uçurulan bircə Nərimanovun evi oldu, başqa ətrafdakı evlərə toxunmayıblar” - deyə müsahibimiz bildirdi.
Qeyd edək ki, bir müddət əvvəl Gürcüstan hökuməti Tiflisdə görkəmli azərbaycanlıların adlarını daşıyan küçələrdəki barelyeflərin yenilənəcəyini açıqlamışdı. Lakin hələ də bu reallaşmayıb.
İradə SARIYEVA
