Naqif Həmzəyev: “Şəhid ailələrinə diqqət və qayğının daha bir bariz nümunəsi ölkə başçısı İlham Əliyevin və birinci xanım Mehriban Əliyevanın yanvarın 28-də Prezident Sarayında şəhid ailələri ilə görüşü oldu”
Azərbaycan dövləti mütəmadi olaraq şəhid ailələrinə diqqət və qayğı göstərir. İndiyə kimi şəhid ailələrinin sosial rifah halının yüksəldilməsi üçün dövlət tərəfindən saysız işlər görülüb. Prezident İlham Əliyev və ölkəmizin Birinci vitse-prezidenti Mehriban Əliyeva tez-tez şəhid ailələri ilə görüşür, onların qayğı və problemləri ilə maraqlanır, onları qayğılandıran məsələlərin operativ şəkildə həll edilməsi istiqamətində addımlar atırlar.
Məlum olduğu kimi, Azərbaycan Respublikasının Prezidenti İlham Əliyev və birinci xanım Mehriban Əliyeva yanvarın 28-də Prezident Sarayında şəhid ailələri ilə növbəti dəfə görüşüblər.
Millət vəkili Naqif Həmzəyev “Bakı-Xəbər”ə açıqlamasında Prezident İlham Əliyevin və ölkəmizin Birinci vitse-prezidenti Mehriban Əliyevanın hər zaman şəhid ailələrinə diqqət və qayğı göstərdiyini, onların sosial rifah halının yüksəlməsi üçün böyük işlər gördüyünü bildirdi. “Vətən yolunda özlərinə əbədiyyət heykəli ucaldan şəhidlərimiz xalqımızın qəhrəmanlıq tarixində daim yaşayır və xatırlanırlar. Azərbaycan dövlətinin xilaskarı və qurucusu Heydər Əliyevin dediyi kimi, “Vətən yolunda şəhid olanlar ölmürlər, xalqın qəlbində, ürəyində əbədi yaşayırlar. Biz onların qəhrəmanlığı, şəhidliyi ilə fəxr edirik. Bu, bizim millətimizin iftixarıdır”.
Vətən və xalq naminə şəhid olan Vətən övladlarının ailələrinin sosial müdafiəsinin gücləndirilməsi, onların problemlərinin vaxtında həllinə nail olunması, hər cür qayğı ilə əhatə olunması ölkə Prezidenti İlham Əliyevin rəhbərliyi ilə həyata keçirilən siyasətin əsas istiqamətlərindəndir. Ölkə başçısı tərəfindən bu istiqamətdə mütəmadi imzalanan fərman və sərəncamlar çoxsaylı ailəyə böyük sevinc bəxş etməklə yanaşı, bu sahəyə göstərilən diqqətin bariz nümunəsi kimi ictimaiyyət tərəfindən təqdirəlayiq hal kimi qiymətləndirilir. Şəhid ailələrinin sosial ehtiyaclarının dövlət tərəfindən ödənilməsi, həmçinin, Vətən uğrunda öz canından keçmiş şəhidlərin və Qarabağ müharibəsi əlillərinin övladlarının təhsil haqqından azad edilməsi, eyni zamanda, bu insanların mənzil və avtomobillərlə təmin olunması davamlı xarakter daşıyır.
Şəhid ailələrinə diqqət və qayğının daha bir bariz nümunəsi ölkə başçısı İlham Əliyevin və birinci xanım Mehriban Əliyevanın yanvarın 28-də Prezident Sarayında şəhid ailələri ilə görüşü oldu.
Görüşdə Prezident seçildikdən sonra ilk fərmanının məhz şəhid olmuş hərbi qulluqçuların ailələrinin sosial müdafiəsinin gücləndirilməsi ilə bağlı olduğunu qeyd edən cənab İlham Əliyev 10 minə yaxın şəhid ailəsinə 11 min manat məbləğində birdəfəlik ödəmələrin verilməsinin nəzərdə tutulduğunu bildirib, artıq bu prosesin başladığını və 3 mindən çox şəhid ailəsinin vəsaiti aldığını da vurğulayıb.
Dövlət başçısının şəxsən birdəfəlik ödəməni almaq üçün istifadə olunan plastik kartları şəhid hərbi qulluqçuların vərəsələrinə təqdim etməsi Azərbaycanda hər bir vətəndaşa, şəhid ailəsinə olan diqqət və qayğısının bariz nümunəsidir” - deyə N.Həmzəyev bildirdi.
İradə SARIYEVA
