Ermənistanda siyasi partiya sədri Mqer Yeqiazaryanın həbsxanada uzunmüddətli aclıq aksiyası keçirdikdən sonra vəfat etməsi gündəmdədir. Siyasi fəaliyyətinə görə həbsə atılan və barəsində çıxarılan ədalətsiz məhkəmə qərarı ilə razılaşmayaraq aclıq aksiyasına başlayan partiya sədrinin ölümünə beynəlxalq qurumlar, təşkilatlar heç bir reaksiya verməyiblər.
Siyasi məhbusun ölümünə görə bu qurumlar Ermənistan hökumətinə heç bir etirazını bildirməyib, bununla bağlı qətnamə qəbul etməyiblər. Ümumiyyətlə, Ermənistan cəmiyyətində baş verən heç bir siyasi anormallığa qarşı bu qurumlar etiraz səsini qaldırmayıb. Bu hadisələr bir dəfə də olsun Avropa Şurasının, ATƏT-in, eləcə də digər beynəlxalq təsisatların tribunalarında müzakirə predmetinə çevrilməyib. Ancaq Azərbaycanda baş verən ən kiçik bir məişət hadisəsinə görə həbs edilənlərin vəziyyəti ilə bağlı xüsusi qətnamələr, sənədlər qəbul edilib. Halbuki, Azərbaycanda siyasi məhbus problemi yoxdur, hazırda siyasi məhbus problemi Ermənistanı öz cənginə alıb. Qeyd etdiyimiz kimi, bu da beynəlxalq qurumları qətiyyən ilgiləndirmir.
Millət vəkili Aqil Abbas “Bakı-Xəbər”ə bildirdi ki, bütün beynəlxalq təsisatlar Ermənistanda yaşanmış olan və hazırda yaşanan bu kimi ciddi problemlərə göz yumurlar. Bununla da sözügedən qurumların ayrıseçkilik sərgilədiyini vurğulayan millət vəkili hesab edir ki, Ermənistanda siyasi partiya sədrinin aclıq aksiyası keçirməsi nəticəsində ölməsinə beynəlxalq qurumların göz yummasının bir sıra səbəbləri var. “Həmin qurumlar Ermənistanda baş verən heç bir qanlı olaya reaksiya vermirlər. Bir neçə il bundan əvvəl Ermənistan parlamentində deputatları güllələdilər, bundan sonra bu ölkədəki iğtişaşlarda nə qədər insan tələfatı baş verdi, lakin bütün beynəlxalq institutlar, Avropa Şurası, ATƏT və digərləri bu qanlı olaylara heç bir münasibət bildirmədilər. Bütün bu hadisələrin üzərindən sükutla keçdilər. Beynəlxalq qurumlar Ermənistanda həm keçmişdə baş verənlərə, həm də partiya sədrinin həbsxanada ölməsinə ona görə reaksiya vermirlər ki, ermənilər onların qohum-əqrəbalarıdır. Eyni zamanda da onlar münasibət bildirməkdən qorxurlar. Çünki Ermənistan Rusiyanın bir muxtar respublikasıdır, onun obyektlərindən biridir” - deyə millət vəkili qeyd etdi.
A.Abbasın sözlərinə görə, beynəlxalq qurumlar Azərbaycanda baş verən hadisələrə müəyyən çalar verərək, bu hadisələrdən bizə qarşı təzyiq vasitəsi kimi istifadə etmək marağı güdürlər. “Ermənistanda, ümumiyyətlə, demokratiya yoxdur. Paşinyanın yalandan ora-bura qaçması qurama şeylərdir. Hamısı Rusiyanın ssenarisi əsasında işlənən məsələlərdir. Bizə qarşı xoşagəlməz münasibət göstərən beynəlxalq qurumlar ikiüzlülük edirlər. Biz də bu qurumlara yekdil cavab verməliyik” - deyə A.Abbas vurğuladı.
İradə SARIYEVA
