Azər Həsrət: “Bu məsələyə dair qətnamə Mehmanla bağlı qətnamədən daha sərt – ultimativ olmalıdır”
Məlum olduğu kimi, “Ermənistan qartalları – Vahid Ermənistan” partiyasının sədr müavini, “Haynews.am” saytının məsul şəxsi Mqer Yeqiazaryan saxlandığı “Nubaraşen” həbsxanasında keçirdiyi uzunmüddətli aclıq aksiyası nəticəsində ölüb. Bu hadisənin geniş əks-sədası bütün dünyanı bürüyüb. Hətta dünyanın nüfuzlu nəşrlərindən olan “The Washington Post” qəzeti “Erməni siyasi xadim aclıq aksiyasından sonra öldü” başlıqlı məqalə dərc edib.
Qeyd olunub ki, səhər saat 06:15 radələrində 51 yaşlı Yeqiazaryanın vəziyyəti pisləşib. Təcili tibbi yardım əməkdaşlarının müdaxiləsinə baxmayaraq, 20 dəqiqədən sonra erməni siyasətçi dünyasını dəyişib. Ermənistan Ədliyyə Nazirliyinin Penitensiar Xidməti onun ölümünü təsdiqləyib.
Ötən ilin dekabrında həbs olunan M.Yeqiazaryan 2014-2018-ci illərdə fırıldaqçılıq yolu ilə hərbçiləri işlə təmin etmək, yaxud xidməti vəzifəsini yüksəltmək adı ilə külli miqdarda – 4 milyon 775 min dram vəsait mənimsəməkdə ittiham olunurdu. Lakin Yeqiazaryan ittihamları rədd edərək, həbsə atılmasını siyasi səbəblərlə əlaqələndirirdi.
Siyasi məhbusun ölümündən sonra oğlu Vazqen Yeqiazaryan Ermənistanın baş naziri və parlamentin bir qrup deputatına açıq məktub ünvanlayaraq, onları atasının ölümünə bais olmaqda günahlandırıb. Vazqen Paşinyanın M.Yeqiazaryanı siyasi səbəblərlə həbsə atdırdığını deyib:
“Nikol Paşinyan, sizin bu cinayət işinə müdaxilənizin səviyyəsini biz yəqin ki, sonadək tam bilməyəcəyik. Amma siz “nə olursa-olsun, bu adamı həbsə atmaq lazımdır” prinsipi ilə çıxış edərək davranmısınızsa, onda diləyirəm ki, mənlə qardaşımın və anamın çəkdiyi bütün əzablar sizin həyat yoldaşınız və oğlunuzun da başına gəlsin və onlar da eyni təcrübəni yaşasınlar. Unutmayın ki, icraçılar şəxsən sizə yox, sizin vəzifənizə, kreslonuza tabedirlər. Bu kreslo isə bu gün sizdədir, sabah isə…”
Çox maraqlıdır ki, aşkar siyasi motivlərə görə həbs edilən siyasətçinin etiraz səbəbindən canına qəsd etməsinə beynəlxalq qurumlar lazımi şəkildə reaksiya vermirlər. Biz xüsusilə də Avropa Parlamentinin bu məsələ ilə bağlı səbəbi bəli olmayan susqunluğunu müşahidə edirik. Ən azından, bu hadisəni bu yaxınlarda Azərbaycanda “qaynadılan” Mehman Hüseynovla bağlı hadisə ilə müqayisə edib, dəhşətli fərqli və qərəzli yanaşmanı üzə çıxarmış oluruq. Məgər Avropa Parlamenti üçün baş verən bu dəhşətli hadisə M.Hüseynovun yoqurt yeyə-yeyə “aclıq “ etməsindən daha önəmsiz və maraqsızdır? Necə ola bilir ki, heç bir siyasi fəaliyyəti və ali təhsili olmayan gənc blogerin vəziyyətindən guya narahat olan Avropa Parlamenti onunla bağlı iclas keçirib xüsusi qətnamə qəbul edir, amma Ermənistanda həqiqətən aclıq edib ölən bir siyasətçinin həyatına laqeyd olur. Ermənistanda yaşanan bu siyasi qətllə bağlı məsələnin Avropa Parlamentində müzakirə edilib, xüsusi qətnamə qəbul olunması tələbi ilə Azərbaycanın həmin quruma xüsusi müraciət ünvanlaması təklifinə ekspertlərin münasibəti necədir?
Millət vəkili Aydın Mirzəzadə “Bakı-Xəbər”ə açıqlamasında bildirdi ki, millət vəkilləri mütləq belə bir təşəbbüslə çıxış etməlidir və edəcəklər də: “Avropa Parlamenti qarşısında bu məsələnin araşdırılması və müvafiq sənədin qəbul olunmasını tələb etmək bizim haqqımızdır. Amma mən inanmıram ki, Avropa Parlamenti bu məsələni müzakirə etməkdə maraqlı olsun. Çünki Ermənistanda baş verən hadisə onun siyasi marağında deyil. Baxmayaraq ki, buna heç bənzəməyən məsələ ilə bağlı Avropa Parlamenti süni surətdə bir gərginlik yaratmaq istədi. Amma öz istəklərinə çata bilmədilər. Digər tərəfdən, Ermənistanda siyasi bir liderin həbsxanada etiraz əlaməti olaraq özünü öldürməsi kimi ciddi hadisəyə Avropa qurumlarının susqun mövqeyi göstərdi ki, xaricdəki bəzi siyasi dairələr eyni çoğrafi məkanda baş verən bənzər hadisələrə fərqli yanaşma ortaya qoyurlar. Bu isə ondan irəli gəlir ki, onların nəzarəti altında olan dövlətlərdə baş verən hətta ciddi nöqsanlar belə bağışlanır. Müstəqil siyasət yürüdən ölkələrdə baş verməyən hadisələrə belə nöqsan donu geyindirib, ondan təzyiq vasitəsi kimi istifadə edirlər. Bununla onlar boyun əyməyən ölkələri siyasi böhrana salmağa cəhd edirlər. Azərbaycan da müstəqil siyasət yürüdən ölkə olduğu üçün, Ermənistanla müqayisədə belə ikili standarta məruz qalır. Bütün bunlara baxmayaraq, biz Avropanın bütün qurumları qarşısında bu məsələyə obyektiv qiymətin verilməsini tələb etməliyik”.
Media eksperti Azər Həsrət də qəzetimizə açıqlamasında bildirdi ki, Ermənistandakı bu aclıq aksiyası və ölümün bizdəki siyasi proseslər fonunda baş verməsi də diqqətimizdən qaçmır: “Ötən ilin sonunda aclıq aksiyasına başlamış məlum M.Hüseynovun məsələsini deyirəm. O, bu Mqerdən düz 20 gün sonra aclıq elan etmişdi. Bir balaca dözüb sonra qatıqla, xamayla, südlə “aclığını” davam etdirirdi. “Vaşinqton Post” qəzeti aləmi qatmışdı. Beynəlxalq təşkilatların səsindən qulaq tutulurdu. Hətta Avropa Parlamenti ayrıca qətnamə də qəbul etdi.
M.Hüseynovun, əslində, elə də ciddi problemi yox idi. Heç ona qarşı qeyri-humanist hərəkət də edilmirdi. Di gəl ki, az qala bütün dünya çapında Azərbaycana qarşı kampaniya başlamışdı…
İkili standartın daha bir örnəyi deyilmi bu? Əlavə olaraq, Azərbaycan dövlətinin humanizmi bir daha sübut olunmadımı? Bəzilərinin bəh-bəhlə bizə təriflədiyi Ermənistan vətəndaşının canından olmasına görə-görə susduqca susdu. Azərbaycan isə heç ciddi əsaslar olmadığı halda belə öz vətəndaşının – məhbus M.Hüseynovun üzərində əsdikcə əsdi. Hətta o həddə ki, ölkə Prezidenti İlham Əliyev şəxsən Mehmanın müraciətini nəzərə alıb humanizm sərgilədi, ona münasibətin yumşaldılması üçün qanun çərçivəsində tədbir görülməsi üçün yolu açdı. Lakin yenə də biz ittiham edilirik.
M.Yeqiazaryan öz ölümü ilə dünyanın insan haqları dəllallarını mat qoydu. Azərbaycanın haqlı mövqeyini öz ölümü ilə dünyaya hayqırdı bu Mqer. Həm Ermənistan hakimiyyətinin, həm də Azərbaycan hakimiyyətinin əsl mahiyyətini göstərdi o.
Mqerin ölümü ilə bir daha əmin olduq ki, Azərbaycanda nə olur-olsun, o qurumlar, o mərkəzlər üstümüzə gəlməyə davam edəcək. Ermənistanda isə vətəndaşı aclığa məhkum edib öldürsələr belə, o dəllallar susmağa davam edəcəklər.
Heç olmasa indi hərəkətə keçsin bu insan haqları dəllalları. Keçərlərmi? İnanmırıq, amma hər halda gözləmək istərdik. Görək necə davranırlar? Görək Avropa Parlamenti bu məsələ ilə də bağlı qətnamə qəbul edəcəkmi? Bizcə, bu məsələ ilə bağlı qətnamə Mehmanla bağlı qətnamədən daha sərt – ultimativ olmalıdır. Təbii ki, bütün mümkün vasitələrlə bu məsələnin Avropa Parlamentində araşdırılmasına çalışmalıyıq”.
Məhəmmədəli QƏRİBLİ
