Faiq Ələkbərli: “Gürcüstan hökuməti Avaqyanın büstünün sökülməsinə qərar verməklə ermənilərin bu arzusunu gözlərində qoyacaq”
Ermənilərin cinayətkarlara, əli minlərlə günahsız insanın qanına batanlara heykəl, büst qoyması artıq xoşagəlməz bir ənənəyə çevrilib. Əslində, caniyə, separatçıya deyil, qəhrəmanlara heykəl qoyulmalıdır.
Azərbaycan ərazilərinin işğalında iştirak etmiş, eyni zamanda da, Abxaziyada gürcülərə qarşı vuruşmuş cinayətkar Mixail Avaqyana Gürcüstanın Buqaşen kəndində büst qoyulması bu ölkənin ictimaiyyəti tərəfindən də ciddi etirazla qarşılanır. Gürcüstanda fəaliyyət göstərən bir sıra QHT-lər Avaqyana büst qoyulması hadisəsini Azərbaycan və Gürcüstan arasındakı münasibətlərin pozulmasına yönələn erməni məkri hesab edirlər. QHT rəhbərləri erməni əsilli bir caniyə Gürcüstan torpağında büst qoyulmasının yolverilməz olduğunu qeyd etməklə yanaşı, o abidənin tezliklə götürüləcəyinə də ümid edirlər. Gürcüstan QHT-ləri həmin erməni hərbçinin təkcə azərbaycanlıları deyil, həm də Abxaziyada gürcüləri də qətlə yetirdiyini deyirlər. Erməniyə büst qoyulmasını biabırçılıq sayan QHT-lər ümid edirlər ki, bu xoşagəlməz hal tezliklə Gürcüstan hökuməti tərəfindən aradan qaldırılacaq.
Hazırda Azərbaycanda olan Gürcüstandakı “Avropa Diplomatları Assosiasiyasının” sədri Zurab Qventsadze də büstün qoyulmasını səhv addım adlandırıb. Onun fikrincə, həmin erməni hərbçi hətta gürcüləri də öldürüb.
“Avropa Diplomatları Assosiasiyasının” üzvü Tatia Şavqulidze isə bu səhvin tezliklə aradan qaldırılacağını düşünür. Gürcü fəalların sözlərinə görə, əslində büstün qoyulması ermənilər tərəfindən düşünülmüş addımdır. Çünki bu üsulla onlar Azərbaycanla Gürcüstanın münasibətlərini pozmağa çalışırlar.
Məlumdur ki, Abxaziyada ermənilərin yaratdığı “Baqration» batalyonunun canfəşanlığı, onların dinc gürcü əhaliyə qarşı xüsusi amansızlığı o qədər də uzaq keçmişdə baş verməyib.
Görünən gerçək mənzərə budur ki, bir separatçıya, caniyə bu ölkədə büst qoyulması Gürcüstanda böyük etirazlara səbəb olub. Gürcü ictimaiyyəti Gürcüstan hökumətindən büstün sökülməsi ilə bağlı müvafiq tədbirlər görməyi tələb edir.
Tarix üzrə fəlsəfə doktoru, tarixçi alim Faiq Ələkbərli bakı-xeber.com-a bildirdi ki, bu gün Gürcüstan ictimaiyyətinin etirazına dünyanın bütün mütərəqqi qüvvələri qoşulmalıdır. O, hesab edir ki, tez bir zamanda Avaqyana qoyulan büst yerlə yeksan edilməlidir. Bu məsələ ilə bağlı Gürcüstan hökumətinin ortaya siyasi iradə qoymalı olduğunu deyən alimin sözlərinə görə, etirazçılar tezliklə büstün sökülməsinə nail ola bilərlər. “Ümumiyyətlə, Gürcüstanda qatı şovinist, separatçı bir erməniyə heykəl, büst qoyulması yolverilməzdir. Əlbəttə, bunu Azərbaycan da, Gürcüstan da, dünyanın bütün mütərəqqi qüvvələri də etirazla qarşılamalıdır, qarşılayırlar da. Azərbaycan bir neçə istiqamətdə, o cümlədən də Xarici İşlər Nazirliyi səviyyəsində hadisəyə etirazını bildirib. Həmin şəxsin əli həm Dağlıq Qarabağda azərbaycanlıların qanına batıb, həm də o Abxaziyada gürcülərə qarşı vuruşub, o, dinc gürcü əhalisini qətlə yetirib. Bilirsiz, bu gün gürcü xalqı yaxşı anlayır ki, Gürcüstan torpağında bir erməni cəlladına, faşistinə heykəl qoyulması cinayətkarın “qəhrəman” kimi təqdim edilməsidir, bu isə yolverilməzdir. Onlar buna qətiyyən müsbət hal kimi yanaşmır. Ona görə də, Gürcüstan ictimaiyyəti Avaqyana qoyulan büstün sökülməsini tələb edir. Düşünürəm ki, gürcülər bu mübarizədə meydanda tək qalmalı deyil, dünyanın sülhsevər qüvvələri də onların səsinə səs verməlidir. Bu büst-heykəl qəhrəmana deyil, mürtəce bir şəxsə qoyulub. Mixail Avaqyanın da törətdiyi qətllər, cinayətlər bütün bəşəriyyətə qarşı yönələn aktlardır. Gürcü xalqının tələbləri yerinə yetirilməli və Avaqyana qoyulan heykəl sökülüb atılmalıdır” - deyə F.Ələkbərli bildirdi.
O, həmçinin vurğuladı ki, bu gün Gürcüstan cəmiyyətində ermənilər özlərinə kök salıblar. Avaqyana qoyulan büst də Gürcüstan hökumətinin iradəsini əks etdirmir. Bu heykəlin Gürcüstan və Azərbaycan arasındakı isti münasibətlərin pozulmasına hesablandığını deyən F.Ələkbərlinin sözlərinə görə, ermənilərin bu planı Gürcüstan hökuməti tərəfindən pozulmalıdır. “Erməni separatizmindən təkcə Azərbaycan deyil, Gürcüstan da ziyan çəkib, hazırda da çəkir. Ermənilər bu büstü orada qoymaqla iki dövlət arasındakı dostluq bağlarını zədələmək istəyirlər. Ancaq hesab edirəm ki, Gürcüstan hökuməti Avaqyanın büstünün sökülməsinə qərar verməklə ermənilərin bu arzusunu gözlərində qoyacaq” - deyə müsahibimiz bildirdi.
İradə SARIYEVA
