“Kimliyindən asılı olmayaraq sosial şəbəkələrdə insanların söyüş və ya təhqir olunması qəbulolunmazdır”
İnternet müasir dünya insanının həyatının ayrılmaz parçasına çevrilib. Bu, günün reallığıdır və çox az adam tapılar ki, internetdən istifadə etməsin.
Məlumdur ki, Azərbaycanda internetdən istifadə tamamilə azaddır və istifadəçilər istədikləri saytlara daxil ola və onları təmin edə bilən informasiyanı ala bilər, başqa bir tərəfdən də istədikləri xəbərləri, məlumatları, vizual materialları internetdə yerləşdirib yaya bilərlər.
Lakin internetdən, heç bir məhdudiyyətlə qarşılaşmadan istifadə etmək imkanı bəzi insanların bundan sui-istifadə etməsinə gətirib çıxarır. Təəssüf ki, bəzi şəxslər sosial şəbəkədən qara niyyətlə istifadə edir. Onlar hətta Azərbaycan ictimaiyyətini də sosial şəbəkə vasitəsilə təhqir edirlər.
Sosial şəbəkələrdə bəzən insanların şərəf və ləyaqətinin toxunulmazlıq hüququnun pozulduğunu millət vəkilləri, ictimai xadimlər dəfələrlə açıqlamalarında bildiriblər. Bu məsələnin necə həll olunmasını öyrənmək üçün "Novoye vremya" qəzetinin baş redaktoru Şakir Ağayev “Bakı-Xəbər”ə açıqlamasında qeyd etdi ki, sosial şəbəkələr artıq hər kəsin həyatına daxil olub: “Kimliyindən asılı olmayaraq sosial şəbəkələrdə insanların söyüş və ya təhqir olunması qəbul olunmazdır. Ədalətli cəmiyyətdən danışmaq istəyənlər söyüş, təhqir hədəfi ilə insanların üzərinə getməməlidir. Kimliyindən, peşəsindən, harada yaşamasından asılı olmayaraq söyüş şəbəkəsi qəbul olunmazdır. Nəzərə almaq lazımdır ki, sosial şəbəkə ailə üzvlərimizin, cəmiyyətimizin, övladlarımızın əxlaqına təsir edir. O insanlar unudur ki, sosial şəbəkələrdə yazdıqları söyüşlər uşaqların əxlaqına təsir edir, eyni zamanda, Azərbaycan dövlətini və dövlətçiliyini zərbə altında qoyurlar. Arqument və ya fakt varsa tənqid edə bilərlər. Bununla yanaşı, onlar çıxış yolunu da göstərə bilərlər. Ancaq söyüşlə cəmiyyəti hədəfə almaq azərbaycanlı mentalitetinə uyğun gəlmir. Dəfələrlə qeyd etmişəm, sizin sayt vasitəsilə bir daha bildirirəm ki, hər bir ziyalı söyüş kampaniyasının əleyhinə olmalıdır. Mübarizə sivil yolla aparılmalıdır. Harada yaşamasından asılı olmayaraq təhqir dolu ifadələr işlətmək qəti qəbul olunmazdır”.
Həmsöhbətimizin sözlərinə görə, sosial şəbəkələrdə cəmiyyətin, millətin maraqlarına xidmət edən müzakirələr aparılmalıdır.
Günel CƏLİLOVA
