Mehman Muradlı: “Hesab edirəm ki, bu məhdudlaşdırma yalnız 26 yanvarı əhatə etməməlidir”
19 yanvar tarixində bir qrup radikal müxalifət partiyasının “Məhsul” stadionunda keçirdiyi aksiya bəzi maraqlı məqamları üzə çıxarmış oldu. Həmin aksiyaya hakimiyyət dairələri rəsmi icazə vermişdi. Bu o deməkdir ki, mitinqin təhlükəsizliyi həm də asayiş keşikçiləri tərəfindən qorunurdu.
Adətən belə razılaşdırılmış aksiyalarda bütün detallar incəliyinə qədər nəzərə alınır. Aksiyanın vaxtından tutmuş, hansı şüarların səslənəcəyinə qədər. Amma biz nəyin şahidi olduq? Elə həmin aksiyada tamamilə fərqli, mitinqə verilən icazəyə uyğun olmayan şüarlar səsləndi. Aksiyada hətta “Yürüş” deyərək çığıranlar oldu. Maraqlıdır ki, mitinqi idarə edənlər həmin tələbə qarşı çıxmadılar. Əksinə, dedilər ki, indi sayımız azdır, növbəti aksiyalarda bunu da edərik. Aksiyadan sonra verilən rəsmi bəyanatlardan məlum oldu ki, radikallar metroda və digər ictimai yerlərdə də lazımsız şüarlar səsləndirib, dinc əhalini provokasiyaya çəkməyə cəhd ediblər.
Aksiyadan sonra isə həmin dairələr tərəfindən belə fikir dövriyyəyə buraxıldı ki, növbəti aksiyalar yürüş formasında olacaq. Bunu nəzərə alan hakimiyyət dairələri radikalların planlaşdırdığı 26 yanvar aksiyasına rəsmi icazə verməyiblər. Ümumiyyətlə, belə bir çağırışların fonunda, cəmiyyəti daha pis nəticələrdən qorumaq üçün aksiyaların müəyyən qədər məhdudlaşdırılmasına ekspertlər necə baxırlar?
Hüquqşünas Mehman Muradlı qəzetimizə açıqlamasında bildirdi ki, müxalifətin indiki gərgin, radikal çağırışlarının fonunda, belə bir qərarın verilməsi çox zəruridir: “Qanunvericiliyin tələblərinə görə, "Sərbəst toplaşmaq haqqında" Azərbaycan Respublikası Qanununda toplantı yığıncaq, mitinq, nümayiş, küçə yürüşü, piket formalarında ola bilər. Buna baxmayaraq, qeyd etdiyimiz qanunda toplantılara məhdudiyyət qoyulması da nəzərdə tutulub. Bu baxımdan da BŞPİ rəisi, general Seyidovun haqlı olaraq İcra Hakimiyyətinə müraciəti, 19 yanvar mitinqində asayişin pozulması və digər səbəblərdən 26 yanvar mitinqinə icazə verilməməsi xahişi başadüşüləndir. Belə ki, mitinq iştirakçılarının təhlükəsizliyi, ictimai asiyişin qorunması polisin vəzifəsi olduğundan, Mirqafar Seyidovun gələcəkdə baş verə biləcək iğtişaşların qarşısını almaq üçün müraciəti qanunidir.
Belə ki, qeyd etdiyimiz qanunda ictimai asayişin pozulmasının qarşısını almaq, iğtişaş və ya cinayətlərin baş verməməsi, əhalinin sağlamlığının mühafizəsi, əxlaq normalarının və mənəviyyatın mühafizəsi, başqa şəxslərin hüquq və azadlıqlarının müdafiəsi üçün sərbəst toplaşmağa məhdudiyyət tətbiq edilə bilər.
Hər halda, hakimiyyət dairələrində əməliyyat məlumatları olub ki, mitinqin təxirə salınması üçün İcra Hakimiyyətinə müraciət edilib”.
Hüquqşünasın sözlərinə görə, artıq burada söhbət mitinqdən getmirdi: “Siz həmin dairəyə aid olan aktivistlərin apardığı təbliğata fikir verin. Onların gündəlik işlətdikləri terminlər sırasında “İnqilab”, Yürüş” sözləri çoxluq təşkil edib. Təbii ki, belə əhval-ruhiyyədə olan siyasi kəsimlə qanunun tələbləri çərçivəsində danışmaq lazımdır. Qanunda belə gərginliyi yaratmaq meyllərinin olduğu təqdirdə, aksiyaların məhdudlaşdırılması nəzərdə tutulur. Hesab edirəm ki, bu məhdudlaşdırma yalnız 26 yanvarı əhatə etməməlidir. Ümumiyyətlə, bir müddət aksiyaların keçirilməsinə məhdudiyyət qoyulmalıdır. Çünki radikalların hakim olduğu ab-hava icazəli aksiyalar çərçivəsini aşır və bu, cəmiyyətdə gərginliyə gətirib çıxara bilər”.
Məhəmmədəli QƏRİBLİ
