“Ölkənin siyasətini dəyişmək, Azərbaycanı idarə etmək kimi keyfiyyətlər və imkanlar onda yoxdur”
Bir neçə siyasi partiyanın “Məhsul” stadionunda keçirdiyi icazəli etiraz aksiyasından sonra müxalifət daxilində maraqlı proseslər cərəyan etməyə başlayıb. Həmin aksiyada Milli Şuraya daxil olan və olmayan bir sıra partiyaların iştirak etməsinə baxmayaraq, əldə olunan nəticəni Əli Kərimli və onun tərəfdarları öz adlarına çıxmaq istəyirlər. Əslində, həmin aksiyada əvvəlkilərdən fərqli də nəsə baş verməyib. Sadəcə, radikal dairələr iddia edirlər ki, guya 19 yanvar mitinqi daha izdihamlı alınıb. Ancaq rəsmi qurumlar aksiyada 2800-ə yaxın adamın iştirak etdiyini deyirlər. Hadisələri məhz öz baxış bucağından dəyərləndirməyə çalışan Əli Kərimli və tərəfdarları həmin mitinqdən sonra verdikləri müsahibələrdə və sosial şəbəkələrdə apardıqları təbliğatda Əli Kərimlini etiraz elektoratının başında duran müxalifətin vahid lideri kimi qələmə verməyə çalışırlar. Maraqlıdır ki, digər müxalifət rəhbərləri hələlik buna reaksiya verməyə tələsmirlər. Onların bu mövzudakı susqunluğunu nə ilə izah etmək olar?
Uzun müddət Əli Kərimli ilə eyni partiyada təmsil olunan, sonra həmin partiyadan bir qrup tərəfdarı ilə ayrılaraq, AXCP-nin legitim olaraq onlara aid olduğunu iddia edən partiyanın sədri Razi Nurullayev “Bakı-Xəbər”ə açıqlamasında bildirdi ki, bizim sualımıza ilk olaraq Əli Kərimli ilə həmin aksiyada yanaşı duran partiyaların sədrləri cavab verməlidirlər: “Onların əvəzindən mənim cavab verməyim etik olmaz. Mitinq Milli Şura tərəfindən təşkil olunduğuna görə həmin aksiyanın sahibi rolunda yəqin ki, Ə.Kərimli çıxış edirdi. Buna sözümüz yox. Amma məni hər zaman məsələnin başqa tərəfi maraqlandırır. Düşünürəm ki, Ə.Kərimli öz bəlağətli çıxışları ilə müəyyən sayda adamı öz ətrafına toplaya bilər. Amma bu heç də müxalifətin ümumi lideri olmaq anlamına gəlmir. Ə.Kərimli öz tərəfdarlarından ibarət bir kütləyə liderlik edə bilər. Hesab edirəm ki, ölkənin siyasətini dəyişmək, Azərbaycanı idarə etmək kimi keyfiyyətlər və imkanlar onda yoxdur. Ə.Kərimlinin Azərbaycan xalqına xidməti bu olar ki, qoy siyasi prosesləri bir qədər aktivləşdirməklə məşğul olsun. Bu fəaliyyət onda yaxşı alınır. Məni ölkədə xaotik fəaliyyətləri ilə narahat edən siyasi partiyalar da var. İndi Azərbaycanda bir qrup müxalif partiya birləşib “Xalq Hərəkatı” adlı təsisat yaradırlar. Amma həmin qurumda təmsil olunan bəzi partiyaların rəhbərləri Ə.Kərimliyə dəstək verir, mitinqdə onun yanında dururlar. Hətta elələri var ki, Ə.Kərimli ilə şəkil çəkdirməkdən belə şərəf duyurlar. Başa düşdük, belədirsə, niyə onlar gəlib Ə.Kərimli ilə eyni qurumda təmsil olunmurlar? Belə adamlar əsl siyasi fəaliyyəti Ə.Kərimli ilə fərqli cəbhədə aparırlar. Bax, onlara sual verməliyik ki, əgər Ə.Kərimlinin liderliyini qəbul edirlərsə, niyə onunla bir yerdə deyillər, yox qəbul etmirlərsə, niyə aksiyada çiyin-çiyinə dururlar? Onlar öz siyasi partiyaları adından bəyanat yayıb Ə.Kərimliyə birləşmirlərsə, deməli, həmin adamı ümumi lider kimi yox, sadəcə, bir kütlənin rəhbəri olaraq qəbul edirlər. Mən bu cür fəaliyyəti siyasi cəhətdən də etik saymıram. Bütün bunlardan sonra belə nəticəyə gəlirik ki, radikal müxalif qüvvələrin daxilindəki proseslər heç də göründüyü kimi deyil. Orada da liderlik uğrunda aramsız mübarizə gedir. Hansısa partiyaların buna açıq mətnlə bəyan etməməsi heç də o anlama gəlmir ki, onlar Ə.Kərimlinin liderliyini qəbul edirlər”.
Məhəmmədəli QƏRİBLİ
