Prezident İlham Əliyev Davosda keçirdiyi görüşlər çərçivəsində “Procter and Gamble Europe” şirkətinin prezidenti Loik Tassel ilə görüşüb.
Loik Tassel son illər Azərbaycanda həyata keçirilən iqtisadi islahatların müsbət nəticələr verdiyini vurğulayaraq qeyd edib ki, ölkədə yaradılan biznes mühiti və investorlar üçün şərait başqa şirkətlər kimi, “Procter and Gamble Europe” şirkətini də Azərbaycanda öz fəaliyyətini genişləndirməyə həvəsləndirir.
Şirkətin Azərbaycandakı fəaliyyətinə toxunan Loik Tassel bildirib ki, şirkət təkcə istehlak mallarının satışı ilə məşğul deyil, eyni zamanda, ölkədə reklam bazarının inkişafına əhəmiyyətli töhfə verir. Azərbaycanın televiziya məkanında ən böyük reklam sifarişçisi olan şirkət müxtəlif sosial layihələrə, idman yarışlarına sponsorluq və digər dəstək tədbirləri həyata keçirməklə sosial məsuliyyət missiyasını da yerinə yetirir.
Loik Tassel onu da bildirib ki, şirkət yaranmış biznes mühitindən istifadə edərək regionda fəaliyyətini genişləndirmək istəyir. Bu məqsədlə Bakıda fəaliyyətini böyütməklə Orta Asiya və digər region ölkələrinə öz məhsullarının satışını artırmaq marağındadır. Azərbaycandakı mövcud biznes mühiti bu şirkətin regional mərkəz kimi Bakını seçməsinə səbəb olub.
Prezident İlham Əliyev Azərbaycan dövlətinin investorlara, sahibkarlara bundan sonra da dəstək verəcəyini bildirib.
Görünən odur ki, Azərbaycandakı əlverişli biznes mühiti nəinki xarici investorları özünə cəlb edir, eyni zamanda, paytaxtımız böyük şirkətlər üçün regional mərkəz rolunu oynayır. Bütün bunlar iqtisadi baxımdan perspektivlidir.
Qeyd edək ki, “Procter and Gamble Europe” mərkəzi ABŞ-da yerləşən, təmizləyici vasitələr və şəxsi qayğı məhsulları istehsalı ilə məşğul olan şirkətdir. Şirkətin qərargahı ABŞ-ın Ohayo ştatının Sinsinnati şəhərində yerləşir. Şirkətin əsası 1837-ci ildə Böyük Britaniyadan olan sərmayəçilər Uilyam Prokter və Ceyms Qembl tərəfindən qoyulub. Şirkət 1996-cı ildən etibarən Azərbaycanda fəaliyyət göstərir. Bu müddət ərzində şirkət məhsulların istehsalı və satışı ilə yanaşı, bir sıra sosial lahiyələrdə də aktiv iştirak edib.
Belə bir şirkətin regional mərkəz olaraq Bakını seçməsinin bir sıra üstünlükləri var. Bunun başlıca üstünlüyü ondan ibarətdir ki, gələcəkdə “Procter and Gamble Europe” bir sıra məhsullarını Azərbaycanda istehsal edəcək. Azərbaycanın kimya sənayesinin yenilənməsi imkan verir ki, məhsul istehsalı üçün lazım olan bir sıra xammal və məmulatlar ölkədə istehsal olunsun. Nəticədə istehsal olunan məhsulun maya dəyəri ucuz başa gələcək. Bu, qeyri-neft sektorunun inkişafına təkan verməklə yanaşı, ölkədə yeni iş yerlərinin açılmasına da öz müsbət töhfəsini verə bilər. Ən başlıcası, nəzərə alsaq ki, şirkət öz məhsullarını Azərbaycan vasitəsilə Orta Asiya bazarına daha çox çıxarmaq istəyir, bu, ölkəmizə bir sıra dividendlər vəd edir. Ona görə ki, Azərbaycanda şirkətin istehsal etdiyi məhsullar Orta Asiya ölkələrinin bazarlarına ixrac olunacaq. Bu zaman ölkəyə bundan daxil olan valyutanın həcmi artacaq. Bu baxımdan, Bakının “Procter and Gamble Europe ”nin regional mərkəzi olması bir sıra iqtisadi dividendlər vəd edir. Yaranan bu imkanlardan maksimum dərəcədə səmərəli istifadə etmək lazımdır.
Vidadi ORDAHALLI
