Yeganə Hacıyeva: “Yaqland qurumun rəsmisi olaraq bunu öz dili ilə etiraf etdi”
Ölkəmizin bir sıra müxalif KİV-lər məlumat vermişdilər ki, AŞPA bir qədər əvvəl, Avroparlamentdə qəbul edildiyi kimi, Azərbaycanda insan haqları ilə bağlı problem haqqında qətnamə qəbul etmək niyyətindədir.
Azərbaycan nümayəndə heyətinin sədri, bu təşkilatın vitse-prezidenti Səməd Seyidov deyib ki, həmin məlumat həqiqəti əks etdirmir: “Mən AŞPA-nın İnsan haqları üzrə komitəsində və Monitorinq komitəsində görüşlər keçirdim və Mehman Hüseynovla bağlı hadisənin həll edilməsi üzrə Prezident İlham Əliyevin təşəbbüsünü deputatların nəzərinə çatdırdım. Hadisə iştirakçıları barışıblar, istintaq orqanı isə M.Hüseynov barəsində cinayət işinə xitam verilməsi haqda qərar qəbul edib”.
AŞPA-da Emin Hüseynov tərəfindən təşkil edilmiş və Azərbaycana qarşı sanksiyaların tətbiq edilməsi çağırışlarının səsləndirildiyi tədbir barədə məlumatı şərh edərkən S.Seyidov deyib ki, belə bir tədbir olub və orada AŞPA-nın cəmi bir neçə deputatı iştirak edib: “Azərbaycan üzrə həmməruzəçi Ştefan Şennaxın çıxışı yalan məlumat üzərində qurulmuşdu və onun məruzəsi qeyri-səhih idi”.
Qeyd edək ki, Avropa Şurası Parlament Assambleyasının qış sessiyasında Şuranın baş katibi Torbyorn Yaqland qurumun Niderlanddan olan üzvü, Azərbaycana qarşı daim qərəzli mövqeyi ilə fərqlənən Piter Omziqin sualına cavab olaraq maraqlı yanaşma ortaya qoyub. Sitat: “Sizdən xahiş edirəm, Azərbaycanla bağlı məsələləri qəsdən siyasiləşdirməyin”.
“Göründüyü kimi, iclasda Piter Omziq yenə də qərəzli və təxribatçı sualı ilə diqqəti cəlb etmək istəsə də, Avropa Şurasının baş katibi onu yerində oturdub. Bununla Yaqland Avropa Şurasında anti-Azərbaycan qrupunun olduğunu və onların qərəzli fəaliyyətini təsdiqləmiş olurmu?
AŞPA ilə sıx əməkdaşlıq edən politoloq Yeganə Hacıyeva “Bakı-Xəbər”ə açıqlamasında bildirdi ki, Yaqlandın bu mövqeyi alqışalayiqdir: “İndiyə qədər biz bu barədə çox danışmışıq. Sizin özünüzlə də AŞPA-dakı anti-Azərbaycan şəbəkəsinin fəaliyyətini ifşa edən çoxsaylı material hazırlamışıq. Zatən, orada baş verən proseslər bizə gün kimi aydın idi. Eyni zamanda, mənim özüm AŞPA-da keçirilən bir çox dinləmədə yaxından iştirak etmişəm. Bir sözlə, oranın mühiti və mətbəxinə yaxından bələd olan adam kimi deyirəm ki, Yaqland çox böyük etirafı etmiş olub. Bu ranqda adamın deməsi ki, “Azərbaycanla bağlı məsələlər məqsədli şəkildə siyasiləşdirilir”, bu, acı da olsa, qurumun özü tərəfindən edilən etirafdır. Yadınızdadırsa, bir müddət əvvəl Avropa Şurası Parlament Assambleyasının “korrupsiya hesabatı” adlı bir sənədi müzakirə edildi. Həmin sənəd də qeyri-obyektiv və qərəzli idi, ayrı-ayrı deputatların fərziyyə, ehtimal və gümanları üzərində qurulmuşdu. Təşkilatda Azərbaycana qarşı ikili standartlar siyasəti hər zaman olub. İkili standartlar birinə nisbətən digərinə (və ya özünə) daha ciddi tətbiq edilən qayda və ya prinsipdir. İkili standartlar siyasəti eyni bir hərəkəti edən subyektlərin davranışına müxtəlif qiymət verilməsindən ibarətdir. Əgər hərəkəti edən onu qiymətləndirənə “yaxındırsa”, loyal münasibət bildirilir, əksinə olanda isə qınaq və ittiham səslənir. Beynəlxalq münasibətlərdə o, adətən, “arzu olunmayanların” prinsipləri, konvensiyaları, öhdəlikləri pozmaqda ittiham edilməsi formasını alır. Məsələn, "ümumbəşəri dəyərlərin tapdalanması”, "insan haqlarının pozulması”, “beynəlxalq hüquq normalarından geri çəkilmələr” və s. Amma bu qiyməti verənlərin özlərinin və ya müttəfiqlərinin analoji hərəkətlərinə isə heç bir məhəl qoyulmur. Biz bu cür münasibətə tuş gəlməyimizi Ermənistanla müqayisədə aydın müəyyən edirik. Yaqland isə qurumun rəsmisi olaraq bunu öz dili ilə etiraf etdi”.
Məhəmmədəli QƏRİBLİ
