Nəzakət Məmmədova: “Yürüdülən məqsədyönlü, prinsipial diplomatik kursumuz Ermənistanı xülyalardan əl çəkməyə məcbur etdi”
Yanvarın 22-də Davosda Azərbaycan Prezidenti İlham Əliyevlə Ermənistanın baş naziri Nikol Paşinyan arasında baş tutmuş qeyri-formal görüşə dair qısa videogörüntülər yayılıb. Kadrlara əsasən görüş Dünya İqtisadi Forumunun keçirildiyi binanın otaqlarından birində baş tutub. Qeyri-formal müzakirələrin təfərrüatları məlum deyil. N.Paşinyan özünün “Facebook” səhifəsində görüşdə Dağlıq Qarabağ münaqişəsinin nizamlanması yollarının müzakirə olunduğunu yazıb.
Keçirilən görüşün detalları ilə bağlı konkret məlumat verilməsə də, diqətçəkən vacib məqam ondan ibarətdir ki, Ermənistan tərəfi Azərbaycanın müəyyənləşdirdiyi ənənəvi format üzrə danışıqlar prosesində iştirak edir. Paşinyan hakimiyyətə gələndən sonra bəyan etmişdi ki, sülh danışıqları qondarma qurumla Azərbaycan arasında aparılmalıdır. İstər Ermənistanla Azərbaycanın dövlət başçıları, istərsə də xarici işlər nazirləri səviyyəsində Dağlıq Qarabağ münaqişəsinin nizamlanması istiqamətində keçirilən görüşlərdən sonra bu nəticəyə gəlinir ki, proses Azərbaycan diplomatiyasının aşkar üstünlüyü ilə həyata keçirilir. Son görüşün də deyilən formatda baş tutması Azərbaycan diplomatiyasının əldə etdiyi aşkar üstünlüyün nümayişi baxımından nə kimi əhəmiyyətə malikdir?
Politoloq Nəzakət Məmmədova “Bakı-Xəbər”ə açıqlamasında bildirdi ki, Davosda baş tutan görüş ölkə başçısının rəhbərliyi altında həyata keçirilən diplomatik siyasətin nə qədər düzgün və prinsipial olduğunu təsdiqləmiş oldu: “Paşinyanda biz sanki şəxsiyyətin ikiləşməsi sindromunu müşahidə edirik. Bizim qarşımızda iki Paşinyan var: 2018-ci ilin mayından dekabrınadək olan dövrdəki baş nazir və növbədənkənar parlament seçkilərindən sonrakı baş nazir. Onun birinci, şərti olaraq qeyri-legitim dövrdəki fəaliyyətində, çıxışlarında biz daha emosional, nə olursa-olsun seçkilərdə qalib olmaq üçün populist bəyanatlar səsləndirən bir siyasətçi görürdük.
Seçkilərdən sonra isə, görünür, artıq bütün məsuliyyətin öz üzərində olmasını dərk etdiyindən, onun daha ehtiyatlı olduğunu, reallıq hissinin üstünlük təşkil etdiyini görürük. Prezident İlham Əliyevlə Davosda görüşməsi də onun geri çəkildiyini, əvvəlki populist bəyanatlarından uzaqlaşdığını sübut edir”.
Politoloqun sözlərinə görə, Azərbaycan Prezidenti ilə görüşməklə o, öz əvvəlki fikirlərini təkzib etmiş oldu: ”Qarabağın erməni icmasının danışıqlarda tərəf kimi olması ideyasını irəli sürən baş nazir bu görüşə qatılmaqla səhv addım atdığını etiraf etmiş oldu. Eyni zamanda, erməni tərəfi danışıqlarda xalqların öz müqəddəratını təyinetmə prinsipini önə çəkərək "Dağlıq Qarabağ xalqı" fikrini dünya ictimaiyyətinə sırımaq istəyirdi. Lakin Avropa Birliyi, NATO dəfələrlə münaqişələrin ərazi bütövlüyü çərçivəsində həllinə dəstək nümayiş etdirən sənədlər də qəbul edib ki, bu, Ermənistana Qarabağın erməni icmasını danışıqlarda tərəf kimi göstərmək imkanlarını məhdudlaşdırıb. Digər tərəfdən, Minsk Qrupunun həmsədrləri, xüsusilə Rusiya hazırkı formata tərəfdardırlar və Paşinyan ölkəsi və öz üzərində təzyiqlərin artması fonunda cəfəng ideyadan əl çəkməyə məcbur olub”.
N.Məmmədova hesab edir ki, artıq bundan sonra məsuliyyət onun üzərindədir və bunu dərk edən Paşinyan yeni yaxşı nəsə təklif edə bilmirsə, köhnə formatla razılaşmağa məcburdur: “Atalar məsəli ilə desək, köhnə bazara təzə nırx qoymaq onun həddində deyil. O hələ baş nazir kimi ölkədə öz mövqeyini möhkəmlədə bilməyibsə, Qarabağ istiqamətində heç nə edə bilməz.
Ümumiyyətlə, Qarabağ məsələsi Paşinyanın nəzarətində deyil. Ölkənin ordusu və diplomatiyası Rusiyanın nəzarətində qalmaqdadır, Bako Saakyan Paşinyanla hesablaşmır.
Belə bir şəraitdə Qarabağın erməni icmasını tərəf kimi danışıqlar masasına əyləşdirməklə separatçı icmanın və rəhbərlərinin rəğbətini qazanmaq cəhdləri boşa çıxan Paşinyan geri çəkilməyə məcbur oldu. Çünki tuz kartı olan "Qarabağ kartı" hələ ki, regionda ən güclü oyunçunun - Rusiyanın əlindədir. Biz bu məsələdə Azərbaycan diplomatiyasının da aşkar üstünlüyünü hiss etdik. Yürüdülən məqsədyönlü, prinsipial diplomatik kursumuz Ermənistanı xülyalardan əl çəkməyə məcbur etdi”.
Məhəmmədəli QƏRİBLİ
