Qabil Hüseynli: “Azərbaycan bütün geosiyasi addımlarını ölkənin milli maraqları ilə tam uzlaşdırır”
Prezident İlham Əliyev Davosa səfəri çərçivəsində Çinin CGTN (China Global Television Network) televiziya kanalına müsahibə verib. Ölkə başçısı müsahibəsində bir çox məsələ barədə ətraflı danışıb.
Cənab İlham Əliyev Azərbaycanın müasir dünya nizamındakı tutduğu mövqeyinə də aydınlıq gətirib. Sitat: “Əlbəttə ki, dünya dəyişir, regionumuz dəyişir, bir çox hadisələr baş verir. Siz onları beş il əvvəl heç təsəvvür edə bilməzdiniz. Buna görə, hesab edirəm ki, hər bir lider hadisələri izləməlidir və baş verənlərə hər zaman diqqətli olmalıdır. Biz bir və ya iki ildən sonra dünyada nəyin baş verəcəyini bilmirik. Lakin bugünkü geosiyasi mühitə gəldikdə, fikrimcə, biz həmin mühitdə öz yerimizdə qərarlaşmışıq və bu mövqe bizi qane edir”.
Göründüyü kimi, İlham Əliyev Azərbaycanın hazırkı mövqeyinin qaneedici olduğunu vurğulayıb. Müasir geostrateji münasibətlər sistemində Azərbaycanın mövqeyinin xarakterizə olunması baxımından bu fikri necə dəyərləndirmək olar?
Politoloq Qabil Hüseynli “Bakı-Xəbər”ə açıqlamasında bildirdi ki, İlham Əliyev Azərbaycanın müasir geostrateji əlaqələr sistemindəki yeri və rolundan tamamilə doğru olaraq razılıq edir: “Biz ənənəvi xarici siyasət kursumuza sadiqlik nümayiş etdiririk. Artıq görürük ki, yürütdüyümüz tarazlaşdırılmış siyasət Azərbaycanın təhlükəsizliyindən tutmuş, bütün maraqlarına da tam cavab verir. Məhz bunun nəticəsidir ki, Azərbaycan hər hansı bir qütbə tərəf ifrat meyllənmir. Biz nə NATO-nun üzvüyük, nə də Kollektiv Təhlükəsizlik Müqaviləsi Təşkilatının (KTMT). Heç həmin qurumlara üzv olmaq üçün ciddi səylər də göstərmirik. Ancaq hər iki tərəflə bərabər səviyyədə əməkdaşlıq edirik. Baxmayaraq ki, Qərb dairələri Azərbaycanın Rusiyaya meyllənməmək və qərbyönümlü siyasət yürütməsinin zəruriliyinə dair açıq çağırışlar edirlər. Amma Azərbaycan həmin istiqamətdə addımlar atsa da, bunu çox da dərinləşdirməkdə maraqlı deyil. Yalnız Avropa Birliyi ilə ikitərəfli saziş imzalamaq niyyətini açıq bəyan edib və bu sazişin üzərində paraflanma həyata keçirilib. Azərbaycan heç KTMT-yə doğru da can atmır. Rusiya açıq surətdə bəyan edir ki, Azərbaycanı Avrasiya Birliyi və KTMT-də görmək istəyir. Amma biz hər iki təşkilatla əməkdaşlığı üzvlükdən kənar müstəvidə edirik. Biz dünyada gedən mühüm geosiyasi proseslərin dinamikasını tutub, ona uyğun şəkildə hərəkət edirik. Məsələn, Rusiyanın bizi görmək istədiyi quruma daxil olmaq üçün Azərbaycanın da şərtləri var. Bu da ölkə ərazisinin təcavüzkar ermənilərdən təmizlənməsi kimi məqsəd güdür. Azərbaycanı o tərəfə çəkmək istəyənlər isə bu problemin nizama salınması istiqamətində bəlli siyasi iradə ortaya qoymurlar. Bəzən isə qeyri-səmimi cəhdlərlə Azərbaycanı həmin təşkilata cəlb etməyə çalışırlar. Ölkənin siyasi rəhbərliyi kifayət qədər müdrik və təcrübəlidir. Belə vəziyyətlərdə milli maraqları əsas götürərək, təmkinlə hərəkət edir. Buna baxmayaraq, biz Rusiya və digər qonşularımızla yaxın, mehriban qonşuluq siyasətini yürüdürük. MDB çərçivəsində həmin ölkə ilə sıx əməkdaşlıq edirik. Qərblə də təxminən eyni səviyyədə münasibətləri qoruyub saxlayırıq. Biz Avropa Biliyi ilə Assosiativ Sazişə girməyə tələsmirik. Amma AB ilə ikili əməkdaşlıq prioritetlərini dərindən nəzərdən keçiririk. Bu baxımdan, Azərbaycan bütün geosiyasi addımlarını ölkənin milli maraqları ilə tam uzlaşdırır. Belə hesab edir ki, dünyada və regionda nə qədər mürəkkəb oyunlar getsə də, hazırkı status-kvonu qoruyub saxlamaq vacibdir. Biz bunu yürüdülən siyasətin konturlarında aydın görürük”.
Məhəmmədəli QƏRİBLİ
