20 Yanvar faciəsinin 29-cu ildönümü, ölkəmizlə yanaşı, bir sıra xarici dövlətlərdə də qeyd edilir. 20 Yanvar şəhidlərinin xatirəsinə, ruhuna böyük ehtiram örnəyi olan bu tədbirlərin keçirilməsi təqdirəlayiqdir.
Məlum olduğu kimi, İsveçrədə 20 Yanvar faciəsinə həsr olunmuş poçt markası buraxılıb. Bununla bağlı Azərbaycan səfirliyi ilə bu ölkənin dövlət poçt müəssisəsi olan “İsveçrə Poçt” Səhmdar Cəmiyyəti (“Schweizerische Post“ AG) arasında razılaşma əldə edilib. İsveçrədəki səfirliyimizdən Azərbaycan mətbuatına verilən məlumata görə, həmin poçt markaları qeyri-kommersiya məqsədilə buraxılıb və səfirlik tərəfindən istifadə ediləcək. Eyni zamanda, bu markalar başqa maraqlı tərəflərə göndəriləcək. Həmçinin, 20 Yanvar barədə İsveçrə ictimaiyyətinin məlumatlandırılması istiqamətində səfirlik tərəfindən müxtəlif tədbirlər də keçiriləcək.
İsveçrədə 20 Yanvar şəhidlərinin xatirəsinə poçt markasının buraxılmasını təqdir edən Atatürk Mərkəzinin şöbə müdiri, yazıçı-publisist Əkbər Qoşalı “Bakı-Xəbər”ə bildirdi ki, bu faciədən 29 il keçdikdən sonra Avropa ölkələrindən birində bu hadisənin baş verməsi müsbət haldır. “29 il əvvəl Bakıda törədilən 20 yanvar faciəsinin ildönümü münasibətilə Avropa ərazisində olan bir dövlət tərəfindən poçt markasının buraxılması Azərbaycanın dövlət müstəqilliyi və haqq-ədalət uğrunda şəhid olan azərbaycanlıların ruhuna böyük ehtiramdır. İsveçrə hökuməti tərəfindən atılan bu addım unudulmaz tarixi hadisədir. Poçt markasının əhəmiyyəti ona görə böyükdür ki, onun daha çox insana yayılmaq imkanı var. Poçt xidmətləri sahəsində məlumatların ötürülməsi nə qədər elektronlaşdırılsa da, klassik poçta dünən də ehtiyac olub, bu gün də var, sabah da olacaq. İsveçrə hökumətinin dəstəyi ilə 20 Yanvar şəhidlərinin xatirəsinə həsr edilən poçt markalarının buraxılması o deməkdir ki, bu faciə haqqında məlumatlar o markalar vasitəsilə dünya ölkələrinə də yayılacaq. Bu markalar məktubların üzərində dalğa-dalğa, ünvan-ünvan dolaşacaq və o daha çox insanlara çatacaq. Məsələnin siyasi tərəfinə gəlincə, bu hadisə Azərbaycanın qonşuluğunda olan bir ölkədə deyil, Avropa ölkəsində baş verib. Bu poçt markaları ilə tanış olan İsveçrə vətəndaşları internetin axtarış imkanlarından istifadə edərək 20 Yanvar hadisəsi ilə yaxından tanış olmaq istəyəcəklər”-deyə bildirən Ə.Qoşalı hesab edir ki, 29 il əvvəl Azərbaycan xalqının başına gətirilən bu faciə ilə həmin ölkənin gəncləri də maraqlanacaq. O qeyd etdi ki, gənclər Sovet ordusunun Bakıda törətdiyi cinayətlər haqqında informasiya əldə etdikdən sonra ola bilsin, o məlumat əsasında məqalələr, kitablar yazsın, elmi-tədiqat işləri aparsın. “Bu hadisə artıq bizim üçün bir poçt markasından görünən üfüqü cızmaqdadır. Bilirsiz ki, Azərbaycanın xarici ölkələrdəki səfirlikləri, diplomatlarımız, eləcə də xaricdə yaşayan soydaşlarımız 20 Yanvar faciəsini dünyaya yaymaq istiqamətində işlər görür. Bu mənada səfirliklərimizin Azərbaycanın tarixi hadisələrini, faciələrini daha çox yaymaq, daha çox insana çatdırmaq üçün gördüyü işlər də qiymətləndirilməlidir. Bundan sonra da 20 Yanvar faciəsi ilə bağlı daha çox işlər görülməsinə ehtiyac var. Gələn il milli qürur, milli intiqam günümüz olan 20 Yanvar hadisəsinin 30 illiyidir. Bu 30 il böyük tarix üçün böyük hadisə olmaya bilər, ancaq müstəqil Azərbaycanın yaşından böyük bir yaşdır. Bu faciəyə artıq xarici dövlətlər öz münasibətini bildirməkdədir. Bu baxımdan düşünürəm ki, bu hadisəyə qiymət verən bütün ölkələrin fəaliyyəti bizim üçün qiymətlidir və xalqımızın acısını paylaşmaq baxımından bizə bir dəstəkdir”-deyə Ə.Qoşalı bildirdi.
İradə SARIYEVA
