Məlum olduğu kimi, yanvarın 17-də Avropa Parlamenti “Azərbaycanda insan haqları, demokratiya və qanunun aliliyinin pozulması ilə bağlı qətnamə” təklifinin müzakirəsini keçirərək qəbul edib.
Qətnamədə Azərbaycan hökuməti bloger Mehman Hüseynovu dərhal, qeyd-şərtsiz azad etməyə, ona yeni ittihama xitam verilməsinə çağırılır. Çox maraqlıdır ki, Azərbaycanın özü ilə bağlı kifayət qədər problemi olduğu halda, Avropa Parlamenti onların müzakirəsində maraqlı görünmür, ancaq sıradan bir kriminal hadisəyə belə siyasi qiymət verir. Yaxşı olardı ki, Avropa Parlamenti belə sərt qətnamələrdən birini də Azərbaycan torpaqlarını işğal edən Ermənistanla bağlı qəbul etsin. Təəssüf ki, belə halları müşahidə edə bilmirik. Göründüyü kimi, Avropa Parlamenti kimi nüfuzlu bir qurum sıradan olan bir kriminal hadisəni əsas gətirərək, Azərbaycanla bağlı belə qərəz nümayiş etdirir. Hər halda, qurum nəzərə almalıdır ki, Azərbaycan beynəlxalq təşkilatlarla səmərəli əməkdaşlıq siyasətinin yürüdülməsi xəttini daim rəhbər tutur. Dünyanın nüfuzlu qurumları olan BMT, Avropa Parlamenti, Avropa Şurası, Qoşulmama Hərəkatı, İslam Əməkdaşlıq Təşkilatı ilə münasibətlərin normal məcrada davam etməsi üçün əlindən gələni edib. Həmin qurumlarla qurulan ikitərəfli əməkdaşlıq çərçivəsində ölkəmiz münasibətlərin qorunub saxlanması istiqamətində əməli səylər göstərib. Çox təəssüflər olsun ki, bəzən Avropa Parlamenti kimi qurumlar bu tip əməkdaşlığın məzmun və mahiyyətinə kölgə salan mövqe ortaya qoyurlar. Qeyd edək ki, Avropa Parlamentinin məlum qətnaməsinin qərəzli olması ilə bağlı sözügedən qurumun üzvləri də fikir bildiriblər. Avropa Parlamentinin üzvü Patrisiya Lalond üzv olduğu qurumda Azərbaycana qarşı baş tutan müzakirələrə münasibət bildirərkən deyib ki, Avropa Parlamenti Azərbaycanı həddindən artıq sıxışdırır: “Mən bir neçə dəfə Azərbaycana xüsusi olaraq qadın hüquqları ilə bağlı missiya tərkibində getmişəm. Bu zaman Azərbaycanın qadın hüquqları sahəsində necə səylər göstərdiyini görmüşəm. Bütün dəyərlərimizi olmasa da, Avropa İttifaqının bir sıra dəyərlərini, qadın hüquqları, radikal islamizmə qarşı mübarizəni, azlıqları müdafiə edən ölkələrə qarşı bu cür sərt olmaqda yanılırıq. Bakıya gedəndə məscidlərlə yanaşı, sinaqoq, kilsə də görmək olur. Əlbəttə ki, Azərbaycanda mətbuatla bağlı müəyyən problemlər var. Amma bəzən müxtəlif ölkələrdə radikal islamizmə qarşı mübarizə aparmaq üçün mətbuat azadlığına qoyulan məhdudiyyətləri başa düşmək olar. Əlbəttə, bu bizim dəyərlərimizə zidd olduğu üçün mənfi qarşılanır. Biz bu problemdən uzağıq, hər halda bu günə kimi uzağıq. Heç həbs etməkdən danışmıram, sadəcə, hər hansısa bir jurnalisti susdurmağa çalışsaq, bu hal çox mənfi qarşılanacaq”.
Beynəlxalq məsələlər üzrə ekspert Yeganə Hacıyeva “Bakı-Xəbər”ə açıqlamasında bildirdi ki, Avropa Parlamentinin qəbul etdiyi qətnamə qərəzli olmaqla yanaşı, həm də müstəqil dövlətin hüquq-məhkəmə sisteminə təzyiq cəhdidir: “Həbsdə olan bloger Mehman Hüseynovun ona qarşı yeni ittiham irəli sürüləndən sonra aclıq aksiyasına başlaması ilə bağlı sosial şəbəkələrdə xəbər yayıldı. Bu xəbərin üzərindən keçən vaxt ərzində istər ölkə daxilindəki qrant müxalifləri, istərsə də xaricdə və bəzi beynəlxalq təşkilatlarda şəbəkələşmiş anti-Azərbaycan dairələri Mehmanla bağlı Azərbaycan hökumətinə qarşı etiraz aksiyaları təşkil etməyə cəhd göstərirlər. Bununla bağlı ilk növbədə Penitensiar Xidmət rəsmi məlumatlar yaydı. Həmin məlumatlardan aydın oldu ki, M.Hüseynov həbsdə aclıq aksiyası elan edib və bir gün sonra aclığı dayandırıb. Bu rəsmi məlumatlar təcridxanada M.Hüseynovla görüşən Ombudsman, QHT nümayəndələrı və hüquq müdafiəçiləri tərəfindən də təsdiqləndi. Həmçinin, Avropa Birliyi ölkələrinin Azərbaycandakı diplomatik korpusunun nümayəndələrinin təcridxanada M.Hüseynovla görüşü zamanı da rəsmi açıqlamların gerçəkliyi əks etdirdiyi üzə çıxdı. Bir daha aydın oldu ki, istər daxildəki müxalifət, istərsə də xaricdəki mühacirlər və beynəlxalq təşkilatlardakı anti-Azərbaycan şəbəkəsi təhrif olunmuş məlumatlar üzərindən Azərbaycandakı bir məhbusu öz iradəsinə zidd olaraq siyasi məqsədlərlə istifadə edirlər. Həm də həmin məhbusun guya hər an ölə biləcəyi barədə dezinformasiya yaymaqla siyasi manipulyasiyalar aparırlar”.
Politoloqun sözlərinə görə, beynəlxalq təşkilatlarda uzun illərdir müxtəlif siyasi-iqtisadi lobbi qrupları təşəkkül tapıb və onlar hədəflərinə çatmaq üçün təhrif olunmuş informasiyalar əsasında qərəz və təzyiq kampaniyalarının aparılması təcrübəsini geniş tətbiq edirlər: “Həmişə qanunun aliliyi, məhkəmə-hüquq sisteminin müstəqilliyini özünə və tərəfdaşlarına prioritet mövzu elan edən Avropa Parlamenti və digər beynəlxalq dairələr nədənsə M.Hüseynovla bağlı baş verənlərin hüquqi proseslər olmasını və bu məsələlərin çağırış, etiraz və s. kimi siyasi bəyanatlarla həll olunmayacağını, ancaq hüquqi prosedurlarla nizamlanacağını görməzdən gəlirlər. Bu həm də müstəqil dövlətin hüquq-məhkəmə sisteminə təzyiq cəhdidir və biz bunu hüquqi proseslərə siyasi qərarlarla təsir etmək cəhdi kimi qəbul edə bilərik.
Məhz bu istiqamətdə son illər qlobal siyasi müstəvidə "demokratiya", "insan haqları" mövzusu geniş istifadə olunmaqdadır və zaman-zaman bu mövzular ətrafında yaradılmış süni ajiotajın dövlətlərə və hökumətlərə kənar təsir vasitəsi kimi geniş istifadəsi təcrübəsi mövcuddur. Xüsusilə enerji, iqtisadi və təhlükəsizlik sahələrində strateji coğrafi mövqelərə malik, separatizm və işğaldan əziyyət çəkən ölkələrə qarşı rəqib cəbhədən geniş istifadə olunmaqdadır.
Avropa İttifaqı özü bu mövzular ətrafında yaradılmış süni ajiotajın müxtəlif iqtisadi lobbi qruplarının müəyyən sazişlər öncəsi dividend qazanmaq istiqamətində, qurumun özünə qarşı istifadə olunduğunun fərqindədir. Bu mövzular ətrafında baş verənlərin uzunmüddətli hesabda Aİ maraqlarına hədə olaraq istifadə olunan manevrlərə əsas verməsi artıq bir neçə ildir Avropa qurumlarının strateji və təhlükəsizlik sahəsini araşdıran qurumlarının hesabatlarında öz əksini tapıb.
Bu mövzular ətrafında yaradılmış süni ajiotajın müxtəlif siyasi-iqtisadi lobbi qruplarının maraqlarına xidmət etməsi isə göz önündədir”.
Məhəmmədəli QƏRİBLİ
