Azərbaycan və Ermənistan XİN başçıları Elmar Məmmədyarov və Zöhrab Mnatsakanyan arasında 4 saatdan çox davam edən danışıqlarda daha çox anlayışın və etimadın qurulmasının əhəmiyyəti də daxil olmaqla faydalı və çox müsbət fikir mübadiləsi aparılıb.
Bu barədə Azərbaycan XİN-nin Mətbuat xidmətinin E.Məmmədyarov və Z.Mnatsakanyan arasında ATƏT-in Minsk Qrupunun həmsədrlərinin iştirakı ilə bu ilin 16 yanvar tarixində Parisdə keçirilmiş görüş ilə bağlı şərhində deyilir. Şərhdə o da qeyd olunur ki, ardıcıl və nəticəyə yönəlik danışıqların qarşıdan gələn ay davam etdirilməsi razılaşdırılıb.
Bu bir daha onu göstərir ki, Ermənistanın baş naziri Nikol Paşinyan Dağlıq Qarabağla bağlı danışıqların əvvəlki formatda davam etdirilməsi ilə barışıb. Nəzərə almaq lazımdır ki, Paşinyan seçkidən əvvəl müəyyən isterikaya qatılaraq fərqli mövqe sərgiləyirdi. Paşinyan seçki kampaniyası zamanı bəyan edirdi ki, Ermənistan danışıqlarda Qarabağın adından çıxış etməyəcək, bu məsələdə separatçı qurum danışıqlarda iştirak etməlidir. Ancaq Azərbaycan tərəfi qəti şəkildə bunu rədd edəndən sonra, ötən il Düşənbədə keçirilən görüşdə Paşinyan öz mövqeyinə korrektə etdi. Ondan sonra Azərbaycan və Ermənistan XİN rəhbərlərinin görüşü keçirildi. Faktiki olaraq Ermənistan və Azərbaycan XİN rəhbərləri danışıqları davam etdirir, Qarabağ məsələsini müzakirə edirlər. Hazırkı mərhələdə danışıqlar Ermənistan və Azərbaycan arasında aparılır. Ona görə də bundan sonra Paşinyanın bu formatı dəyişməyə cəhd edəcəyi inandırıcı görünmür. Bütün bunlar bir daha Paşinyanın əvvəlki danışıqlar formatı ilə razılaşmasının göstəricisidir.
Paşinyanın sözügedən məsələdə geri addım atmasını şərtləndirən bir sıra faktorlar var. Əvvəla Prezident İlham Əliyev Dağlıq Qarabağ danışıqlarında qəti mövqe ortaya qoyaraq separatçı qurumun danışıqlarda tərəf olmasına yox deyib. Digər tərəfdən, danışıqların dayanması müharibə risqini artırırdı. Nəzərə alsaq ki, Azərbaycanın hərbi potensialı, imkanları Ermənistanla müqayisə olunmayacaq dərəcədə böyükdür, o zaman bunun işğalçı ölkə üçün hansı ağır nəticələrə gətirib çıxaracağını Paşinyan da bilməmiş deyildi. Bununla yanaşı, danışıqlardan imtina İrəvana yönəlik təzyiqlərin başlamasına rəvac verə bilərdi. Düzdür, həmsədrlər işğalçı ölkəyə təzyiq göstərmirlər. Göstərsəydilər, işğal reallığı bu qədər uzanmazdı. Ancaq danışıqların aparılması, ən azından, müharibənin yenidən alovlanmasından yaxşıdır. Bu baxımdan danışıqlar naminə Paşinyana xarici təzyiqlər artacaqdı. Ermənistanın indiki ağır sosial-iqtisadi, demoqrafik vəziyyətini nəzərə alan Paşinyan danışıqlar məsələsində əvvəlki formatla razılaşdı. Yəni Dağlıq Qarabağla bağlı danışıqlar Azərbaycan və Ermənistan arasında bundan sonra da aparılacaq.
Vidadi ORDAHALLI
