Arzuxan Əlizadə: “Dağlıq Qarabağıın işğaldan azad edilməsi üçün İran Ermənistana yönəlik daha effektiv təsir mexanizmlərini işə salmalıdır”
“İran Qarabağ torpaqlarını Azərbaycan torpaqları hesab edir və Azərbaycanın ərazi bütövlüyünü dəstəkləyir”. Xəbər verildiyi kimi, bunu İranın Silahlı Qüvvələrinin Baş Qərargah rəisi, general-leytenant Məhəmməd Baqeri Azərbaycana səfəri çərçivəsində Prezident İlham Əliyevin qəbulunda olan zaman deyib.
Baş Qərargah rəisi bildirib ki, İran bundan sonra da Azərbaycanın ərazi bütövlüyünü dəstəkləyəcək: "Sərhədlərin zor gücü ilə dəyişdirilməsi qəbuledilməzdir, İran bu məsələdə hər zaman Azərbaycanın yanındadır".
Prezident İlham Əliyev bu qardaşlıq mövqeyinə görə onun təşəkkürlərinin İran rəhbərliyinə çatdırılmasını xahiş edib və Azərbaycanın İran tərəfinin bu ədalətli mövqeyini yüksək qiymətləndirdiyini bildirib. Dövlət başçısı işğal edilmiş ərazilərdə Azərbaycanın tarixi-dini abidələrinin ermənilər tərəfindən dağıdılması barədə Məhəmməd Baqerini məlumatlandırıb.
Bu arada Baqeri mətbuata açıqlamasında bildirib ki, İran Dağlıq Qarabağ münaqişəsinin tezliklə sülh yolu ilə həll olunmasını arzulayır. O bildirib ki, İran eləcə də Azərbaycanın işğal olunmuş ərazilərinin qaytarılması, məcburi köçkünlərin və qaçqınların problemlərinin həll olunması, öz yurd-yuvalarına qayıtması məsələlərinin həll olunmasını istəyir.
İranın qonşu dövlət olaraq belə mövqe ortaya qoyması müsbət haldır. Çünki İran sözügedən məsələdə daha qəti mövqe ortaya qoyarsa, o zaman işğalçı Ermənistan geri addım ata bilər. Ən azından ona görə ki, Ermənistan İranla həmsərhəddir. Ermənistanın, ümumilikdə, 4 ölkə ilə quru sərhədi var ki, onlardan da ikisi sərhədləri bağlayıb. İran bu amildən istifadə edib işğalçı dövlətə təzyiq göstərə bilər. Nəzərə almaq lazımdır ki, son illər İran-Azərbaycan əlaqələrində ciddi inkişaf var. İki ölkə arasında siyasi-iqtisadi, mədəni əlaqələr genişlənir. Tərəflər ortaq layihələr həyata keçirir. Bu baxımdan, “Şimal-Cənub” nəqliyyat dəhlizi mühüm əhəmiyyət kəsb edir. Bu baxımdan, İran Dağlıq Qarabağ məsələsinin həllində səylərini artıra bilər.
Məsələyə münasibət bildirən AMİP-in baş katibi Arzuxan Əlizadənin sözlərinə görə, iranlı generalın Dağlıq Qarabağla bağlı verdiyi açıqlamaya müsbət yanaşır: “Ancaq çox yaxşı olardı ki, bu kimi fikirlər təkcə diplomatik münasibətlər xatirinə deyilməsin. İşğalçı Ermənistana qarşı daha təsirli vasitələr işə salınsın. Xüsusən də İranın bununla bağlı Ermənistana yönəlik siyasi-iqtisadi təzyiqləri artmalıdır. Söhbət işğal altında olan ərazilərin azad olunmasından gedir. Ancaq təəssüf ki, hələlik biz bunu görmürük. İranla Ermənistan arasında iqtisadi-ticarət əlaqələri genişlənir. Belə məlumatlar var ki, Ermənistanın baş naziri Nikol Paşinyan İrana səfər etməyə hazırlaşır. İki ölkə arasında azad ticarət zonasının yaradılması gündəmdədir. Əlbəttə, belə olan halda, Ermənistan işğal altında olan ərazilərin azad olunmasında maraqlı olmaz. Çünki İran tərəfindən hansısa təzyiq görmür. O baxımdan hesab edirəm ki, Dağlıq Qarabağıın işğaldan azad edilməsi üçün İran Ermənistana yönəlik daha effektiv təsir mexanizmlərini işə salmalıdır. Adicə Ermənistanla olan sərhədi bağlamaq bu baxımdan işğalçı ölkəyə ciddi təsir göstərə bilər. Hər halda, Azərbaycan İran üçün daha vacib əhəmiyyət kəsb edir, nəinki Ermənistan. Nəzərə almaq lazımdır ki, İrana qarşı Qərbin təzyiqlərinin artdığı bir dönəmdə vəziyyət dəyişən kimi, Ermənistan bu ölkəyə qarşı üz çevirəcək. Çünki xəyanət ermənilərin xislətindədir”.
Vidadi ORDAHALLI
