Xəzər Teyyublu: “Son sözü hüquq-mühafizə orqanları deməlidir”
Azərbaycanın görkəmli dövlət xadimi, Xalq Cümhuriyyətinin əsas liderlərindən biri Məhəmməd Əmin Rəsulzadənin Bakının Novxanı kəndində doğulub boya-başa çatdığı evin qarşısındakı barelyefi oğurlanıb. Hadisə yanvarın 15-nə keçən gecə baş verib. Qonşular bildiriblər ki, səhər açılanda üzərində Rəsulzadənin şəkli olan mis lövhənin - barelyefin yerində olmadığını görüblər.
Qeyd edək ki, M.Ə.Rəsulzadənin vaxtilə yaşadığı həmin ev uzun müddətdir uşaq bağçası kimi fəaliyyət göstərir. Oğurlanmış mis barelyefin həmin yerə 1992-1993-cü illərdə vurulduğu bildirilir.
Novxanı kəndinin keçmiş icra nümayəndəsi Elnur Əliyev M.Ə.Rəsulzadənin Novxanıda vaxtilə yaşadığı evin qarşısından lövhənin oğurlanması ilə bağlı xəbərin doğruluğunu təsdiqləyib. Elnur Əliyevin sözlərinə görə, hadisə yanvarın 15-nə keçən gecə baş verib: "Elə səhər saatlarında hadisə yerinə polislər gəlmişdi. Yəqin ki, faktla bağlı artıq cinayət işi başlanıb. Çox güman ki, bunu kəndin avaraları törədib. Çünki həmin lövhə o vaxt çox qiymətli materialdan hazırlanmışdı".
Çox maraqlıdır ki, özlərini radikal müxalifət hesab edən bəzi şəxslər bu hadisəyə də siyasi don geyindirməyə çalışırlar. Həmin dairələr sosial şəbəkələr vasitəsilə apardıqları təbliğatda bu hadisənin guya hakimiyyətin istəyi ilə törədildiyi haqda şayiələr yayırlar. Bəllidir ki, Azərbaycan hakimiyyəti yürütdüyü siyasi kursda özünü 1918-1920-ci illərdə qurulan Cümhuriyyətin siyasi varisi kimi təqdim edir. Ötən il AXC-nin 100 illiyi rəsmi dövlət səviyyəsində qeyd edilib. Həmin tədbirlər çərçivəsində M.Ə.Rəsulzadənin əsərlərinin çap edilməsi, onun irsinin araşdırılması istiqamətində xeyli iş görülüb. AXC və Rəsulzadəyə hakimiyyət bu cür ehtiram bəslədiyi halda, onun barelyefinin oğurlanmasını hakimiyyətin adı ilə əlaqələndirmək nə dərəcədə əsaslı görünə bilər?
Müxalif Klassik Xalq Cəbhəsi Partiyasının (KXCP) funksioneri Xəzər Teyyublu “Bakı-Xəbər”ə açıqlamasında bildirdi ki, həmin hadisə ilə bağlı onlar da mətbuat vasitəsilə xəbər tutublar:
“Birincisi, onu qeyd edim ki, bu, utanc gətirən hərəkətdir. Hər kim edibsə, böyük ləyaqətsizliyə yol verib. Bu hadisədən siyasi məqsədlər üçün istifadə olunması cəhdini düzgün hesab etmirəm. Bunu Rəsulzadəyə, AXC-yə qarşı olan hərəkət kimi dəyərləndirməyi də doğru saymıram. Belə bir addımın atılması hakimiyyətin nəyinə lazım ola bilər ki? Biz müxalif cameə olaraq Rəsulzadənin adının daha da böyük mənada əbədiləşdirilməsini istərdik. Bu başqa məsələ. Amma hansısa mis barelyefin oğurlanmasını hakimiyyətə qarşı təbliğata çevirməyi də doğru saymıram. Bunu hansısa üçüncü qüvvənin təxribatı kimi də qiymətləndirmək olar. Və ya mis olduğu üçün, kiminsə onu pula tez dəyişə biləcəyi məqsədi ilə etdiyi, sıradan kriminal bir hadisə kimi də dəyərləndirmək mümkündür. Keçən il Azərbaycanda AXC-nin 100 illiyi böyük coşqu ilə qeyd olundu. Bu məsələdə iqtidar da, müxalifət də fəal oldu. Bilirsiniz ki, qarşıdan Rəsulzadənin 135 illik yubileyi gəlir. Həmin tədbirin yanvarın 31-də keçirilməsi planlaşdırılır. Ola bilər ki, üçüncü qüvvəyə aid olan təxribatçılar bu addımları ilə ölkədə siyasi gərginliyi artırmağı hədəf seçiblər. Son sözü hüquq-mühafizə orqanları deməlidir. Cinayəti edənləri yaxalamaq, motivi araşdırmaq onların işidir. Kəndin icra nümayəndəliyi və bələdiyyəsi isə həmin barelyefin yerinə daha yaxşısını qoymalıdır”.
Məhəmmədəli QƏRİBLİ
