Nəzakət Məmmədova: “Görünür, Rusiya bunu etməklə Ermənistanla körpüləri tam yandırmaq istəməyib”
Rusiya Prezidenti Putin Nikol Paşinyanı Ermənistanın baş naziri seçilməsi münasibətilə təbrik edib. Bu barədə Kremlin mətbuat xidməti məlumat yayıb.
Putin Ermənistanla Rusiya arasında dialoqun müttəfiqlik münasibətlərini möhkəmləndirəcəyinə ümid etdiyini yazıb. O qeyd edib ki, Rusiya-Ermənistan münasibətləri dostluq ənənələri və qarşılıqlı hörmət əsasında qurulub: “Hesab edirəm ki, bizim dialoq və konstruktiv birgə işimiz Rusiya-Ermənistan müttəfiqliyini möhkəmləndirəcək. Bu, qardaş xalqların maraqlarına cavab verir”.
Putinin gecikmiş təbriki doğrudan da maraq doğurur. Çünki Paşinyan ötən ilin dekabr ayında Ermənistanda keçirilən seçkilərdə qalib gələndə Rusiyadan təbrik ala bilmədi. Hətta Ermənistanın rəsmi qurumları bunu sayğısızlıq və müttəfiqliyə yaraşmayan hərəkət kimi dəyərləndirərək, açıq formada etiraz edirdilər. Bu baxımdan da Putinin birdən-birə Paşinyanı təbrik etmək fikrinə düşməsi bir çox sualların yaranmasına rəvac verir. İki ölkə arasındakı münasibətlərdə nə baş verdi ki, Putin Paşinyana doğru belə jest etdi?
Politoloq Nəzakət Məmmədova qəzetimizə bildirdi ki, bunu iki ölkə arasındakı münasibətlərin yaxşılaşmasından doğan təzahür kimi dəyərləndirmək olmaz: “Hər gün ötdükcə, Ermənistanla Rusiya arasındakı münasibətlər daha da kəskinləşir və pisləşir. Burada münasibətlərin ifadəsi və protokol qaydası var. Birinci halda söhbət münasibətlərin səmimiliyindən gedirdi. Yəni həmin təbrikin göndərilib və ya göndərilməməsi iki ölkə rəhbəri arasındakı münasibətlərin göstəricisi sayılırdı. Onda Putin Paşinyanı təbrik etməmək yolunu seçdisə, demək, münasibətlər gərgin olub. İndiki halda isə söhbət rəsmiyyətdən gedir. Putin təbriki indiki halda da göndərməsəydi, bu, Paşinyanın Rusiya tərəfindən “persona non qranta” elan olunması anlamına gələrdi. Görünür, Rusiya bunu etməklə Ermənistanla körpüləri tam yandırmaq istəməyib. Adi diplomatik etiket qaydasına riayət etməklə həm də Paşinyana bir şans verib. Protokol qaydalarına görə yalnız müharibə vəziyyətində olan ölkələr bir-birinə qarşı təbrik etməməklə bağlı laqeyd münasibət sərgiləyə bilər. Bir daha xatırladım ki, bu, Putinin Paşinyana olan rəğbətinin göstəricisi sayıla bilməz. Rusiyanın Ermənistanla bağlı strateji maraqları var. Hələlik Paşinyan həmin maraqları tam təmin edən siyasi persona deyil. Rusiyanın onu sıxma-boğmaya salmasının səbəbləri də məhz bununla bağlıdır ki, Paşinyan öz mövqeyini tam müəyyən etsin. Amma biz Paşinyanın bu xətt üzrə hərəkət etməkdə maarqlı olmadığının şahidi oluruq. Ən azı, Ermənistanda mütəmadi şəkildə təşkil olunan anti-Rusiya aksiyalarında səslənən şüarlardan da bu aydın görünür. Həmin aksiyaların əksəriyyətində Rusiyadan Ermənistanı tərk etmək tələb edilir. Bunun özü münasibətlərin nə dərəcədə gərgin olduğuna işarədir. Paşinyan baş nazir səlahyyətlərinə başladı. Bundan sonrakı mərhələdə Rusiyanın ondan tələbləri daha konkret və sərt şəkildə olacaq”.
Məhəmmədəli QƏRİBLİ
